Kile Wāween an SetanUkōt Mōōran

Jān Dennis C. Gaunt

Rijeje eo ej jokwe ilo Utah, USA.

N̄e jej jelm̧ae aujiid ko ilo mour in jetōb, Bok in Mormon emaron̄ jipan̄ kōj jeļā ta eo em̧ool im ta eo ejjab.

Iaar illik jejjo taļa ilo wallet eo aō ilo juon mōn wia ke ej jejjete aō kalimjōk juon iaan taļa ko. Iaar ļōmņak maroroin taļa eo eaar mera ļo̧k jān ko jet, kōn menin iaar lukkuun kepaak im lukkuun etale. Innām, iaar lo bwe pija eo pijain Būreejtōn George Washington eaar jab lukkuun alikkar. Barāinwōt aō en̄jaake peba eo āinwōt eoktak. Ekar juon aujiid! Kūļōōk eo eaar jāniji tok n̄an juon m̧ool in taļa innām karo̧o̧l ļo̧k riab in taļa eo n̄an m̧ōn wia eo.

Eļap aō kar ļōmņake riab in taļa eo n̄an kiiō. Iaar ļōmņak ewi toon an baj armej kōjerbale im jete armej emōj aer bwebwe jāne ilowaan iiō ko. Ilo m̧ool, eļan̄n̄e inkar jab lukkuun kalimjōke, inkar bar bwebwe jāne. Ak ilo aō keidi n̄an men ko me m̧ool in im mije oktak ko ijjeļo̧kin aō lale aer āinwōt juon, ikar kile bwe ekar juon aujiid.

Bok in Mormon eobrak kōn waanjon̄ak ko kōn aujiid ko ilo jetōb, ko raar ļoor wāween riab ko an Setan im m̧oņ e ro jet kōn tōbrak ko aer make. Ilo ad katak kōn aujiid im kōm̧m̧an ko aer n̄an kōttōpar, jej jino kile bōd ko aer im likjab ko ilo ejja wāween eo wōt me juon eo emminene ej jino kile oktak ko ikōtaan m̧ool in im riab in jāān. Ilo an ļapļo̧k ad kamminene mej ko mejād n̄an kile okoktak ko, enaaj em̧m̧anļo̧k ad kōpooj kōj n̄an kowaani aujiid ko ilo raan kein im anjo jān riab ko aer.

Kakobaik jeļā ko kōn an Setan Ukōt Mōōran

Setan ej pukōt n̄an tōlļo̧k kōj kōn jetōb in aujiid eo an make, im eļan̄n̄e jejjab kōm̧anm̧an, jenaaj po. Būreejtōn Joseph F. Smith (1838-1918) eaar kakkōl: “Setan ekapāāl ilo anōknōk, im āinwōt gospel eo em̧ool emōj letok n̄an laļ in ilo an ļapļo̧k im kajoorļo̧k, kōn menin ej kajedeed ilo an aujiidi kōj kōn katak ko rebōd. Kōkm̧anm̧an wōt jān jāan kō rebōd, kōnke ejjeļo̧k juon men komaron̄ wiaki kake ak kwonaaj inepata, buromōj im mej ilo jetōb.”¹

Kilen lo̧mo̧o̧r eo em̧m̧antata n̄an jumae ad tin po jān aujiid an Setan im erom juon eo elukkuun jeļā kōn m̧ool ko an gospel in. Ilo an ļapļo̧k ad jeļā m̧ool eo, epidodo lo̧k ad kile okoktak ko an n̄e Setan ej kwalo̧k n̄an kōj aujiid ko an. Bwe n̄e ej kōm̧m̧ane, jej aikuj kalimjōk okoktak ko im men ko āinwōt juon, āinwōt en̄jake eo aō kōn taļa ko, kōnke men eo ņe ekkā an waļo̧k riab ie.

Būreejtōn Ezra Taft Benson (1899–1994) eaar katakin: “Bok in Mormon ej kwaļo̧k kōn rikōjrat ro an Kraist. … Anij, kōn jeļā eo an kōn ta im̧aan me ejjeļo̧k jemļo̧kin, ekar ejaake Bok in Mormon ilo wāween in bwe jen maron̄ im loi likjab im jeļā wāween n̄an jum̧ae katak ko rebōd, ikkijeen kien, kabun̄, im tōmak ko an rimālōtlōt make ilo raan kein.”²

Rainin jej pād ilo juon tariņae ņae Setan. Kōm, āinwōt jet ritariņae, jej aikuj jeļā ta eo ri kōjrat eo ekōņaan kōm̧m̧ane. Jeļā n̄aat im ia rikōjrat eo enaaj kakkure, n̄an waanjon̄ak, emaron̄ meļeļe ko reaorōk. Unin an naan in ebbōk meļeļe kar ņa etan “kakobaik jeļāļo̧kjeņ.” N̄an jeļā kōn rikōjrat eo ad jej aikuj mālōtlōt ļo̧k jāne. Bok in Mormon emaron̄ jipan̄ kōj “kobaik jeļāļo̧kjeņ” ikkijeen wāween an Setan aujiid.

