Edhe Nëse Je i Ndrojtur

Nga Plaku Zhozé A. Teisheira,

i Të Shtatëdhjetëve

Mirëbesojini Perëndisë, dhe Ai do t’ju bekojë në përpjekjet tuaja për ta ndarë ungjillin.

Kur isha president i ri misioni në Brazil, po intervistoja disa pleq. I kërkova njërit të më tregonte rreth vetes.

“Jam shumë i ndrojtur”, tha ai. Ai u shqetësua se ndrojtja e tij po e pengonte atë që të ishte i aftë për të shërbyer.

Unë e pyeta: “A mendon se Zoti mund të të ndihmojë gjithsesi që të jesh një misionar i mirë?”

“Unë besoj se Zoti mund të bëjë çdo gjë.”

“Atëherë lëre Atë të të ndihmojë. A mendon se mund ta bësh këtë?”

“Unë mundem”, tha ai.

Më duhet të rrëfej që, ndërsa ai u largua, unë mendova: “Epo, shpresoj të funksionojë”.

Javët kaluan dhe shpejt të njëjtët misionarë erdhën për intervista përsëri. Kësaj here shoku i plakut të ndrojtur tha: “President, unë nuk e di çfarë i thatë atij, por me siguri bëri një ndryshim. Ai është bërë shumë i zoti për të folur me njerëzit”. Dhe kështu unë po prisja me padurim të takohesha me të përsëri.

Kur erdhi në zyrën time, ai uli kokën.

“Kam disa lajme të mira”, tha ai. “Jam ende i ndrojtur, por i kërkova Zotit të më ndihmonte. Pastaj hapa gojën dhe fillova të flas. Dhe a e dini çfarë? E bëj gjatë gjithë kohës tani. Madje nuk mbaj mend se çfarë them. Gjëja e pabesueshme është se njerëzve u pëlqen. Ata e ndiejnë Shpirtin. Ata janë dakord me mua dhe me atë çfarë kam për t’ju treguar.”

U mahnita kur pashë se si ky misionar ishte shndërruar kur vendosi mirëbesimin e tij te Zoti. Ai u bë një mjet i madh në sjelljen e lumturisë te shumë njerëz.

Mposhtja e Frikës

Kur e ndajmë ungjillin, nganjëherë ndihemi në siklet. Por ashtu si ky misionar i ndrojtur e tregoi në praktikë, Zoti do të na udhërrëfejë nëse ne i mirëbesojmë Atij. Fryma e Shenjtë do të na ndihmojë të dimë se çfarë të themi (shih 2 Nefi 32:2–3) dhe, kur njerëzit e ndiejnë Shpirtin, ata shpesh përgjigjen në një mënyrë pozitive. Shumë njerëzve u ngjallet kureshtja nga ajo që ne besojmë, dhe dëshirojnë të dinë më shumë.

Gëzim i Madh

Kam një dëshmi se Ati Qiellor do të na udhërrëfejë në përpjekjet tona për ta ndarë ungjillin dhe, në atë proces, ne do të ndiejmë gëzim të madh. Në fakt, ai gëzim do të jetë me ne jo vetëm tani por gjithashtu në botën që do të vijë. (Shih DeB 18:16.) Kjo është një arsye e mirë për të dalë nga zona juaj e rehatisë dhe për të bërë diçka, edhe nëse jeni i ndrojtur.

Tri Gjërat Frikësuese që Mund të Mposhtni

Përveç druajtjes, unë di tri gjëra të tjera frikësuese që i bëjnë disa prej nesh të thonë: “Kam frikë se, nëse flas rreth ungjillit, do t’i humbas miqtë e mi”. Sa mirë që, me besim, ato gjëra frikësuese mund të mposhten.

1. Nuk di mjaftueshëm.

   Në qoftë se ju mungon njohuria rreth ungjillit, misionarët kohëplotë mund të ndihmojnë. Ata mund të na mësojnë mesazhin e Rivendosjes, të na ndihmojnë të forcojmë besimin tonë në Zotin Jezu Krisht dhe të na ndihmojnë të kuptojmë pendimin dhe si ta vëmë atë në zbatim në jetën tonë, dhe përse pagëzimi dhe dhurata e Frymës së Shenjtë janë të rëndësishme. Një tjetër burim i shkëlqyer njohurie është manuali Predikoni Ungjillin Tim. Do ta nxitja çdo të ri dhe të re të ketë një kopje dhe ta bëjë pjesë të studimit të vet të përditshëm me shkrimet e veta të shenjta.

2. Kurrë më parë nuk e kam bërë këtë.

   Nëse ju mungon përvoja, ushtrohuni me misionarët! Ata mund t’ju ndihmojnë për të ditur çfarë të thoni ose të mos thoni në një situatë të caktuar. Ndërsa kaloni kohë me misionarët, ju do ta ndieni dashurinë që ata kanë për ungjillin dhe për bashkëqeniet e tyre. Ata kanë gjetur guximin për ta ndarë ungjillin; ata mund t’ju ndihmojnë ju të bëni të njëjtën gjë.

3. Kam frikë të jap [dëshmi].

   Kur e ndajmë dëshminë tonë, ne i ndihmojmë miqtë tanë të shohin gjëra më lartësuese dhe ata fillojnë të na respektojnë e të na duan në një anë të ndryshme. Kjo ndodh pothuajse çdo herë. Shumë njerëz të rinj thonë: “Isha i/e frikësuar, por kur fola sinqerisht, miku im filloi të më besonte dhe të bënte më shumë pyetje”. Ne nuk duhet të kemi frikë ta japim atë që kemi. Është e çmuar sepse vjen nga Perëndia. Dhe çfarë mënyre tjetër më të mirë ka për të treguar dashuri për miqtë tanë sesa të ndajmë me ta atë që e dimë se është e vërtetë?