Ilo Ad Etal im Wōnm̧aanļo̧k Ippān Doon

Jān Būreejtōn Elder Russell M. Nelson

Ro jeiū im jatū jitōn bōro, eļap aō ettā bwe imaron̄ pād ippāmi jibbon̄ in. Emān raan ko remootļo̧k ke jekar do̧o̧r laļļo̧k im kakkijeki juon em̧m̧aan kijon̄jon̄, juon rikanaan an Anij—Būreejtōn Thomas S. Monson. Ejjeļo̧k naan ko remaron̄ ekajete jon̄an dettan in im aiboojoj in mour eo an. Inaaj n̄an indeeo emmeļo̧ke jem̧jerā eo am im kam̧oolol kōn ta ko ekar katakin eō. Kiiō jej aikuj reim̧aanļo̧k n̄an ilju im jekļaj kōn juon tōmak elikio ilo Irooj Jisōs Kraist, eo me Kabun̄ in ej An.

Ruo raan ko remootļo̧k aolep Rijilōk ro remour rekar kuktok ippān doon ilo ruum̧ eo ilōn̄ in Salt Lake Temple. Ijin rekar kōm̧m̧ane juon errā in kālet, m̧oktata, n̄an bar ejaake Būreejtōnji eo Kein Kajuon kiiō im, kein karuo, bwe inej jerbal āinwōt Būreejtōn eo an Kabun̄ in. Naan ko rejabwe n̄an jiron̄ kom̧ ta kain en̄jake eo ilo an Em̧m̧aan ro Rejitōnbōro—Em̧m̧aan ro Rejitōnbōro ro rej kabwijer aolep kii ko an priesthood eo me kar kōjepļaakitok n̄an Rikanaan Josep Smith ilo epepen in—kar likūt peier ioon bōra im kapit im kōjenolo̧k eō āinwōt Būreejtōn eo an Kabun̄ in. Ekar juon en̄jake ekwojarjar im ettā.

Innām ekar erom̧ aō eddo n̄an aō maron̄ kile wōn ro Irooj ekar kōpooji bwe ren erom̧ rikakpilōklōk ro aō. Ewi wāween aō kālet ruo wōt jān Jon̄oulruo Rijilōk ro jet, er kajjojo ij lukkuun iakwe er? Eļap aō kam̧oolol Irooj kōn uwaak in jar ko aō rem̧m̧an. Eļap aō kam̧m̧oolol bwe Būreejtōn Dallin Harris Oaks im Būreejtōn Henry Bennion Eyring rej m̧ōņōņō in jerbal ippa āinwōt Rikakpilōklōk ro Kein Kajuon im Kein Karuo, kajjojo. Būreejtōn Dieter F. Uchtdorf ekar bar juon alen pād ilo Doulul eo an Jon̄oulruo Rijilōk ro. Em̧ōj an bōk jerbal ko reļļap me e eļap an karbab n̄an jerbal.

Ij kwaļo̧k aō kautiej e im n̄an Būreejtōn Eyring kōn jerbal ko aer rem̧m̧an āinwōt rikakpilōklōk ro n̄an Būreejtōn Monson. Rekar lukkuun ekkeke n̄an jerbal, wūjlepļo̧k, im im̧we. Jej lukkuun kam̧oolol er. Erro kajjojo rej m̧ōņōņō in jerbal kiiō ilo jikin ko elukkuun ļap aikuji er ie.

Āinwōt Rijilōk eo kein karuo to tata an jerbal ilo doulul in, Būreejtōn Oaks ekar erom̧ Būreejtōn eo an Doulul eo an Jon̄oulruo Rijilōk ro. Ijoke, kar leļo̧k kūr in an n̄an Būreejtōnji eo Kein Kajuon im jejjet ilo kōllaajrak ko an Kabun̄ in, Būreejtōn M. Russell Ballard, nej e tokālik to tata an jerbal ilo doulul in, enaaj jerbal āinwōt Ripenej Jenkwan (Acting) Būreejtōn an doulul in. Būreejtōnji eo Kein Kajuon enaaj jerbal ippān doon ippān Jon̄oulruo ro n̄an maron̄ kile ankilaan Irooj im kōm̧akūt m̧aanļo̧k jerbal in An ekwojarjar.

