Pija ko an Rūm̧m̧an Ded ro
Bwini Kōjeraam̧m̧an ko ilo Madagascar
Men̄e jej mour ilo juon laļ eo elōn̄ nana ko ilo kien eo im apan̄ ikkijeen jāān, Solofo ej pedped wōt ioon kōjeraam̧m̧an ko me rej itok jān gospel.
Pija ko: ijo tulōn̄ jān Solofo Ravelojaona; laļ © iStock/Thinkstock
Ālkin an kōrā eo ippa kar en̄taan im buromōj kōn an kar mej lojeen jinoin an kar bōro̧ro, Solofo Ravelojaona eaar en̄jake bwe jar ko aer raar uwaak juon iiō tokālik ke ekar bar bōro̧ro kein karuo. E im kōrā eo pāleen, Hary Martine, raar likūt bwe ļotak eo an ajri eo nejier kein kajuon eaar juon iaan kōjeraam̧m̧an ko reļļap tata. Solofo ej kōmeļeļe, “Kōnke kōm eaar kajjitōk ippān Anij im E eaar letok leddik in nejim, kōm kar kōm̧m̧an etan, ilo kajin Malagasy, meļeļe ‘uwaak an Anij.’”
Solofo, juon likao in Madagascar, ej dāpdep wōt ilo jeļā eo bwe Anij ej uwaaki jar ko im ilo iien ko rejejjet ej kōjeraam̧m̧an ro ritōmak. “Mour epen,” Solofo ej ba, “im n̄e armej rejjab jeļā ta eo rekōņaan, jet rej jino kajjitōk, ‘Etke eaar tin waļo̧k menin n̄an n̄a?’ Remaron̄ iļo̧k jān Kabun̄ eo ak pere tōmak ko aer ilo Anij. Ak n̄e jej mour kōn gospel eo im riiti jeje ko rekwojarjar, epidodoļo̧k. N̄e kwoj lukkuun mour kōn gospel eo, komaron̄ lukkuun loi kōjeraam̧m̧an ko.”
Mour ilo juon laļ eo me eļap an lukkuun apan̄, āinwōt lukkuun jerata, okoktak in jerbal ilowaan kien eo, mōjņo ilo jipan̄ļo̧k jukjukin pād ko, im jorāān in laļ, ealikkar an Solofo ba bwe mour epen. Ak n̄an e, kōjeraam̧m̧an ko itok jān mour kōn gospel eo ej kōmeraikļo̧k jabdewōt apan̄ ko. “Ijjab maron̄ bwini kōjeraam̧m̧an ko ij iooni, toon wōt aō mour kōn gospel in,” ej ba.
Kōnke Kabun̄ in ej kab baj kāāl ļo̧k ilo Madagascar (branch eo jinotata eaar ejaake ilo 1990), Solofo ej ba bwe men eo epen tata āinwōt juon membōr ej kōn kōnono riab im jabwe meļeļe an armej kōn Kabun̄ in. Solofo ej ba bwe, āinwōt ilo visōn eo an Liai kōn wōjke in mour, “armej remaron̄ jab lukkuun bōk kōjeraam̧m̧an ko an gospel kōnke rej jook kake imaan mejān ro mōttaer im mijak bwe baam̧le ko aer remaron̄ dike er.” Ta eo ekōm̧m̧an bwe Solofo en oktak, an naan in rōjan̄, ej bwe, “Ijamin jook. Ij mour kōn gospel eo, im iaar kōņaan wōt kwaļo̧k gospel in n̄an ro mōtta ilo jikuuļ, men̄e jet iaer raar jab kōņaan ron̄jake.” Ekkā an kwaļo̧k naan in kam̧ool eo an, eļap, jon̄an ro mōttan rej likūt riab in etan “rikaki ļap.”
Lukwaļpen an lukkuun nana kien im apan̄ jāān, Solofo im Hary Martine raar pedped wōt ioon kōjeraam̧m̧an ko an bujen ko aer ilo tampeļ (raar m̧are ilo Johannesburg South Africa Temple juon iiō ālkin mijen ko aer—e ilo Uganda, im kōrā eo ilo Madagascar), barāinwōt raar likūt aer lōke ilo Irooj. “Epād ippa gospel eo, im ij aje mour e aō n̄an lopiden pein Anij,” Solofo ej kōmeļeļe. Emaron̄ pedped ioon naan in kam̧ool eo an kōnke ewōr kadede an tōmak ilo “uwaak ko an Anij.”