Mijenede ro Rerūtto: Aikuj, Kōjeraam̧m̧an, im Iakwe
Jerbal āinwōt juon mijenede erūtto emaron̄ ļapļo̧k an ukoktak, dik wōnāān, im ļapļo̧k an kam̧ōņōņō jān am̧ maron̄ ļōmņake.
“Komaron̄ ke itok im jipan̄?”
Ej juon kajjitōk Gerald im Lorna Malmrose jān Washington, USA, kar uwaake m̧okta. Rekar ba aaet ke bisop eo aer, innām juon mijen būreejtōn, ekar kajjitōk eļan̄n̄e remaron̄ jerbal ippāer ilo West Indies. Rekar ba aaet bar juon alen ke stake būreejtōn eo aer ekar kūr er n̄an kakūrm̧ool juon jerbal in mijen ilo opiij ko reļļap an Kabun̄ in ilo Salt Lake City, Utah, USA, jerbal ilo computer im human resources.
Ke kar bisop eo aer im mijen būreejtōn eo, Reid Robison, ekar kūr er bar juon alen, iien in āinwōt būreejtōn eo an jikin kamminene eo an mijenede ilo Accra, Ghana, ekar kajjitōk eļan̄n̄e Malmrose emaron̄ bar juon alen jipan̄.
“Kōm̧ kar jeļā bwe kōm̧ maron̄ lōke Irooj,” Elder Malmrose ej ba. “Kōn menin kōm̧ kar lōke E bar juon alen.” Rekar ba aaet, kadedeļo̧k peba ko aer, bōk kūr eo aer, im ejjab etto kar pād ilo Ghana.
Jerbal āinwōt Ruo Ripālele
En̄jake ko an Malmrose rekar kōmeļeļeik jet katak ko kōn ripālele ro rej mijenede bwe remaron̄ jab lukkuun meļeļe:
-
Ewōr ruo taib in mijen ko. (1) Kabun̄ eo an Jisōs Kraist ej kūr ripālele ro n̄an jerbal ilo kapijuknen eo aer make ak ijoko rettoļo̧k jān kapijuknen ko aer. (2) Juon stake būreejtōn ekar kūr ro ripālele rej mijenede n̄an mijenede ro rej jerbal jimettan raan ilo bukwōn eo aer, jān 8 n̄an 32 awa ko juon wiik. Rekar kijon̄ mour im jerbal ilo jikin eo aer ak jet iien remaron̄ jerbal ijoko rettoļo̧k jān kapijuknen eo aer.
-
Mijen būreejtōn ro rekar rōjan̄ n̄an kappukōt ripālele ro remaron̄ kake aikuj ko ilo mijen eo aer, im ripālele ro remaron̄ kwaļo̧k ļōmņak ko aer. “Kōm̧ij jab ba bwe ripālele ro remaron̄ bōk im kālet ijjitōn̄ ko aer make,” Elder Jeffrey R. Holland jān Doulul eo an Jon̄oulruo Rijilōk ro ekar kōmeļeļeiki. “Juon kūr ej juon kūr. … [Ak] jej kōnono n̄an ripālele ro rerūtto kōn ļōmņak in jerbal ko aer, im aolep ļōmņak ko kapeni rej ilo̧k n̄an kōtļo̧k aer jerbal ijo im ekōjkan aer kōņaan in jerbal.”1
-
Mijen būreejtōn ro rej kapilōk ripālele ro rej mijenede kōn wāween aer maron̄ em̧m̧an aer kōjerbal kāpāāl ko aer im maron̄ ko ippāer. “Bwe en wōr en̄jake eo elukkuun wōrtokjān āinwōt ruo ripālele,” Būreejtōn Robison ej ba, “ej aikuj wōr iien ko rem̧m̧an n̄an jerbal ilo eria ko eitoklimoim ie im ijoko ewōr am̧ kapāāl ie ko kwoj en̄jake ke ewōr juon men komaron̄ in leļo̧k.”
