Mga Tingog sa mga Santos sa Ulahing mga Adlaw
Pinansyal: Oatmeal, Pan, ug Humay ug Batong
Ang ngalan gipugngan, Hawaii, USA
Paghulagway pinaagi ni Stan Fellows
Ang gi-eskwelahan sa akong bana mahalon, busa kami naglaum nga makakuhag trabaho nga makatabang kanamo nga makabayad sa among mga utang. Gitanyagan kami og daghang mga posisyon apan ganahan kaayo mi bahin sa pagkapropesor didto sa Hawaii. Apan, sa dihang miabut ang kontrata, ang sweldo mas ubos kay sa among nahisgutan. Gipahibalo kami nga adunay bag-ong mga polisiya ug dili opsyon ang pakigsabut. Nakasiguro nami sa among nabati mahitungod sa bag-ong trabaho, mao nga amo gihapon nga gipirmahan ang kontrata.
Ganahan mi sa Hawaii, ang akong bana ganahan sa iyang trabaho, ug napanalanginan mi isip pamilya. Maayo ra ang tanan uban sa among pagbayad sa utang sa pag-eskwela hangtud ang kompanya sa credit card mipahibalo namo nga ang among bag-ong interest rate mahimo nang 14 porsyento imbis sa amo karon nga 3 porsyento. Nakiglalis kami nga perming untop ang among pagbayad ug naka-impas na og daghang utang. Apan ang kompanya nagmagahi.
Una, gibuhat namo ang ubang mamugnaong paagi sa paggahin og kwarta, gibalhin ang among utang sa lain-laing credit card nga walay interes. Dayon misugod kami sa pagdaginot. Kalit namong gikunhoran ang badyet sa among pagkaon, sinina, ug mga diaper alang sa among pamilya sa pito ka tawo. Nagpakabuhi mi sa among tinipigang pagkaon. Matag buntag mangaon mi og oatmeal; matag hapon mangaon mi og hinimo namo nga pan; ug matag gabii mangaon mi og humay ug batong. Walay luho sama sa mantikilya, presko nga gatas o juice. Human namo og bayad sa ikapulo ug sa nag-unang mga galastohan, tanan namong kinitaan ibayad ngadto sa among credit card.
Unom ka bulan ang milabay, among nabayaran ang 90 porsyento sa among utang! Ang Ginoo mipilo-pilo sa among kinitaan sa milagrosong paagi. Naimpas namo dayon ang nahibilin nga utang, ug mapasalamaton kaayo kami. Ang akong anak nga babaye magreklamo gihapon kon magkaon siya og oatmeal kada buntag, apan ako nasayud nga pinaagi sa pagbayad sa among ikapulo ug sa pagsunod sa propeta, kami gipanalanginan sa pinansyal ug sa temporal nga paagi.