Ko hono ʻIlo ʻo e Tamai Hēvaní: Ko ha Ako ki he Ngaahi Meʻa Fisifisimuʻá

ʻOkú ke lotu ki he Tamai Hēvaní, ka kuó ke fifili nai pe ʻokú Ne tatau mo e hā? pe ko e hā e ʻuhinga naʻá Ne tokoniʻi ai koe ke maʻu hoʻo ngaahi kī naʻe mole ʻi he ʻaho ʻe tahá? pe ʻokú Ne ʻafioʻi lelei fēfē koe? pe ʻoku anga fēfē ʻEne fetuʻutaki mo koé?

Ko hono mālié, ʻoku ʻikai ʻaupito ke tōmui ke ke ako lahi ange fekauʻaki mo e ʻOtuá. Ko ho faingamālie ʻeni ke ke kamata ai ha ako folofola ki he ngaahi meʻa fisifisimuʻá, ʻa ia te ke ako ai ki he ʻuhinga totonu ʻoku fakakaukau ai ʻa e ʻOtua ʻo e ʻunivēsí—mo ha fānau fakalaumālie ʻe laui piliona—fekauʻaki mo koe.

Ka ʻe lava pē ke faingataʻa hano kamataʻi e ngaahi meʻa fisifisimuʻá, ko ia tuku ki he saati ko ʻení ke tokoni atu kiate koe.

Te ke lava ʻo fili ha fehuʻi ʻi he sātí ʻi he ʻaho takitaha. ʻI hoʻo muimui ki he ngaahi sitepú pea tali ʻa e ngaahi fehuʻí, feinga ke ke fakakaukau fekauʻaki mo ho vā fetuʻutaki mo e Tamai Hēvaní. Fakakaukau ki Hono fatongia ʻi hoʻo moʻuí pea fehuʻi pē kiate koe ko e hā te ke lava ʻo fai ke ke toe ofi ange ai kiate Iá.

Taimi Lelei mo Ia

“ʻOku fie maʻu haʻatau taimi lelei mo e ʻOtuá, ke fakamālohia ʻetau fetuʻutakí. Tokanga ki he lotu fakatāutahá mo e ako folofolá mo taumuʻa maʻu pē ke moʻui taau ke maʻu ha lekomeni temipale—ko ha fakaʻaongaʻi fakapotopoto ʻeni hotau taimí mo e ngaahi ngāué ke tau ofi ange ai ki heʻetau Tamai Hēvaní. Tau tokanga muʻa ki he fakaafe ʻa e tangata faʻu Sāmé: ‘Mo u longo pē pea ʻilo ko au ko e ʻOtuá’ [Saame 46:10].”

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “ʻO e Meʻa Mahuʻinga Tahá,” Liahona, Nōvema 2010, 21.

ʻOku fēfē nai ʻa e ʻOtuá?	Mātiu 7:9–11 1 Sione 1:5 ʻEta 3:12	Ko e fē e ngaahi foʻi lea naʻe makehe kiate koé? Naʻe ʻi ai ha ngaahi lea naʻe toutou ʻasi? Kumi kinautolu ʻi he tikisinalí pe ko e Fakahinohino ki he Ngaahi Folofolá.
ʻOku faitatau kae kehekehe fēfē ʻa e Tamai Hēvaní mo Sīsū Kalaisi?	Sione 3:16, 35 Sione 17:20–23 Molomona 7:5–7	Teuteu ha lēsoni efiafi fakafāmili ʻi ʻapí fekauʻaki mo e meʻa naʻá ke akó.
ʻOku laui piliona ʻa e kakai ʻi he māmaní! ʻE lava fēfē ʻe he Tamai Hēvaní ʻo ʻiloʻi au?	1 Samuela 16:7 Saame 82:6 Luke 12:6–7 Tokāteline & Ngaahi Fuakava 93:23	Ko e hā e tefitoʻi fakakaukau ʻi he potufolofola takitaha? Feinga ke fakamatalaʻi fakanounouʻi ia ke siʻi hifo he foʻi lea ʻe nimá.
Te u lava ʻo ʻilo fēfē nai ʻa e Tamai Hēvaní?	Sione 14:6–9 1 Sione 4:7 ʻAlamā 30:44 Tokāteline mo e Ngaahi Fuakavá 132:22–24	Fai ha fekumi ʻi he LDS.org ki ha ngaahi lea mahuʻinga ʻoku maʻu ʻi he folofolá. ʻAlu ki he lds.org/media-library ke mamata ʻi ha vitiō fekauʻaki mo e tefitó.
ʻOku talamai ke tau fefolofolai mo e Tamai Hēvanʻi ʻi he lotu. Ka ʻoku founga fēfē ʻa e folofola mai ʻa e Tamai Hēvaní kiate au?	Tokāteline & Ngaahi Fuakava 1:38 Tokāteline mo e Ngaahi Fuakava 8:2–3 Tokāteline mo e Ngaahi Fuakava 9:8–9	ʻOkú ke fakataufolofola fēfē ki he ʻOtuá? Ko e hā te ke lava ke liliú ko e ola ia ʻo e meʻa kuó ke akó?

ʻOku toe ʻi ai hao fehuʻi ʻe taha ʻo kau ki he Tamai Hēvaní, Sīsū Kalaisi, pe ko e Laumālie Māʻoniʻoní? Hiki ia pea fakaʻaongaʻi ia ʻi haʻo ako folofola ʻi he kahaʻú ʻi he taimi ʻe mei ʻosi ai hoʻo saati ʻo e fehuʻí. Pea ʻoua naʻa ngalo te ke lava maʻu ai pē ʻo fakaʻaongaʻi ʻa e ngaahi maʻuʻanga tokoni hangē ko e Fakahinohino ki he Ngaahi Folofolá, Tuʻu Maʻu ʻi he Tuí, mo e Malangaʻaki ʻEku Ongoongoleleí ke ke ʻilo lahi ange fekauʻaki mo e meʻa ʻokú ke akó!