Ngaahi Tāpuaki ʻo e Vivili atu Ki Muʻá
ʻOku ʻomi ʻe heʻete hoko ko e mēmipa angatonu ʻo e Siasí ha ngaahi tāpuaki fakaofo. Ka ʻoku ʻikai ʻuhinga ia he ʻikai faʻa faingataʻa e moʻuí. Ngaahi ʻahiʻahi, ngaahi kaungāmeʻa fakangalingali, ngaahi faingataʻa fakafāmili, mo e hā fua. ʻE lahi ha ngaahi meʻa te ne feinga ke fakataueleʻi koe mei he vaaʻihala ʻo e fuakavá.
Ko hono ʻuhinga ia ʻoku hoko ai ʻa e, “vivili atu ki muʻa ʻi he tui mālohi kia Kalaisí” (2 Nīfai 31:20), ko e kaveinga ʻo e Mutualé ki he taʻu ní he ʻokú ne fālute ha pōpoaki mahuʻinga lahi. ʻI he taimi ʻokú ke vivili atu ai ki muʻa ʻi he tui mālohi kia Kalaisí, ʻo tuʻu maʻu ʻi hoʻo ngaahi fuakavá, ʻe lava ʻe he ʻOtuá ʻo fai ha ngaahi meʻa fakaofo maʻau mo fakafou ʻiate koe. Pea te Ne lava ʻo tokoniʻi koe ke ke ongoʻi ʻa e ʻamanaki leleí, fakafiemālié, mo e nongá ʻi he taimi tatau.
Ko ha meʻa ʻia naʻe ʻiloʻi lelei ʻe he Palōfita ko Siosefa Sāmitá. Naʻá ne taʻu 14 pē ʻi he taimi naʻá ne aʻusia ai ʻa e ʻUluaki Mata-Meʻa-Hā-Maí. ʻI heʻene tūʻulutui hifo ke lotu ʻi he Vaoʻakau Tapú, naʻe ʻohofi ia ʻe ha ivi taʻe-hā-mai ne fuʻu mālohi fau ʻa ia ne tuʻunuku mai ke ne fakaʻauha ia. Kae ngata pē ʻi heʻene feinga ʻaki hono mālohí kotoa ke ui ki he ʻOtuá naʻe fakahaofi mo ʻaʻahi mai ai ʻa e Tamaí mo e ʻAló kiate iá.
Kimui aí, ʻi he taimi naʻe vahevahe ai ʻe Siosefa ʻene aʻusiá, naʻe manukia ia ʻe hono kaungāmeʻá mo e kau taki fakalotofonuá (vakai ki he Siosefa Sāmita—Hisitōlia 1:15–17, 21–26). Naʻe ʻikai ʻaupito ke ngata ai ʻa e fakatangá pea naʻe aʻu pē ki he mole ʻene moʻuí ʻi ha taʻu ʻe 24 mei ai.
Ka naʻe vivili atu ʻa Siosefa ki muʻa ʻaki ʻa e ʻamanaki lelei, pea naʻá ne fiefia ke fai ia ʻi he ngāue ʻa e ʻEikí. ʻI heʻene tuʻu maʻu ʻia Kalaisí mo ngāueʻi [ʻene] tuí ke fai ʻa e meʻa ʻoku totonú, naʻe fai tāpuekina mo poupouʻi ia ʻe he ʻOtuá. Pea te Ne fai e meʻa tatau maʻau.
Ko ia vivili atu ki muʻa. Tukupā ke moʻui ʻaki e ongoongoleleí. Hanga tāfataha ki he Fakamoʻuí. Maʻu “ha mālohi haohaoa, mo ha ʻofa ki he ʻOtuá mo e kakai fulipē.” “[Keinanga] ʻi he folofola ʻa Kalaisí.” Ngāue ʻo fakatatau ki he fakahinohino ʻa e lakanga fakataulaʻeikí. Feinga ke ke hoko ʻo hangē ko ia ʻoku finangalo e ʻOtuá ke ke aʻusiá.
ʻI hoʻo vivili atu ki muʻá, fakahoko mo tauhi ʻa e ngaahi fuakavá ʻi he hala ki he moʻui taʻengatá, ʻoku mau fakamoʻoni atu te ke maʻu ai ʻa e fiefiá.