Ngaahi manatú
ʻIkai ko e Mana Naʻa Mau Fie Maʻú
ʻOku nofo ʻa e tokotaha naʻá ne faʻú ʻi ʻIutā, USA.
Ko e taimi ʻe niʻihi ʻoku tau lotu mo lotu kae ʻoua leva kuo mamahi hotau tuí koeʻuhí ko e mana ʻoku tau holi ki aí, ka ʻoku ʻomi ʻe he ʻOtuá kiate kitautolu ʻa e mana ʻoku tau fie maʻu moʻoní.
ʻI ha ngaahi māhina siʻi te u ʻosi mei he ʻunivēsití mo, fakaʻamua ke fai mo fanauʻi ʻeku fuofua pepeé. Naʻe vēkeveke tatau pē hoku husepānití mo au ke kamata hono maʻu ha fānaú.
ʻI ha taʻu ʻe taha, māhina ʻe fā, lahi mo e ngaahi sivi feitama ne ʻikai ola lelei, ngaahi sivi fanau (ovulation tests) ne ʻikai ola lelei, fāinga ʻi ha māhina ʻe ua ʻi ha ngaahi faitoʻo, mo ha ngaahi loʻimata ʻe laui afe kimui ai, ne ʻikai ha pēpē pea siva e ʻamanakí ki hano fakatupu fakaenatula (natural conception). ʻI he taimi ne fetuʻutaki mai ai ʻa e ʻōfisi ʻo e toketaá mo fokotuʻu mai ke ʻave kimaua ki ha mataotao ki he taʻefanaú (infertility specialist), naʻá ma fakasītuʻaʻi ia. Naʻe fakautuutu ʻema puputuʻú, peá ma fie maʻu ha mālōlō. Kimuʻa peá u tāpuniʻi atu e telefoní, ne pehē mai ʻe he nēsí, “Telefoni mai kiate kimautolu kapau te ke aʻusia ha mana.”
ʻOku fakaofo ʻa e ngaahi maná. ʻOku ʻi ai e ngaahi mana lalahi mo iiki. ʻOku nau hoko mai ʻi he taimi ʻoku ʻikai ke tau fuʻu ʻamanaki ai ki aí pea mo e taimi ʻoku tau fuʻu fie maʻu vivili aí. Pea taimi ʻe niʻihi ʻoku tau lotu mo lotu kae ʻoua leva kuo mamahi hotau tuí koeʻuhí ko e mana ʻoku tau holi ki aí, ka ʻoku ʻomi ʻe he ʻOtuá kiate kitautolu ʻa e mana ʻoku tau fie maʻu moʻoní.
Ne ma lotua fakamātoato ʻi ha taimi lahi ke ʻi ai ha fānau, ka naʻe ngali lōngonoa ʻa e ngaahi langí. Naʻe faifai peá ma fakakaukau ko e meʻa hala ʻokú ma lotu ki aí. ʻOku ʻafioʻi ʻe he ʻOtuá ʻa e ngaahi tāpuaki ʻokú ma fie maʻu moʻoní mo e taimi ʻokú ma fie maʻu moʻoni aí. ʻOkú Ne ʻafio ki he ʻata lahi angé. ʻOku tau mamata pē ki he ngaahi meʻa he taimi ní. Ko ia ne ma liliu leva. Naʻe tuku leva ʻema lotu ki he meʻa ne ma holi ki aí peá ma kamata ʻaki leva ʻema pehē “ʻokú ma fakamālō atu.”
Tamai Hēvani, ʻokú ma fakamālō atu ki Hoʻo ʻafió ʻi hoʻo fai tāpuekina kimauá.
ʻOkú ma fakamālō ki Hoʻo ʻafió koeʻuhí ko e ngaahi fāmilí mo e kaungāmeʻa ʻofá.
ʻOkú ma fakamālō ki Hoʻo ʻafió koeʻuhí ko e fānau ʻoku mau feohí ʻa ia te ma lava ʻo fiefia ai kae ʻoua leva kuo ma maʻu haʻama [fānau].
ʻOkú ma fakamālō ki Hoʻo ʻafió koeʻuhí ko e kau toketaá mo e kau saienisí ʻoku nau tokoni ke ʻilo ʻa e meʻa ʻoku ngāue mo ʻikai ngāue ʻi homa sinó.
Pea (ko e meʻa faingataʻa taha ʻi he taimí ni ke lea ʻakí) [ʻokú ma] fakamālō ki Hoʻo ʻafió koeʻuhí ko e ʻahiʻahí ni.
Naʻe faingataʻa ke ma houngaʻia koeʻuhí ko e meʻa ko ia naʻá ne fakamamahiʻi homa lotó, ka ne ma ʻilo ʻoku ʻofeina kimaua ʻe he Tamai Hēvaní. Ko ia ʻoku ʻi he ʻahiʻahí ni ha ngaahi tāpuaki. He ʻikai ʻaupito ke ma maʻu ʻa e ngaahi tāpuakí ʻo kapau te ma tukuange ʻa e ʻahiʻahí ke ne ikunaʻi kimaua. Ka, ke ma fili ke ma houngaʻia—pea ʻi heʻema fai iá, naʻe mahino ʻaupito ʻa e ngaahi tāpuakí:
Naʻe lahi ange ʻema fefalalaʻakí, fevahevaheʻaki ʻema ngaahi ongó, mo e feʻofaʻakí.
Naʻe lahi ange ʻema falala ki he ʻEikí mo lotu lahi ange.
Naʻá ma toe ofi ange ki he Fakamoʻuí, ʻo ongoʻi lahi ange ʻEne ʻi homa tafaʻakí, ʻofa lahi ange ʻiate Ia.
Naʻá ma ongoʻi ʻa e ʻofa ʻa e fāmilí mo e ngaahi kaungāmeʻa ne nau lotua kimauá.
Pea ʻi he taimi pē naʻá ma fakahoungaʻi ai ʻa e ngaahi tāpuakí ni, naʻe fakamalu kimaua ʻaki ʻa e ongoʻi nonga fakafiefia mo melino tahá ʻo ʻikai lava fakamatalaʻi.
Naʻe ʻikai ʻuhinga ʻa e ʻikai ʻomi leva homa fāmilí he taimi ko iá naʻe ʻikai tokanga mai ʻa e ʻOtuá. Naʻe fie maʻu pē ia ke ma falala ki Heʻene taimí, peá naʻá ma fie maʻu ʻEne melinó ke paotoloaki ʻa e falala ko iá. Naʻá ma fie maʻu ʻEne nongá ke pukepuke hake ʻaki homa loto faingataʻaʻiá mo ʻomi kiate kimaua ʻa e tuí ke ma kei laka atu ki muʻa.
Ko e nongá ʻa e mana ne ma fie maʻu moʻoní—ʻikai ko e mana naʻá ma toutou holi ki aí, ka ko ia naʻá ma fie maʻu lahi tahá.