Katakin Er bwe ren Riiti Bok in Mormon

Emilien Rioux, Quebec, Canada

Ilo iien jerbal in mijenede eo am ilo Geneva Switzerland Mission, kar kūr eō im kar kōjeno̧ļo̧k eō n̄an erom juon branch būreejtōn, im kar kūr kōrā eo ippa n̄an erom juon būreejtōn n̄an Doulul eo an Kōrā ro. Kōm̧ kar jerbal ippān doon kōn aolepān am kajoor n̄an kōkm̧anm̧anļo̧k branch eo emōjņo. Men̄e ekar ejaak ilo 1960 eo, ak branch eo eaar jan̄in kōm̧m̧an jadewōt peptaij ko ium̧win elōn̄ iiō im ejjanin kar wōr mijinede n̄an jerbal in mijenede eo ium̧win 15 iiō ko.

Ekar juon kam̧ool bwe jaar aikuji jipan̄ eo an Irooj bwe jen maron̄ pukōt mejļan apan̄ ko reļļap ilo branch eo. Ālkin aō kar jar kōn apan̄ ko ilo branch eo, Jetōb eo an Irooj eaar ba n̄an eō, “Katakin membōr ro bwe ren riiti Bok in Mormon, im kom naaj jeraam̧m̧an.”

Kōm kar kajju kōm̧m̧ani karōk ko am n̄an kōm̧m̧an kallim̧ur ippān membōr ro bwe ren jino riiti Bok in Mormon.

Ekar ļap an lōn̄ tōprak ko rekabwilōn̄lōn̄. Eaar bar wōr Aenōm̧m̧an im Jetōb ilo branch eo. Baam̧le ko rekāāl raar kobatok ilo Kabun̄ in. Juon likao eaar itok limoin kōn ikdelel ko an n̄an jerbal n̄an Anij, kōn menin, eaar etal n̄an mijen eo an. Jet iaan m̧are ko remōjņo raar kajoorļo̧k, im baam̧le ko raar jino aer epaake doon. Rainin branch in ej kajoor.

Kōm im ro uwaan branch eo kōmij kam̧ool ippāmmi make kōn kajoor eo ekabwilōn̄lōn̄ kōn Bok in Mormon. Em̧ool ej juon deka in jabōn em̧ eo an Kabun̄ in ad im naan in kam̧ool ko ad kōn gospel eo im kōn Jisōs Kraist. Eļap am kaorōk e kōn aolepān buruōm. Ej juon kein jipan̄ eo n̄an jeļāļo̧kjeņ eo ejjeļo̧k jem̧ļo̧kin im eban oktak.

En̄jake in eaar katakin kōm bwe Bok in Mormon ej un eo eļap im m̧ool n̄an jipan̄ ro jeid im jatid anjo ioon jetōb ko remarok me rej kaliboboik laļ in. Bok in ej boktok aenōm̧m̧an, lan̄lōn̄, m̧ōņōņō, im ikdeleel eo e dim n̄an ļoor Rilo̧mo̧o̧r Jisōs Kraist.