Aaet Men̄e KOJJOKOOK

Jān Elder José A. Teixeira

Jān Jimjuonn̄oul eo

Lōke Irooj, im Enaaj kōjeraam̧m̧an eok ilo am̧ kijejeto n̄an kwaļo̧k gospel eo.

Ke iaar juon mijen būreejtōn ilo Brazil, iaar intōrpiuki jet elder. Iaar kajjitōkin juon bwe en kwaļo̧k jidik kōn e?”

Ekar ba, “Ilukkuun ejjokook.” Eaar inepata kōn an jook kamōjņoik an jerbal.

Iaar kajjitōk, “Kwoj lōmņak Irooj emaron̄ ke jipan̄ eok bwe kwon juon mijinede em̧m̧an?”

“Ij tōmak Irooj emaron̄ kōm̧m̧an jabdewōt men.”

“Ekwe kōtļo̧k bwe en jipan̄ eok. Kwoj ļōmņak komaron̄ ke kōm̧m̧ane?”

“Imaron̄,” eaar ba.

Ij aikuj kwaļo̧k m̧ool bwe ke ej m̧ootļo̧k, iaar ļōmņak, “Ekwe, kōjatdikdik enaaj em̧m̧an.”

Ālkin jet wiik tokālik im eaar jab to ejja mijinede ro wōt iaar intōrpiuk er raar bar intōrpiu. Ilo tōre eo elder eo m̧ōttan elder eo ejokook eaar ba, “Būreejtōn, ijaje ta eo kwar ba n̄an e, ak aeet elōn̄ oktak. Ejino em̧m̧an ļo̧k an kōnono ippān armej.” Im kōn menin iaar kijoror in bar kōnono ippān.

Ke ej deļo̧n̄e tok office eo aō, eaar reilaļļo̧k im kalimjōk neen.

“Ewōr jet naan emman,” eaar ba. “Ij ejokook wōt, ak iaar kajjitōk bwe Irooj en jipan̄ eō. Innām iaar kōpeļļo̧k lon̄iū im iaar jino aō ekōnono. Im kojeļā ta? Ij kōm̧m̧ane aolep iien kiiō. Ijjab kememej ta ko ij ba. Men eo ekabwilōn̄lōn̄ in ej bwe em̧m̧an ippān armej. Rej en̄jake Jetōb. Rej errā ippa im ta ko ikar ba n̄an er.”

Eaar lokjenaō ke ij lo wāween an mijinede in kar oktak ke ej likūt an lōke ilo Irooj. Eaar erom juon kein jerbal em̧m̧an n̄an boktok m̧ōņōņō n̄an elōn̄ armej.

Eļļā jān Mijak

N̄e jej kwaļo̧k gospel eo, jet iien jej en̄jake ad ikūmkūm. Ak ilo an mijinede in ejokook kam̧oole, Irooj enaaj tōl kōj eļan̄n̄e jej likūt ad lōke ilo E. Jetōb Kwojarjar enaaj jipan̄ kōj jeļā ta eo jen ba (lale 2 Nipai 32:2-3), im n̄e armej rej en̄jake jetōb, ekkā aer oktak n̄an em̧m̧anļo̧k eo. Elōn̄ rej itok limo kōn ta kein jej tōmaki im kōņaan jeļā eļapļo̧k.

Eļap Lan̄lōn̄

Ewōr aō naan in kam̧ool bwe Jemedwōj Ilan̄ enaaj tōl kōj ilo ad kijejeto n̄an kwaļo̧k gospel eo, im ilo ad kōm̧m̧ane jenaaj en̄jake eļap lan̄lōn̄. Ilo m̧ool, lan̄lōn̄ in enaaj pād ippād ejjab kiiō wōt ak barāinwōt ilo mour eo ej itok. (Lale K&B 18:16.) Juon un eo em̧m̧an bwe kwon kōm̧m̧ane men ko kojjan̄in kar kōm̧m̧ani, men̄e kojokook.

Jilu kain Mijak komaron̄ Anjo jāni

Ijeļo̧kin am̧ ejjokook, ijeļā jilu kain mijak ko me rekōm̧m̧an bwe jet iaad ren ba, “Imijak bwe eļan̄n̄e ij kōnnaan kōn gospel eo, inaaj luuji ro mōtta.” Kam̧olool bwe, kōn tōmak, mijak kane renaaj jako.

1. Ejabwe jeļā e aō.

   Eļan̄n̄e ejabwe am̧ jeļā kōn gospel eo, mijinede ro remaron̄ jipan̄ eok. Remaron̄ katakin kōj enaan eo kōn Jepļaaktok eo, jipan̄ kōkajoorļo̧k tōmak ko ad ilo Irooj Jisōs Kraist, im jipan̄ kōj meļeļe kōn ukwelo̧k im wāween mour kaki im etke peptaij im menin letok eo an Jetōb Kwojarjar relukkuun aorōk. Bar juon iaar kein jipan̄ eo em̧m̧an ej Preach My Gospel. Ikōņaan rōjan̄ aolep rūm̧m̧an ded ro bwe en wōr juon ami kape n̄an kōm̧m̧an bwe en m̧ōttan ļo̧k kein katak ko ippān jeje ko rekwojarjar.

2. Ijjan̄in kar kōm̧m̧ane menin mokta.

   Eļan̄n̄e ejjeļo̧k am̧ iminene, kamminene ippān mijinede ro! Remaron̄ jipan̄ eok jeļā ta eo kwon ba ak ta eo kwon jab ba iien ko rejjejet. Ilo am̧ joļo̧k iien ko am̧ ippān mijinede ro, kwonaaj en̄jake iakwe eo aer kōn gospel in im n̄an ro mōttāer. Reperan n̄an kwaļo̧k gospel eo; remaron̄ jipan̄ eok kōm̧m̧ane āindein.

3. Imijak in kwaļo̧k.

   N̄e jej kwaļo̧k naan in kam̧ool ko ad, jej jipan̄ ro mōttad lo men ko raorōk, im jino aer kautiej kōj im iakwe kōj ilo juon meram eo ejeņoļo̧k. Menin ej waļo̧k enan̄in aolep iien. Elōn̄ rūmm̧an ded ro rej ba, “Iaar lukkun mimjakjak, ak n̄e ij kōnono ilo m̧ool, ro m̧ōtta rejino aer lōke eō im kajjitōk elōn̄ kajjitōk ko.” Jejjab aikuj mijak in kwaļo̧k ta eo jejeļā. Elukkun aorōk kōnke ej itok jān Anij. Im ta wāween eo em̧m̧anļo̧k n̄an kwaļo̧k iakwe eo ad n̄an ro m̧ōttad jān ad kwaļo̧k n̄an er ta eo em̧ool?