N̄an waanjon̄ok, Būreejtōn Robison ejeļā bwe Elder Malmrose ejeļā kajin French, ejipan̄ kōnke elōn̄ RiAfrica rej kōnono kajin French. “Ikar pijaik an bōk koņaan ilo jerbal in ito itak im jerbale visa ko,” Būreejtōn Robison ej ba. “Ak ke ekar tōparļo̧k ijeņ, ikar kile bwe menin ekar jab lukkuun ta eo ekar kōņaan. Kōn menin ikar kajjitōk ippān bwe en kōjerbal kapāāl ko an ikijeen kamputōr. Ekar jerbal ippām̧ awa ko kōkōm̧anm̧anļo̧k system ko am im ejaake ripo̧o̧t ko kōm̧ aikuji.” Elder Malmrose ej barāinwōt jipan̄ mijenede, eļaptata mijenede ro rej kōnono kajin French, kōpooje etaer im kōm̧m̧an jerbal in tampeļ ko n̄an baam̧le ko aer. Sister Malmrose, juon eo elōn̄ an peba ikijeen jipan̄ rinan̄inmej, kar jitōn̄e bwe en jerbal ippān taktō eo an mijen eo im nōōj eo.
E ej Kōpooj Iaļ eo
Āinļo̧k wōt Malmrose ro, ripālele ro jet rej loe bwe n̄e rej lōke Irooj, E ej kōpooje iaļ eo. En̄in ekar ta eo ekar waļo̧k n̄an Alvin im Corazon Rieta jān Kawit, Cavite, ilo Philippines.
“Ruo iiō m̧oktaļo̧k jān aerro kar kālet bwe erro en jerbal, kōm̧ kar jino kōm̧m̧an karōk ko n̄an pejnej eo an baam̧le eo am̧,” Elder Rieta ej kōmmeļeļeiki. “Ļaddik im leddik eo nejūm̧ rekar kadiwōjļo̧k jān kaļōj im remaron̄ in bōk jikūm̧, ak ekar ļōmņak eo emaron̄ ņamejļan wāween ko renana im rejelet pejnej eo im ewi waween an naaj armej ro naaj uwaak n̄an karōk eo aer.”
Sister Rieta ekar barāinwōt inepata kōn an em̧m̧akūt jān leļļap eo jinen. “Ikar mijak n̄e kōm̧ maron̄ in luuji ilo am ped ettoļo̧k jān e,” liin ekar ba. “Ikar barāinwōt en̄jake likjab n̄an kajjitōk eo ikkijeen katakin gospel eo.”
Rekar bōk kapilōk jān bisop eo aer im ippān ruo ripālele ro rekar jerbal ilo Davao. “Aolepāer rekar kwaļo̧k naan in kam̧ool ko rekajoor bwe Irooj enaaj tōl kajjojo ripālele ro bwe ren jeļā ņamejļan wāween ko rejelet kapijuknen, baam̧le eo aer, im jāān ko n̄an mijen eo aer,” Sister Rieta ej ba.
“Ke kōm̧ ar pukōt tōl,” Elder Rieta ej ba, “mijak ko am rekar waļo̧k—pejnej eo am ekar em̧m̧an wōt men̄e elōn̄ apan̄ ko, armej ro kōm̧ij jerbal ippāer rekar kwaļo̧k aer lan̄lōn̄ im jutak ilikim, im baam̧le eo am ekar epaake doon ilo am kōjparok leļļap eo enan̄inmej jinem̧. Kōm̧ ar jino meļeļe bwe Irooj em̧ool enaaj jipan̄ kōj.”
Rieta ro kiiō rej jerbal ippān membōr im jipan̄ ritōl ilo Philippines Cagayab de Oro Mission.
