E ej Bisop eo?
Rijeje eo ej jokwe ilo Illinois, USA.
Kōnke ikar jab niknik ilo aō itok im jar elōn̄ iiō ko, juon membōr eo ejeļā kajjeeō ekar jab tōmak ke ikar bōk juon kūr n̄an erom juon bisop.
Kōmeļeļe jān Mark Smith © 2016
Ilo juon iien kweilo̧k an kamitii eo an priesthood eo, mijenede ro am rekar letok ilo ripoot etan juon membōr ejjeļo̧k an reko̧o̧t ilo ward eo. Ekar mōkaj aō kile et eo im kwaļo̧k bwe kōm̧ro kar pād ilo ejja ward eo wōt elōn̄ iiō ko remo̧o̧tļo̧k.
Juon iaan mijenede ro ekar ba, “Bisop, liin ekar ba ejja men ņe wōt im ekar bwilōn̄ ke kwoj juon bisop.”
Ikar kajjitōk ippāer, “Ta eo liin eaar ba?”
Rekar ba bwe ekar lukkuun bwilōn̄ im ba, “E ej bisop eo?”
Ikar ettōn̄ im kōmeļeļeiki bwe sister in ekar jeļā kajjeeō āinwōt juon armej ekar oktak 30 iiō ko remo̧o̧tļo̧k.
Ke ikar kōļmenļo̧kjeņ kōn wāween in tokālik, ikar ļōmņak kōn jon̄an an mour e aō kar oktak elōn̄ļo̧k jān jiln̄uuļ iiō ko rem̧ootļo̧k in an baam̧le eō aō im n̄a erom membōr ro. Ikar jeļā kajjeen elōn̄ membōr ro jān ward in ium̧win 20 iiō ko im rekar jerbal āinwōt branch būreejtōn im āinwōt bisop, ak ejjeļo̧k iaan membōr rein rekar jeļā kajjeeō 30 iiō ko rej m̧ootļo̧k. Men̄e ekkā aō kwaļo̧k wāween ko jān tōre ko ļo̧k n̄an katakin ukeļo̧k im Pinmuur eo an Jisōs Kraist, elōn̄ iaan ward ko rejjab jeļā ta men eo ekabwilōn̄lōn̄ ilo kar iaļ in ito itak in aō ilo mour in aō ilo Kabun̄ in.
Baam̧le eo aō im n̄a kōm kar jeļā kōn Kabun̄ in ilo Māe 1979, im ekar m̧ōkaj aō jeļā ke ijo in iakuj pād ie. Kōm̧ ar peptaij ilo Juun, im ilo jinoin kōm̧ ar nikinik ilo am itok im jar, ak ekar jab to jān iien eo ikar bōjrak aō itok im jar im kar bar jepļaakļo̧k n̄an imminene ko aō m̧okta. Ejjan̄in kar lōn̄ jabdewōt pere ippa kōn m̧ool ko an gospel in im Jepļaaktok eo, ak ikar jab ļōmņak bwe ekar wōr ippa ta eo ij aikuj bōke bwe in erom juon membōr an Kabun̄ in.
Ilo 1982, kōnke ekar jab bōjrak aō ekkadōkdōk, kōrā eo pālleō, eo ekar jab likjab ilo tōmak eo an, kar kōm̧m̧ane juon peba in jepel. Ilo tōre in baam̧le eo aō rekar jokwe ilo Oklahoma, USA, ak ikar jepļaakļo̧k n̄an Illinois, USA, ijo ikar rūttoļo̧k ie. Ikar tōpar ijo me ikar tōn luuji men eo me emake wōt lukkuun aorōk n̄an n̄a: baam̧le eo aō.
Ikar jino jar im bukwelōlō ilo jibbon̄ im jota n̄an juon Anij eo ikar jab lukkuun jeļā ke emour ak, eļan̄n̄e emour, ikar loe bwe Ekar meļo̧kļo̧k n̄a elōn̄ iiō ko remootļo̧k. Ium̧win jilu allōn̄ ko, ikar lukkuun jar. Ilo juon jibbon̄, ke ikar leļo̧k būruō ilo jar, juon en̄jake eļap in rōļo̧k ekar itok ioō im ikar jeļā bwe Anij ej mour, bwe Ekar jeļā kajjeeō, im bwe Ekar iakwe eō. Ikar barāinwōt jeļā ij jāmin bar nemak bar juon pilil in dān in kadōk.