Kōnono Etao ej bar Riab

Aeet jimatten in rūriab ro ilo Bok in Mormon rej kōnono etao im m̧wil ko rekōļapļap n̄an tōpar kōttōpar ko aer. N̄an waanjon̄ak, Sherem “eaar wōr an kanooj jeļā kajin eo an armej ro; kōn menin, emaron̄ kōjerbal eļāp naan in etao, im eļap kajoor in kōnono, ekkar n̄an kajoor eo an devil” (Jekab 7:4). Pris nana ro an Kiin̄ Noa raar kōnono “naan ko re waan im re riab” (Mosaia 11:7), kōn menin ekōm̧m̧an bwe armej ro ren kabun̄ n̄an ekjab im kōm̧m̧ani men ko jet renana. Korihor eaar tōpar ejja tōprak in wōt ilo tōre ko an, “tōlļo̧k buruōn elōn̄” (Alma 30:18). Amalikaia im Kadiantōn rej jimor kōjerbal maron̄ ko aer n̄an m̧oņe armej n̄an ejaak jar in tariņae (lale Alma 46:10; Hilamōn 2:4).

Ejjab jide menin. Etao ejjeļo̧k meļeļein, ejjab pedped ioon m̧ool, im ekaļapļap. Nipai eaar kakkōl ro me “renaaj katakin ilo wāween in, katak ko rebōd im pata im rebwebwe, im renaaj kōmjāje ilo burueer, im naaj kappukōt n̄an noji pepe ko aer jān Irooj; im jerbal ko aer renaaj ilo marok” (2 Nipai 28:9).

Etao ekkā wōt kōjerbale n̄an m̧oņ; ekkā an wōr un ko rettino ak pepe ko rettino. Etao ej kōļapļap ilo naan, im lelōn̄tak wōjwaan im utiej bōro an armej ilo lukkuun piktokier. Rikanaan ro an Irooj, men̄e, rej ba n̄an kōj m̧ool ko repidodo im aorōk me jej aikuj ron̄jaki.

Etao ej kajin eo an Setan im ej kōjerbale. Būreejtōn James E. Faust (1920-2007), Rikakpilōklōk eo Kein Karuo ilo Būreejtōnji eo Kein Kajuon, eaar kōmeļeļeik: “Ainikien [Setan] ekkā am ron̄ āinwōt eļap tokjen im enaan eo an epidodo n̄an tōmake. Ainikien ej juon ainikien em̧m̧an im kaitoktok limo kōn tōņ ekamōņōņō. Ejjab koļap im ejjab nana. Ejjeļo̧k juon emaron̄ ron̄jake ainikien Setan eļan̄n̄e enkar koļap ak nana.”³

N̄e laļ in ej letok n̄an kōj juon ļōmņak, tōmak an armej make, ak jeļā me ilo ad lale ļo̧k ej kōļapļo̧k en̄jake ko ad kōn wōjwaan ak utiej bōro. Watōki ļōmņak kein āinwōt men riab. Keidi ņae m̧ool ko me kar katakin kōj kaki jān rikanaan ro an Irooj. Lale oktak ko, ejjab men ko rej āinwōt juon, im ļōmņak ko re riab renaaj alikkar.

Nehor—juon Ririab eo Ebun̄bun̄

Nehor eaar ļap an kōjerbal wāween etao ko an Setan. Jen etaļe e āinwōt juon waanjon̄ak n̄an ekkatak kōn jetōb ko re riab. Nehor, eo me katak ko an ilo kalimjōklo̧k ej kautiej ļōmņak in kōn juon Ripinmuur, eaar juon rikwaļo̧k eo ebun̄bun̄ im ekōļapļap ilubwiljin ri Nipaii ro. Nehor eaar kareel elōn̄ rūkaļooran ilo an katakin bwe “aolep armej renaaj bōk lo̧mo̧r ilo raan eo āliktata” im “bōk mour indeeo” (Alma 1:4).