Elōn̄ Men ko Komaron̄ Kōm̧m̧ani
Jet ripālele rekar ļōmņak kōn utam̧e ko aer ilo ānbwin, ak Keith im Jennily Mauerman jān Utah, USA rekar jab. Iiō ko ļo̧k, emān allōn̄ emootļo̧k ālkin aer kar m̧are ilo Los Angeles California Temple, Keith kar bōke im jilkinļo̧k n̄an jikin tariņae. Juon ritōl airborne squad, ekar etetal im̧aan ritariņae ro jet ke ekar eddōppokļo̧k juon baam̧. Ekar jako ne ko neen. Ke ekar itaaktok ilo kapijuknen, Jennilyn ekar ettōrļo̧k n̄an turājet in.
“Ijeļā bwe ijab aikuj in inepata,” Keith ej ba, “kōnke emōj am̧ro m̧are n̄an indeeo. Kōrā eo pāleeō ej jutak ilikiu aolep iien. Ej rejtake eō aolep raan.”
Ke Sister Mauerman ekar retire, ekar pepe ippān bwen etal im jerbal e juon mijen. Ak an jako aolep nee ko neen Elder Mauerman enaaj ke kōm̧m̧an inepata? “Ewōr men ko aolep iien ijjab maron̄ kōm̧m̧ani,” ej ba, “ak elōn̄ men ko imaron̄ kōm̧m̧ane, kōm̧ jeļā bwe enaaj wōr juon jikin n̄an kōm̧.”
Ālkin aer kadedeļo̧k peba ko aer, ekar jāāke bo̧o̧k eo me ej kwaļo̧k ke ekar jerbal ilo military. Ejjab etto rekar bōk juon kūr jān Church Military Relations. “Ekar wōr aō ID kaat eo ej kōtļo̧k am deļo̧n̄e jikin tariņae ko, kōn menin kōm̧ kar kajjitōk am mālim bwe ren jilkinļo̧k kōm̧ n̄an military relation mission.”
Mauerman rein rekar kūr n̄an jerbal ilo juon jikin ritariņae ilo North Carolina, USA. Elder Mauerman ej keememej: “Kōkkaļļe eo ilo kōjem̧ eo ej ba ‘Fort Bragg, Home of the Airborne.’ Ke riwaj ro rekar iakiakwe kōm̧ kōn unin tōl eo an ritariņae ‘All the Way!’ ekar kāāl aō bar ron̄ ium̧win elōn̄ iiō ko. En̄jake eo ekar āinwōt kapijuknen eo, mekarta ijjan̄in kar pād ilo Fort Bragg. Ikar jeļā bwe kūr eo am ekar jejjet im bwe Irooj ej ļōmņak kōn eō.”
“Kōm̧ kar katakin jān katak ko kōn un̄n̄are peid make im peran im kōn kōkajoorļo̧k m̧are,” Sister Mauerman ej ba. “Mokta, kōm̧ kar jab kōņaan in kwaļo̧k bwebwenato eo am, ak kōm̧ kar loe bwe ne kom kwaļo̧k e enaaj kōm̧m̧an oktak. Ritariņae ro im ro pāleer rekar kalimjek kōm̧ im ba, ‘Eļan̄n̄e komiro maron̄ kōm̧m̧ane menin, kōm̧ maron̄ barāinwōt kōm̧m̧ane.’”
Ekar wōr juon an Mauerman ro bōklekōt em̧m̧an ilo North Carolina bwe rekar kajjitōk bwe ren bar jerbal bar juon alen. Rainin rej kattōr enan̄in 40 maeļ ko (64 km) jān kapijuknen eo aer ilo Orem n̄an Salt Lake City ruo kōttan juon wiik n̄an jerbal ilo Church Military Relation Office eo. Rej barāinwōt katakin ripālele ro rej mijenede ilo jikin kamminene an mijenede ilo Provo, ijo im rej lo aolep kain kurub ekoba ro rej anjo jān apan̄ ko n̄an aer jerbal.
