Elmen Aō Kōkm̧anm̧anļo̧k Aō Ekkatak Jeje ko Rekwojarjar?
Sarah Keenan
Utah, USA
Kōmeļeļe jān Bradley Clark
Iaar pād ilo kapijuknen jilu allōn̄ de jān mijen eo aō ke eaar jino pen aō riiti jeje ko rekwojarjar.
Iaar riiti jeje ko rekwojarjar kajjojo raan ilo mijen eo aō im kar kallim̧ur n̄an wōnm̧aanļo̧k wōt n̄e inaaj ro̧o̧l n̄an kapijuknen. Ak ke iien ej m̧ootļo̧k, men ko raar jino bōk jikier. Iaar boub ilo jikuuļ, bar boub ilo jerbal, ak lukkuun m̧ōk. Kōn kajjojo jekpen ņae kein, riiti jeje ko aō rekwojarjar raar jino jako ļo̧k m̧ae iien eaar pen aō riiti.
Iaar kōppeļļo̧k Bok in Mormon eo juon bon̄ im kar ļōmņak in riiti baj juon eoon. Eoon eo iaar riiti eaar kakeememej n̄a bwe jeje ko rekwojarjar epād ie “naan in kam̧ōņōņō an Anij, lo, naan in kemour kinej ko an jetōb.” (Jekab 2:8).
Iaar kōļmenļo̧kjeņ kōn eoon in im kar kile jekjek eo enana ilo aō jab riiti jeje ko rekwojarjar. Iaar en̄jake eļap m̧ōk ilo jikuuļ, jowaan ilo m̧ōnjar eo, im lukkuun ettoļo̧k jān Anij. Jetōb eo aō eaar aikuj kōmour jān naan in Anij loi ilo jeje ko rekwojarjar. Iaar jeļā iaar aikuj in kāāl jibadbad ko aō.
Iaar oktaļo̧k n̄an ro m̧ōtta, baam̧le, im ritōl ro an Kabun̄ im kajjitōk jipan̄ n̄an kōkm̧anm̧anļo̧k aō ekkatak jeje ko rekwojarjar. Iaar lo jilu men ko me rejipan̄.
Juon, iaar kile bwe ekkatak jeje ko rekwojarjar ilo bon̄ eaar jab em̧m̧an n̄an n̄a. Ekkatak ilo jibbon̄ ekōm̧m̧an bwe in kejo̧kļo̧kjeņ ilo aolepān raan eo kōn katak im pedped in katak ko iaar riiti jibbon̄ōn eo.
Ruo, kar katakin kōj n̄an riiti jeje ko rekwojarjar ippān baam̧le ko ad, ak jen ke iaar pād ilo college im pād ettoļo̧k jān baam̧le eo aō, iaar jino riiti jeje ko rekwojarjar ippān roommate im ro m̧ōtta. Menin eaar jipan̄ n̄a dim, im kar ejaake juon unin kōnono ko ilo gospel in.
Jilu, iaar jino je im̧we ko im ļōmņak ko ij būki ilo iien ekkatak jeje ko rekwojarjar. Menin eaar jipan̄ n̄a pedped wōt ioon ta eo iaar riiti im kar jipan̄ n̄a em̧m̧anļo̧k aō kile ainikien Jetōb.
Ilo an bar jeje ko rekwojarjar bar jino aorōk ilo mour eo aō, iaar lo bwe ewōr wōt iien im kajoor n̄an kadedeļo̧k aolep men ij aikuji bwe ren dedeļo̧k. Men eo eaorōktata, iaar en̄jake epaakeļo̧k bar Anij ilo aō riit im kōļmenļo̧kjen kōn jeje ko rekwojarjar. Kiiō n̄e ij joļo̧k aō iien ilo jeje ko rekwojarjar, ij en̄jake aenōm̧m̧an im lo kōmour n̄an jetōb eo aō.