KalLim̧ur n̄an Bōjrak
Rijeje eo ej jokwe ilo New York, USA.
Kapāāl ko aō ikkijeen kōjan̄jan̄ piano raar jab em̧m̧anļo̧k, men̄e ālkin elōn̄ iiō in kamminene ko. Ro jinō im jema raar ba in kobōjrak aō kōjan̄jan̄ piano ilo juon jekjek: Iaar aikuj ekkatak 50 al ko.
Iaar deļo̧n̄ļo̧k n̄an m̧weo, meja eaar obrak kōn dān in kōmjalaal ālkin an kar bar nana aō kōjan̄jan̄ piano. Kar kein kemān iiō in aō ekkatak piano, im kar jidik wōt an em̧m̧anļo̧k aō kōjan̄e “Twinkle, Twinkle, Little Star.” Rikaki eo aō eaar kajjieon̄ pukōt juon men em̧m̧an n̄an ba kōn an nana aō kōjan̄jan̄, ak iaar en̄jake wōt ke elukkuun nana. Ro jinō im jema raar kōļļā wōņāān aer katakin eō piano men eo me iaar jab kōņaan im ekar ejjeļo̧k aō kōjatdikdik kake.
Iaar kōņaan bwe ro jinō im jema ren kōbōjrak eō. “Jouj,” Iaar akweļap. “Inaaj kōm̧m̧an jabdewōt men. Ewi wāween aō ukōt ami ļōmņak?”
Ālkin ekōnono ko ikōtaer make, raar ba, “Eļan̄n̄e kwonaaj ekkatak 50 al, jenaaj kam̧ōj eok.”
Iaar kajju bar jino kamminene. Iaar lukkuun kōņaan bwe in bōjrak jon̄an iaar kajju kōmaat aō iien n̄an katak piano. Al eo jinoin, “Kimij Kamolol Yuk, O Anij, Kin Juōn Dri Kanan” (Al, no. 26), ekar bōk juon allōn̄ bwe in tijem̧ļo̧k kake. Iaar ļōmņak wōt in kamōj eō, kōn menin iaar wōnm̧aanļo̧k wōt im kamminene.
Juon men ekabwilōn̄lōn̄ eaar waļo̧k: ekar mōkaj aō lukkuun tijem̧ļo̧k kōn al ko. Iaar jino mōņōņō ilo aolepān wiik eo. Iaar kile ippa make ke ij in̄ūrn̄ūr ippān al ko ilo raan eo im ļap aō al ilo iien kweilo̧k in kwojkwoj eo.
Āliktata, eaar bōjrak aō bwine jete al ijeļā. Ke eaar ļap ļo̧k aō kapāāl ikkijen kōjan̄jan̄ piano, iaar kile bwe imaron̄ kajju tijem̧ļo̧k ilo kōjan̄ juon al kāāl ilowaan wōt 30 minit.
Āliktata ke ij kakobaik al ko aolep, emōj aō jeļā elōn̄ļo̧k jān 50 al. Im ejjelo̧k iaļan aō tin kōbōjrak eō jān kōjan̄jan̄ piano. Eaar jino ļap lōke ippa kōn maron̄ ko aō n̄an kōjan̄jan̄ im iaar en̄jake kajoor in al ko ilo mour eo aō.
Al ko rej āinwōt jeje ko rekwojarjar; rej kōnono kōn m̧ool eo. N̄e ij kōjan̄i al ko, ij en̄jake aō lukkuun leļo̧k aō n̄an jeje ko rekwojarjar. Ekkatak kilen kōjan̄ al ko ekar jipan̄ eō n̄an kōļapļo̧k naan in kam̧ool eo aō im ekkatak kōn m̧ool eo. Iaar kile bwe n̄a make ij lali naan ko reoktaktak ilo al ko n̄an jipan̄ eō kajjojo raan. Kōjan̄jan̄ piano eaar kōkajoor naan in kam̧ool eo aō im kōpeļļo̧k kōjem ko n̄an eō ijoko ij etal ie lo̧k.