Kajin ko an Aolepān Laļ in
Kar kūr n̄an Brazil Cuiabá Mission, Randy im Lou Ellen Romrell jān Utah rekar inepata. Men̄e Elder Romrell ekar jerbal ilo Brazil āinwōt juon mijenede edik, ekar jab lukkuun jeļā kajin Portuguese. Im Sister Romrell ekar jab jeļā kajin Portuguese. Ekkatak im kijejeto, ijoke, ekar jipan̄ kōro̧o̧ltok kapāāl ko an Elder Romrell ilo kajin Portuquese im Sister Romrell ekar eddōkļo̧k. Barāinwōt juon ukulele.
“Ikar jab ļōmņak in bōktok,” Sister Romrell ej ba, “ak Elder Romrell ekar en̄jake bwe kōm̧in bōktok, im ekabwilōn̄lōn̄ n̄an loe ta eo emaron̄ kōm̧m̧ane. Ilo am katakin rūkatak ro im kōm̧m̧ane jerbal in kōro̧o̧ltok im jem̧jerā, ekam̧ōņōņō n̄e kōm̧ij kōjerbale n̄an kōm̧m̧an bwe armej ren al al ko. Kōm̧ kar katak kajin eo, im al ko rej bōktok juon jetōb n̄an er.”
Men̄e kajin Portuguese eo an ekar eddōkļo̧k wōt, ekar lukkuun jeļā al al ko. “Al ej bōktok armej ippān doon,” ej ba. “Men̄e ijjab maron̄ meļeļe men otemjej rej ba ilo juon iien loļo̧k, n̄e kōm̧ij al, kōm̧ij ekkejel ippān doon.” N̄e rej kajjitōk ippāer bwe ren kōnono ilo jikuuļ ko kōn holiday eo an Riamedka Thankgiving, Romrell ro rej kōjan̄jan̄ al in kam̧m̧oolol ko—kōjan̄jan̄ kōn ukwelele. Im Sister Romrell ej barāinwōt kōjerbal elōn̄ ļo̧k kein kōjan̄jan̄ ko, piano, n̄an kōjan̄ al ko ilo imōnjar eo.
Im Portuguese? “Men̄e kwoj jab lukkuun jeļā kōnono, ekkatak jejjo naan ko emaron̄ jipan̄,” liin ej ba. “Baj ba iakwe im kam̧m̧oolol armej ro kwoj ioon er im̧aan am̧ iaļ. Kwaļo̧k n̄an er bwe kwoj ekkatak. Kōm̧m̧an bwen pidodo im pedped wōt ioon Jetōb eo.” Im Jetōb, aaet, ej bar juon kajin aolep armej remaron̄ kōnono kake.
Jerbal ilo Kapijuknen
Paul im Mar Jean Lewis jān Utah emōj aer jerbal im kadedeikļo̧k jilu mijen ko ippān doon (Palmyra New York Temple; Hong Kong China Temple; im Croatia, Serbia, im Slovenia ippān jemenere ko im institute ko). Rekar m̧aanjabpopo n̄an bar jerbal n̄e stake būreejtōn eo aer enaaj kajjitōk, “Kwonaaj ke m̧ōņōņō in jerbal ijin ilo stake in ad make, jipan̄ mijen in jej jokwe ilowaan?”
“Kōm̧ kāāl tok n̄an ijin, kōn menin ekar juon iien em̧m̧an” Sister Lewis ej ba. “Kōm̧ij jerbal ippān elder im siter ro reddik, jerbal epaakeļo̧k mijen būreejtōn eo, etal n̄an kweilo̧k ko an district im zone, im jerbal ippān ritōl ro an mijen ilo ward.” Rej barāinwōt loļo̧k rikkatak ro im ro rej janiknik.
“Emōj am ioone elōn̄ armej ro rem̧m̧an kōm̧ jamin naaj kar jeļā kajjier,” Sister Lewis ej ba, “ekoba jet armej ro rekar jekarļo̧k jān iaļ in. N̄an loe aer ro̧o̧ltok, bōk kain̄i ko, im etal n̄an tampeļ eo ej juon kōjeraam̧m̧an em̧m̧an.