Jej ke loe ijin etke enaan eo an Nehor ekar maron̄ kareel elōn̄? Eaar katakin bwe Anij ej juon Anij eo ej pād bajjōk im jej an kōttōpar—juon Anij eo me, kōnke Ej iakwe aolep, enaaj lo̧mo̧ren aolep, jekdoon ta. Eaar bar katakin bwe komaron̄ anemkwōj n̄an kōm̧m̧ane ta eo kokōņaan. Ej juon karelel in tōmak an armej make me elōn̄ armej ro an Nehor raar mour kaki (lale Alma 1:5) āinwōt an bar lōn̄ rainin. Ejjeļo̧k wōņāān deļo̧n̄e lan̄ ej juon men eo me armej rekōņaan.

Kōn menin ta jorrāān eo ilo enaan eo an Nehor? Jen mōk lale unleplep in aitwerōk in an:

Anij ekar kōm̧anm̧an aolep armej—m̧ool.
Anij ej iakwe aolep armej—m̧ool.
Jejjab aikuj in mijak Anij—m̧ool.
Jej aikuj lan̄lōn̄ kōn ļōmņak in kōn lo̧mo̧r—m̧ool.

Aolepāer, reiten aolep āinwōt juon ikōtaan ta eo Nehor eaar katakin im m̧ool ko an gospel. Ak kememej—ej āinwōt riab in jāān, jej aikuj lukkuun lale n̄an jeļā oktakin, ejjab āinwōt juon. Jen mōk lale un eo an Nehor āliktata:

Anij enaaj letok n̄an aolep mour indeeo—riab!

Kiiō er kein jet iaan oktak ko raorōk me ej kwaļo̧k ke Nehor ej juon riaujiid ilo mour in jetōb. Lo̧mo̧r jān mej an ānbwin ej n̄an aolep ejjeļo̧k kajjitōk, ak lo̧mo̧o̧r jān mej ilo jetōb ej pedped ioon ad kōņaan n̄an ukwelo̧k. Eļan̄n̄e jej ukwelo̧k, innām jej bōk mour indeeo (lale Jekab 6:11). Ak mour indeeo ejjab n̄an aolep.

Gideon im Alma raar kile riaujiid ro

Naan ko an Nehor ekar waļo̧k ilo raan eo eaar ioone Gideon, juon rūkaki eo etiljek ilo Kabun̄ eo an Anij. Gideon eaar jutak im̧aan mejān Kiin̄ Noa elōn̄ iiō mokta innām ekar imminene im jeļā kōn riaujiid ilo jetōb (lale Mosaia 19:4-8). Nehor “eaar jino kanooj akwāāl ippān, bwe en maron̄ tōlļo̧k armej ro ilo kabun̄ eo; a ļeo eaar maron̄ jutak ņae, im kauweik e kōn naan ko an Anij” (Alma 1:7). Gideon eaar kile Nehor āinwōt riaujiid ilo jetōb. Ke ej lukkuun waļo̧k, Nehor eaar oktak n̄an bar juon wāween Setan—mōōrō. Ak mej eo an Gideon eaar wōr tokjen. Armej ro raar bōkļo̧k riaujiid eo Nehor im̧aan mejān Alma bwe en ekajete.

Alma eaar jab lo wōt ruōn Nehor āinwōt juon priestcraft im mōōrō ak barāinwōt n̄e en kar kajejete kakien eo, priestcraft ro ilubwilijin armej rein “renaaj kar kam̧ool kakkure eo aer” (Alma 1:12). Kōn menin raar liakeļo̧k n̄an mej, im eaar en̄taan “juon mej ekajookok” (Alma 1:15).

Gideon im Alma raar jet waanjon̄ak n̄an kōj. N̄e jetōb ej pād ippād, jenaaj loe im ron̄ “men ko āinwōt aer lukkuun waļo̧k” (Jekab 4:13). Jenaaj kile karōk im jon̄ak ko reriab an Setan “kōn juon jeļā eweppān, āinwōt ranleplep jān bon̄ nijōk” (Moronai 7:15).

Ad Rikōjrat eo me ej “aujiid” emālōtlōt, ak āinwōt Gideon im Alma, jemaron̄ mālōtlōt ļo̧k jān e. Āinwōt aō jino kile okoktak ko ikōtaan taļa ko aō, jemaron̄ kamineneik mejād barāinwōt ļōmņak ko ad im jetōb n̄an kile oktak ko ikōtaan m̧ool im riab. Ilo ad kōm̧m̧ane, jenaaj kile riaujiid ro im anjo jān riab ko aer.