Ennaan eo an Būreejtōnji eo Kein Kajuon
Kanaan ko im Revelesōn ko an Juon Make
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Kabun̄ eo an Jisōs Kraist em̧ool emōj an jepļaaktok im ej pād ioon laļ in rainin. Kabun̄ eo an Jisōs Kraist im Armej ro Rekwōjarjar ilo Raan-ko Āliktata ekar aolep iien tōl jān rikanaan ro im rijjilōk ro remour, ro rej bōk tōl jān lan̄.
Jon̄ok eo ekwojarjar ekar barāinwōt m̧ool ilo tōre ko etto. Jej katak ilo Baibōļ eo: “Ilo m̧ool Irooj Jeova e jab kōm̧m̧an jabdewōt n̄e ab Ej kwaļo̧k pepe eo An n̄an ro ri karijeran, rikanaan ro” (Amos 3:7).
Anij eaar bar kōnono ilo tōre kein ad, jān Rikanaan Josep Smith. Ekar kwaļo̧k n̄an Rikanaan Josep kōn gospel eo an Jisōs Kraist ilo tarlep in. Ekar kōjepļaaktok priesthood eo ekwojarjar ippān kii ko im aolep jim̧we, kajoor, im jerbal ko an kajoor eo ekwojarjar an priesthood eo.
Ilo raan kein ad, rikanaan ro im rijjilōk ro remour emōj kōmālim er n̄an kōnono, katakin, im tōl kōn mālim eo jān Anij Jemed im Irooj Jisōs Kraist. Rilo̧mo̧o̧r eo ekar ba n̄an Rikanaan ro, “Ta eo N̄a Irooj ar ba, I ar ba, im Ijjab jekpen n̄an Eō make; im men̄e lan̄ ko im laļ rej jako, Aō naan ej jamin naaj jako, ak enaaj aolep kūrm̧ool, mekarta jān Ainikiō make ak jān ainikien ro rikarejera, ej āinwōt juon.” (K&B 1:38).
Ilo kweilo̧k eo eļap ruo kōttan juon iiō, jej jeraam̧m̧an kōn iien em̧m̧an n̄an ron̄jake naan eo an Irooj n̄an kōj jān ro rikarejeran. Menin ej juon jeraam̧m̧an eļapļo̧k jān juon wōņāān. Ak aorōk eo an iien em̧m̧an in ej pedped wōt ioon ad ron̄jake naan ko ium̧win kareel eo an ejja Jetōb in wōt eo kar leļo̧k n̄an er jān ro rikarejeran (lale K&B 50:19–22). Āinwōt aer bōk tōl jān lan̄, ej aikuj barāinwōt kōj. Im men in emennin aikuj n̄an kōj ejja kain kijejeto in.
“Kōm̧m̧ane Homework eo Am̧”
Iiō ko ļo̧k, juon iaan membōr in Doulul eo an Rijjilōk ro Jon̄oulruo ekar kajjitōk ippa bwe in riiti juon kōnono jān kweilo̧k eo eļap ekar kōpooje n̄an kweilo̧k eo eļap. Ikar juon membōr edik ilo doulul eo. Ikar utiej kōn leke eo an bwe in maron̄ jipan̄ e pukōt naan ko Irooj ekōņaan bwe en kōnono kaki. Ekar jiron̄ tok eō im ettōn̄ dikdik, “O, en̄in ej kein 22nd aō je kōnono in.”
Ikar keememej kapilōk eo ejouj im iakwe an Būreejtōn Harold B. Lee (1899–1973) kar letok n̄an n̄a m̧oktaļo̧k kōn naan in eaorōk: “Hal, eļan̄n̄e kwokōņaan bōk revelesōn, kwōn kōm̧m̧ane homework eo am̧.”
Ikar riit, kejōkļo̧kjeņ, im jar kōn kōnono eo aō ikar je 22 kōttan. Ikar katak jon̄an wōt aō maron̄ ium̧win tōl eo an Jetōb Kwojarjar. Ilo tōre eo in uwaan doulul eo ekar kwaļo̧k kōnono eo an, ikar kōm̧m̧ane homework eo aō. Ijjab lukkuun jeļā eļan̄n̄e ikar jipan̄, ak ijeļā ke ikar oktak ke ikar ron̄jake kōnono eo. Ennaan ko rekar itok n̄an n̄a reļļap jān naan ko me ikar riiti im me ekar kōnono jāni. Naan ko ekar ļapļo̧k meļeļe ko aer jān ko ikar riiti jān kōnono eo ekar kōpooje. Im ennaan eo ekar iook tok eō, jejjet n̄an aikuj ko aō.
Rikarejer ro an Anij rej jitlo̧k im jar bwe ren bōk ennaan ko Ekōņaan liļo̧k n̄an er bwe ren maron̄ liļo̧k n̄an ro rej aikuji revelesōn im im̧we kein. Ta eo ikar katak jān en̄jake in, im elōn̄ āinļo̧k wōt in, ej bwe bōk jeraam̧m̧an eļap jān ad ron̄jake rikanaan ro im rijjilōk ro remour, ej jān ad aikuj joļo̧k iien ko ad make n̄an bōk revelesōn eo.
Irooj ej iakwe aolep armej ro remaron̄ ron̄jake ennaan eo An, im E ejeļā būruōn im jekjek ko an kajjojo. E ejeļā ta eo ejim̧we, ta naan in ron̄jake eo, im ta eo em̧ool ilo gospel in im enaaj jipan̄ kajjojo bwe ren kālet wāween eo an ilo iaļ in n̄an mour indeeo.
Kōj ro rej ron̄jake im alooje ennaan ko an kweilo̧k eo eļap, jet iien tokālik jej ļōmņak, “Ta eo em̧m̧an aō keememej e?” Kōjatdikdik eo an Irooj n̄an kōj aolep ej bwe uwaak ko renaaj āinwōt in: “Ij jāmin meļo̧kļo̧k iien ko rem̧m̧an ke ikar en̄jake ainikien Jetōb eo ilo ļōmņak eo aō im būruwō ej jiron̄ eō ta eo imaron̄ in kōm̧m̧ane n̄an nōbar Jemedwōj Ilan̄ im Rilo̧mo̧o̧r eo.”
Jemaron̄ bōk revelesōn ko ad make n̄e jej ron̄jake rikanaan ro im rijjilōk ro im ilo ad jerbal ilo tōmak n̄an bōk e, āinwōt Būreejtōn Lee ekar ba jemaron̄. Ijeļā bwe ej m̧ool jān en̄jake im jān kam̧ool eo an Jetōb eo.