“Eōn̄ ripālele, n̄e rej ļōmņak kōn jerbal e juon mijen, rej inepata kōn ta eo renaaj kōm̧m̧ane n̄an m̧weo m̧weer im wa ko waer ak renaaj oon̄ kōn baam̧le ko aer,” Elder Lewis ej ba. “Kōm̧ ar maron̄ jokwe ilo m̧ōko im̧ōm̧ make im wa ko waam̧ make. Rej rōjan̄ kōm̧ n̄an m̧akūtkūt ko an baam̧le, toon wōt aer jab kapan̄ jerbal in mijenede eo am̧. Im kōm̧ kar barāinwōt pād ijin n̄an ļotak eo an juon jibūm̧ ajri.”
Kōjeraam̧m̧an ko an Baam̧le
Ilo bar juon wāween, Jill im Kent Sorensen, ro rekar jān ejja stake eo wōt, ba juon iaan wāween ko rem̧m̧an n̄an kōkajoorļo̧k baam̧le ko aer ekar jerbal ettoļo̧k jān kapijuknen eo aer. Sister Sorensen ej ba, “Juon iaan jekpen ko ripālele ro rej letok ejjab etal ippān ajri ro jibūer, ajri ro emōj aer m̧are rej jelm̧ae apan̄, leddik ro nejier rej bōro̧ro, leļļap im ļōļļap ro jemāer—komaron̄ in kōlaajraki. Baam̧le ej juon men eaorōktata, im kwoj oon̄ kake er aolep raan. Ak etal n̄an juon mijen ej jilkinļo̧k juon ennaan ekajoor bwe jerbal in mijenede ej barāinwōt aorōk.”
Ijjelo̧kin, Elder Sorensen ej kakeememej, “elōn̄ wāween ko n̄an bwebwenato ippāer en kab kiiō me komaron̄ in check in aolep iien.”
Itoitak in mijenede eo an Sorensen ekar ijjino jilu iiō ko rem̧ootļo̧k, ke bisop eo aer ekar kajjitōk ippāer bwe ren kōm̧m̧an nokon in jota ko aolep allōn̄ n̄an ripālele ro rej ļōmņak in jerbal in mijenede. “Ālkin aer kōnono kake aolep iien,” Sister Sorensen ej ba, “jej aikuj in etal kōj make!” Rekar bōk juon kūr n̄an jerbal ilo Cook Islands, ijo jibūn im jim̧aan Jill rekar jerbal ie 50 iiō ko rem̧ootļo̧k.
Rainin, ilubwilijin eddo ko jet, kar kajjitōk ippāer n̄an katakin kūlaaj in Baibōļ ko ilo jikuuļ ko.
“Kōm̧ kar kōnono kōn Kraist āinwōt ejmaan eo,” Elder Sorensen ej ba. “Kōm̧ kar leļo̧k n̄an rijikuuļ ro juon dekā edik im rōjan̄ er bwe ren pād wōt ilo dekā eo epen ilo Kraist. Kiiō aolep jikin kōm̧ij etal ie ļo̧k, armej rej ba, ‘Dekā epen!’ n̄e rej lo kōm̧.
Itok im Jipan̄
Eļan̄n̄e kwoj ļōmņak kōn jerbal in mijenede aolep raan ak jerbal in jipan̄ ilo Kabun̄ eo, aolep ripālele rein renaaj kajjitōk ippem̧ ejja kajjitōk in Būreejtōn Robison ekar kajjitōk ippān Geral im Lorna Malmrose: “Komaron̄ ke itok im jipan̄?” Im renaaj ba n̄an eok bwe, jekdo̧o̧n ewi jon̄an am̧ bōk koņaam̧, kallim̧ur in em̧ool: Eļap aikuji eok, komaron̄ leļo̧k jipan̄, im kwonaaj jeraam̧m̧an im iakwe.