Joten eo kōrā eo ippa ekar kūr tok eō ilo taļboon kōjjeļļāik n̄a bwe enaaj jilkintok ilo mail peba in jepel ko bwe in sign. Ilo am̧ro bwebwenato ekar ba, “Ewōr juon men elukkuun oktak ippam̧. Ij jab tōmak ke kwoj jāmin bar idaak dān in kadōk, im kiiō ij iten kekōl peba ke.” Kōm̧ kar bar koba ippān doon, im ruo iiō tokālik ekar kōļotak e ļaddik eo kein kajilu nejimro.
Juon armej emaron̄ errā bwe ikar jepļaaktok n̄an aolepān m̧akūtkūt ko ilo Kabun̄ in, ak ikar juon em̧m̧aan epen jerbal ippān. Ikar jepļaaktok im kar bōk juon kūr āinwōt juon rūkaki an doulul eo an em̧m̧aan ro. Ak ekar jab to jān iien eo ekar jab em̧m̧an aō en̄jake im bar juon alen iaar janiknik im jab itok im jar.
Ilo 1991, kōm̧ kar em̧m̧akūt tok n̄an juon branch jidikdik. Jejjo allōn̄ ko m̧okta jān raan in keemem eo an ļaddik eo ediktata nejimro, kōrā eo pāleeō, Būraimere būreejtōn eo, rekar kajjitōk ippān wōn eo ekōņaan bwe en peptaiji. Aaet, ekar kōņaan bwe jemān en kōm̧m̧ane kain̄i eo. Kōrā eo pālleō ekar ba bwe bōlen eban tōprak kōttōbar eo. Ekar jab kōņaan uwaak eo im kar jino kōm̧m̧ane jerbal in kōro̧o̧ltok ļeo jemān. Ekar kōttare, im ekar jab etto, ikar lo aō make jerbal āinwōt juon Scoutmaster, im tokālik kar peptaij im kapene ļaddik eo nejū.
Ālkin allōn̄ ko ralitōk ālkin aō bar ro̧o̧ltok n̄an m̧akūtkūt ko an kabun̄ in. Kōm̧ kar liāp ippān doon āinwōt juon baam̧le ilo Chicago Illinois Temple, im ikar kūr n̄an jerbal āinwōt juon rūkaki ilo doulul eo an em̧m̧aan ro, im iien eo wōt ikar jab bōjrak. Innām kar kūr eō āinwōt juon rikakpilōklōk ilo branch būreejtōnji eo, im ļalem allōn̄ tokālik ikar kūr n̄an erom juon branch būreejtōn. Juon allōn̄ ālkin aō kar kūr, Ij keememej, “N̄a branch būreejtōn eo?”
Ikar jiron̄ ļo̧k elōn̄ Armej ro Rekwojarjar rej en̄taan ium̧win elōn̄ iiō ko bwe eļan̄n̄e imaron̄ eddōkļo̧k ilo gospel in, jabdewōt remaron̄. Aorōk eo ej meļeļe kajoor eo em̧ool an Rilo̧mo̧o̧r eo im Pinmuur eo An im bōk bun̄tōn ko n̄an itok n̄an E.
Inaaj indeeo kam̧m̧oolol kōrā eo pāleeō im ajri ro nejū im aolep rūkaki in loļo̧k m̧ōko ro retiljek, ritōl ro an doulul eo an em̧m̧aan ro, bisop ro, im Armej ro jet Rekwojarjar, ro rekar kōm̧m̧ane juon waanjon̄ok ekabwilōn̄lōn̄ n̄an n̄a. Ekar juon menin jeraam̧m̧an n̄an jerbal n̄an Irooj im Armej ro Rekwojarjar ium̧win iiō ko 20 rej jem̧ļo̧kļo̧k. Mour eo aō ekar jeraam̧m̧an ilōn̄in jabdewōt men ikar kōļmenļo̧kjeņ kaki.