Kōmij kam̧oolol kom̧ kōn jar ko ami. Rekar ajiļo̧k ipeļaakin laļ in kōn kōm. Ilo jibbon̄ eo ālkin an Būreejtōn Monson jako, juon jar kar kōm̧m̧an jān juon ļaddik emān an iiō etan Benson. Ij kouti jidikin jān leta eo an jinen kar jilkinļo̧k n̄an kōrā eo pāleeō, Wendy. Benson ekar jar, “Jemedwōj Ilan̄, kom̧m̧ool bwe Būreejtōn Thomas S. Monson emaron̄ bar loe kōrā eo pāleen. Kom̧m̧ool kōn rikanaan eo am ekāāl. Jipan̄ e bwe en peran im jab mijak bwe e ekāāl. Jipan̄ e bwe en eddōkļo̧k im ājmour im kajoor. Jipan̄ e bwe en wōr an kajoor kōnke priesthood eo epād ippān. Im jipan̄ kōm bwe kōmin jouj aolep iien.”

Ij kam̧m̧ool Anij kōn ajri rot in im n̄an m̧am̧a im baba ro rej m̧ool kōn kallim̧ur ko aer n̄an kōkkaajriri ilo wānōk, iakwe eļap—n̄an aolep ro jinen im jemān, rūkaki, im membōr eo ej ineek eddo ko reddo im ej m̧ōņōņō wōt im jerbal. Ilo bar juon wāween, n̄an kom̧ kajjojo, eļap aō lukkuun kam̧m̧oolol.

Irooj Ej pād ilo Jōbwe eo

Ilo ad etal im wōnm̧aanļo̧k ippān doon, ij kajjitōk ippem n̄an ļōmņak kōn wāween eo em̧m̧an eo me Irooj ej kiene Kabun̄ in An kake. N̄e juon Būreejtōn an Kabun̄ in ej jako, ejjeļo̧k juon men ekabwilōn̄lōn̄ kōn wōn eo enej kūr n̄an jerbal ilo jerbal eo. Ejjeļo̧k ekkāleel, ejjeļo̧k kareleel, ak jerbal ko wōt remeļak an juon karōk ekwojarjar maron̄ ļoore, likūt ilo jikin jān Irooj Make.

Kajjojo raan ilo jerbal an juon Rijilōk ej juon raan in ekkatak im m̧aanjabpopo n̄an elōn̄ļo̧k eddo ilo jerbal in. Ebōk elōn̄ iiō in jerbal n̄an juon Rijilōk n̄an em̧m̧akūt jān jea āinwōt juon junior n̄an juon jea an senior ilo doulul in. Ilo iien in, ebōk en̄jake ko jinoin tata ilo ekkatak ilo kajjojo m̧ōttan ko an jerbal eo an Kabun̄ in. Ej barāinwōt em̧m̧anļo̧k an jeļā kajjeen armej ro ilo laļ in, ekoba bwebwenato ko aer, m̧anit ko, kajin ko āinwōt an jerbal ko an bōkļo̧k e ipeļaakin laļ in. Jerbal in ļoore in ilo ritōl an Kabun̄ in āinjuon. Ijeļā bwe ebar ejjeļo̧k āinwōt in. Menin ejjab aikuj kailbōk kōj, kōnke en̄in ej Kabun̄ eo an Irooj. Ejjab jerbal ālkin jekjek eo ej kōm̧m̧an in armej.

Ikar jerbal ilo Doulul eo an Jon̄oulruo eo ium̧win ļalem Būreejtōn ro m̧oktaļo̧k an Kabun̄ in. Ikar alooje an kajjojo Būreejtōn bōk revelesōn im uwaak n̄an revelesōn in. Irooj aolep iien ewōr im aolep iien enaaj kōmeļeļeiki im im̧we rikanaan ro An. Irooj ej pād ilo Jōbwe eo. Kōj ro rekar ekkapit n̄an kwaļo̧k kam̧ool kōn āt eo Etan ekwojarjar ipeļaakin laļ in naaj wōnm̧aanļo̧k im pukōt n̄an jeļā Ankilaan im ļoor e.

