Naan in kam̧ool eo an Ethan
Rijeje eo ej jokwe ilo Utah, USA.
Einwōt aolep ekar wōr aer naan in kam̧ool ijjelo̧kin wōt Ethan.
“Ron̄jake, ron̄jake. Jetōb Kwojarjar enaaj unoojdikdik. Ron̄jake, ron̄jake ainikien eo edik im e mera” (Children’s Songbook, 106).
Ethan eaar jijet ilo iien sharing time im reilo̧k ilo an eo m̧ōttan, Sam, eaar kwaļo̧k naan in kam̧ool eo an. Eo m̧ōttan Sarah eaar jijet ijo m̧aan, kōttar iien eo an. Sam eaar kwaļo̧k kōn jerbal in jipan̄ eo eaar kōm̧m̧ane. Eaar kwaļo̧k bwe ewōr an naan in kam̧ool kōn jerbal in jipan̄. Sarah eaar kwaļo̧k naan in kam̧ool eo an kōn baam̧le. Jemen Ethan eaar barāinwōt etal n̄an ijo m̧aan. Eaar kōnono kōn jerbal in tam̧peļ. Aolepāer raar kam̧ool bwe Kabun̄ in ej m̧ool. Einwōt aolep ekar wōr aer naan in kam̧ool ijjelo̧kin wōt Ethan.
“Ta eo ij kōm̧m̧ane kōn naan in kam̧ool eo aō?” Ethan eaar ļōmņak.
Eaar ļōmņak likļo̧k jet iiō rem̧oot ļo̧k ke e im ro m̧ōttan raar peptaij. Rūkaki eo an Būraimere, Sister Calder, eaar kōnono kōn Jetōb Kwojarjar.
“Jetōb Kwojarjar emaron̄ lewaj n̄an eok juon en̄jake ilo būruwōm̧. Eaar ba, ”Emaron̄ jipan̄ eok jeļā ta eo em̧ool. “Im en̄in ej wāween eo n̄an am̧ bōk juon naan in kam̧ool kōn ta eo kwoj tōmake.”
Ethan eaar kajieon̄ kōm̧m̧ane ta eo ejim̧we bwe en maron̄ en̄jake Jetōb Kwojarjar. Ej riiti jeje ko rekwojarjar im jar. Ak ejjan̄in kar wōr an en̄jake kōn ta eo armej ro rej kōnono kake. Ej meļeļein ke ejjeļo̧k an naan in kam̧ool?
Kajjitōk in eaar pād ilo ļōmņak eo an Ethan aolep raan. Eaar ļōmņak wōt kake ke e im Sam raar ikkure ālkin jikuuļ. Eaar ļōmņak ekōjkan an kar kajjitōk ippān Sam kake.
“A, Sam” Ethan eaar kajjitōk, “kwar mijak ke kwar kwaļo̧k naan in kam̧ool eo am̧ inne?”
Sam eaar to jān jikāāt bo̧o̧t eo an im etetal ioon ujooj ko. Eaar ba “ijjab lukkuun,” jijet laļ ļo̧k. “Iaar kwaļo̧k aō naan in kam̧ool ippān baam̧le eo aō joteen eo ļo̧k juon.”
Ethan eaar errā ippān im likūt jikāāt bo̧o̧t eo ņae ioon neen. “Ak ekōjkan am̧ jeļā ke ewōr juon am̧ naan in kam̧ool?”
“Ekwe, iaar jar im kar en̄jake aenōm̧m̧an kake.”
Ethan eaar em̧ajidjid jidik im kōro̧o̧lo̧l wiiļ eo. Ekōņaan en̄jake kain en̄jake rot in.
Joteen eo, ke m̧weo ekar marok im lūr, Ethan eaar bukwelōlō ilo peet eo an im jar.
“Jememwōj Ilan̄,” eaar ba, “jouj im jipan̄ eō bwe in bōk juon naan in kam̧ool. Jipan̄ eō bwe in jeļā n̄e Kabun̄ in ej m̧ool. Im bwe Josep Smith eaar juon rikanaan. Im n̄e Bok in Mormon ej m̧ool.”
Ilo io̧lepen jar eo an, Ethan eaar bōjrak. Eaar ļōmņak ium̧win juon minit. Innām eaar kajjitōkin e make, “Ekwe, ijeļā ke jabdewōt men?”
Innām en̄jake in aenōm̧m̧an eaar itok ioon. Eaar juon en̄jake ekajoor. Ak Ethan eaar jeļā bwe ekar jān Jetōb Kwojarjar.
Juon ļōmņak eaar itok n̄an kōļmenļo̧kjeņ eo an Ethan: “Ijeļā bwe ijeļā.” Im ke ej ļōmņak kake, eaar kile ke eaar en̄jake aenōm̧m̧an m̧okta ļo̧k.
N̄e ej riiti Bok in Mormon, em̧m̧an im ejim̧we an en̄jake. Kiiō ejeļā bwe Jetōb Kwojarjar eo ej kam̧ool n̄an e kōn en̄jake eo. N̄e kōmij etal n̄an m̧ōnjar eo im em̧m̧an im jim̧we en̄jake n̄an pād ijo, en̄in ej barāinwōt Jetōb Kwojarjar. Eaar jino bōk juon naan in kam̧ool!
Ejjab aikuj in jeļā aolep men kiiō. Ak ejeļā bwe Jetōb Kwojarjar ekar m̧ool im emaron̄ jipan̄ e kōļapļo̧k naan in kam̧ool eo an.
Ethan eaar jino bar jar. Ak ilo tōre in eaar ba kom̧ool.