Pōpoaki ʻa e Faiako ʻAʻahí
Ko e Fāmilí: Ko Ha Fanongonongo ki Māmani
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE fai tāpuekina fēfē ʻa kinautolu ʻokú ke tokangaʻi ʻi hoʻo faiako ʻaʻahí ʻi he mahino ko ia ʻa e tokāteline ʻo e fāmilí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
ʻI he fakataha lahi ʻa e Fineʻofá ʻi he 1995 ʻi hono fuofua lau ʻe Palesiteni Kōtoni B. Hingikelī (1910–2008) ʻa e “Ko e Fāmilí: Ko ha Fanongonongo ki Māmaní,” naʻe pehē ʻe Poni L. ʻOsikāsoni, ko e palesiteni lahi ʻo e Kau Finemuí: “Ne tau houngaʻia pea mahuʻingaʻia ʻi heʻene mahinongofuá, pea mo e moʻoni ʻo hono tuku mai e fakamatala ko iá. … Kuo hoko e fanongonongo kau ki he fāmilí ko e tuʻunga ia ke tau siviʻi ʻaki e ngaahi fakakaukau ʻa e māmaní, pea ʻoku ou fakamoʻoni atu ʻoku moʻoni ʻi he ʻahó ni e ngaahi tefitoʻi moʻoni ʻoku fokotuʻu mai … ʻo hangē pē ko ia ʻi he taimi ne ʻomi ai ia kiate kitautolu ʻe he palōfita ʻa e ʻOtuá, ʻi he meimei taʻu ʻe 20 kuo hilí.”1
ʻOku tānaki mai ʻe Kalo M. Sitīveni, ko e tokoni ʻuluaki ʻi he kau palesitenisī lahi ʻo e Fineʻofá ʻo pehē, “ʻOku tau ako mei he fanongonongo fekauʻaki mo e fāmilí ʻo pehē, ‘ʻI he maama fakalaumālié, naʻe ʻiloʻi ai mo hū ʻa e ngaahi foha mo e ngaahi ʻofefine fakalaumālié ki he ʻOtua ko ʻenau Tamai Taʻengatá’2 …
“… ʻOku tau kau ki he fāmili ʻo e ʻOtuá pea ʻoku fie maʻu kitautolu ai.”3
ʻOku tau moʻui ʻi ha taimi kuo pau ke maluʻi ai ʻe he mātuʻá honau ngaahi ʻapí mo honau fāmilí. ʻOku lava ʻe he “Ko e Fāmilí: Ko ha Fanongonongo ki Māmaní” ʻo tataki kitautolu.
Ngaahi Potufolofola Kehé
Ngaahi Talanoa ʻa e Kakai Moʻuí
“Naʻe pehē ʻe Lī Mei Seni Hō mei he Uooti Tao ʻIuani Tolú, ʻo e Siteiki Tao ʻIuani Taiuaní, kuo akoʻi ia ʻe he fanongonongó ʻoku hanga ʻe he feohi fakafamilí ʻo fakatupulekina ʻa e ngaahi ʻulungaanga fakalangí hangē ko e tuí, faʻa kātakí, mo e ʻofá. Naʻá ne pehē, ‘ʻI he taimi ʻoku ou feinga ai ke tupulaki ʻo fakatatau mo e fanongonongó, ʻoku lava ke u aʻusia ʻa e fiefia moʻoní.’”4
Naʻe pehē ʻe Papulā Tomisoni, ʻa ia naʻá ne ʻi ai ʻi he fuofua taimi naʻe lau ai ʻa e fanongonongó pea naʻá ne hoko kimui mai ko ha tokoni ʻi he kau palesitenisī lahi ʻo e Fineʻofá: “Ne u kiʻi fakakaukau ʻoku ʻikai ha kaunga [ʻa e fanongonongo ki he fāmilí] kiate au he ʻoku teʻeki ke u mali pea ʻikai haʻaku fānau. Ka ne toe vave pē ʻeku fakakaukau hake, ‘Ka ʻoku ʻi ai ʻene kaunga kiate au. Ko e mēmipa au ʻo ha fāmili. Ko ha ʻofefine au, tuofefine, mehikitanga, tokoua, fakafotu pea mo ha mokopuna fefine au. … Neongo kapau ko au pē ʻoku kei moʻui ʻi hoku fāmilí, ʻoku ou kei hoko pē ko e mēmipa ʻo e fāmili ʻo e ʻOtuá.’”5