Pād wōt ilo Iaļ in Bujen eo

Kiiō, n̄an membōr ro an Kabun̄ in ij ba: Dāpij wōt iaļ in bujen eo. Ami kallim̧ur n̄an ļoor Rilo̧mo̧o̧r eo n̄an kōm̧m̧ani bujen ko Ippān innām kōjparoki bujen ko renaaj kōpeļļo̧k kōjām n̄an kajjojo jetōb in kōjeraam̧m̧an im iien ko rem̧m̧an renaaj waļo̧k n̄an em̧m̧aan ro, kōrā ro, im ajri ro aolep jikin.

Āinwōt juon Būreejtōnji eo ekāāl, jej kōņaan jino kōn ta eo jenej erom̧. Kōn un in, kōmij kōnono n̄an kom̧ rainin jān juon tampeļ. Jemļo̧k eo me kōj kajjojo jej kajjieon̄ in erom̧ ej n̄an bōk menin letok eo ekwojarjar an kōn kajoor ilo juon em̧ im̧ōn Irooj, liāp āinwōt baam̧le ko, tiljek n̄an bujen ko jekar kōm̧m̧ani ilo juon tampeļ me ej kōkarbab kōj n̄an menin letok eo eļaptata an Anij—me an mour indeeo. Kain̄i ko an tampeļ im bujen ko kwoj kōm̧m̧ane rej kii n̄an kōkajoorļo̧k mour eo am̧, m̧are eo am̧, im am̧ maron̄ n̄an jum̧ae menin kapo ko an rikōjdāt eo. Am̧ kabun̄jar ilo tampeļ eo im am̧ jerbal in jipan̄ ijeņ kōn rūtto ro jibum̧ im jim̧m̧am̧ me em̧ōj aer jako naaj kōjeraam̧m̧an eok im kōļapļo̧k revelesōn eo am̧ make im aenōm̧m̧an im naaj kakwojarjar kallim̧ur eo am̧ n̄an dim wōt ilo iaļ in bujen eo.

Kiiō, eļan̄n̄e em̧ōj am̧ etal jān iaļ in, ij karuwaineneik eo kōn aolep kōjatdikdik ilo būruwō jouj im ro̧o̧ltok. Jekdo̧o̧n kain inepata rot eo am̧, jekdo̧o̧n kain apan̄ rot, ewōr juon jikin n̄an kom̧ ilo Kabun̄ in, an Irooj. Kwe im epepen ko am̧ me rejjan̄in ļotak renaaj jeraam̧m̧an jān m̧akūtkūt ko am̧ kiiō n̄an ro̧o̧ltok n̄an iaļ in bujen eo. Jemād ilo Lan̄ ej kaorōk ajri ro Nejin, im Ekōņaan bwe kōj kajjojo ren ro̧o̧lļo̧k n̄an kapijunen eo ad Ippān. En̄in ej juon kōttōbar eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata—n̄an jipan̄ kōj kajjojo ro̧o̧lļo̧k n̄an kapijuknen eo.

Ij kwaļo̧k aō iakwe em̧wilaļ n̄an kom̧—iakwe eo me ekar eddōkļo̧k ium̧win elōn̄ iiō in kweilo̧k ippemi, kabun̄jar ippemi, im jerbal n̄an kom̧. Mālim eo ad ekwojarjar ej n̄an etal n̄an aolep laļ, bwij, lo, im armej, jipan̄ kōpooj laļ in n̄an Itok eo Kein Karuo an Irooj. Menin jenaaj kōm̧m̧ane kōn tōmak ilo Irooj Jisōs Kraist, jeļā bwe E ej tōl. En̄in ej jerbal eo An im Kabun̄ eo An. Jej An rijerbal.

Ij kwaļo̧k aō wūjlepļo̧k n̄an Anij Jemād Indeeo im n̄an Nejin, Jisōs Kraist. Ijelā Kajjiero, ij iakwe Er, im kallim̧ur n̄an jerbal n̄an Er—im kom̧—kōn aolep kitwōn mour eo aō āliktata. Ilo etan ekwojarjar Jisōs Kraist, amen.