Jeļāļo̧k kōn Rilo̧mo̧o̧r eo
Rijeje eo ej jokwe ilo Utah, USA.
Ilo am̧ katak kōn Jisōs Kraist, kwoj karuwaineneik aenōm̧m̧an im piktok eo An n̄an mour eo am̧.
Dipdik in jān Where Are the Nine, jān Liz Lemon Swindle
Ļōmņak am̧ riiti aolep men ko kōn Rilo̧mo̧o̧r eo ilo jeje ko rekwojarjar—Baibōļ Kwojarjar eo, Bok in Mormon, Katak im Bujen ko, Bōōr eo Eļap Wōņāān. Kōnono kōn elōn̄ alen im jerbal men ko emenin aikuj! Bōtaab ilo Jānwōde 2017, Būreejtōn Russell M. Nelson kar letok juon idajon̄jon̄ n̄an kōm̧m̧an men jab in—n̄an ekkatak aolep men ko me Jisōs eaar ba im kōm̧m̧ani ilo jerbal ko rekwojarjar. Būreejtōn Nelson eaar ba bwe kadedeļo̧k būroojāāk eo eaar kōm̧m̧an bwe en “juon em̧m̧aan eoktak.” Eaar jab katak eļapļo̧k wōt kōn Jisōs Kraist bōtaab barāinwōt en̄jake juon wujlepļo̧k ekāāl n̄an E.1
Kwoj barāinwōt maron̄ kepaakļo̧k eok n̄an Kraist ilo am̧ katak kōn E. Ekkatak kōn mour eo An im jibadbad eo ej karuwaineneik aenōm̧m̧an eo An n̄an mour eo am̧ im jipan̄ eok itok n̄an jeļā E im Jemedwōj Ilan̄. Riiti ekōjkan an jodikdik rein kar uwaake kajjitōk ko: (1) Ta bwebwenato in jeje ko rekwojarjar em̧m̧an ippam̧ kōn Rilo̧mo̧or eo im etke? (2) Im ekōjkan an ekkatak ko am̧ kōn gospel eo kar bōktok n̄an eok aenōm̧m̧an?
Em̧m̧an ippa bwebwenato eo kōn rilōba ro 10 kōnke Kraist eaar kwaļo̧k ewi jon̄an an iakwe rilōba eo me eaar kam̧m̧oolol E. Eaar ba, “Am̧ tōmak ear lo̧mo̧o̧rōm̧” (Luk 17:19; lale eoon ko 11–19). Ij iakwe jouj eo emeanwōd me Ej kwaļo̧k n̄an aolep.
Kōnke kōn jet kabūrom̧ōjm̧ōj ko reļļap ejjab etto ilo jikuuļ eo aō, aolep ro ijo rej aikuji eļap aenōm̧m̧an in kaenōm̧m̧an. Iaar lo kajoor im aenōm̧m̧an ilo ekkatak ko aō ilo jemenere. Rūkaki ro ilo jemenere rej kōm̧m̧an bwe jeje ko rekwojarjar im gospel eo rej lukkuun in jejjet n̄an aoelp. Elukkuun in em̧m̧an n̄an lo oktak eo ilo kūlaajruum̧ in jemenere keidik n̄an juon kūlaajruum̧ bajjōk. Ewōr juon en̄jake eoktak ijo me ej bōktok aenōm̧m̧an.
Gabriel S., 16 iiō dettan, Colorado, USA
Bwebwenato eo an Alma kōn tōmak im naan an Anij (lale Alma 32:18–43) eaar katakin eō bwe n̄e jej iakwe ro jet, ro jet rej iakwe kōj. Āinwōt an kar Alma kōmeļeļeik n̄an armej in Zoram ro, tōmak ej āinwōt juon ine. Ej tōmak bwe juon men ej m̧ool ilo jab lukkuun pād ijo n̄an leo. Tōmak ej eddōkļo̧k n̄e juon armej ewōr an ikdeelel n̄an tōmak im ron̄jake naan an Anij. Aolepān menin eaar jipan̄ n̄a erom jo̧kne, kōkajoorļo̧k būruwō, im bōk juon naan in kam̧ool bwe Jemedwōj Ilan̄ ej lō eō kōn māj in iakwe im meanwōd.
Ilo aō ekkatak jeje ko rekwojarjar aolep raan, em̧m̧anļo̧k aō meļeļe kōn iakwe eo an Rilo̧mo̧o̧r n̄an kōjwōj kajjojo. Jeļā in ejipan̄ eō kōmeļeļeik n̄an ro m̧ōtta ilo jikuuļ bwe rejjab makeļo̧k n̄e ewōr aer inepata ko kōnke ewōr juon Anij ej iakwe kōj.
Maria D., 17 iiō dettan, Guadalajara, Spain
Dipdik in jān Christ and the Book of Mormon Children, jān Del Parson
Em̧m̧an ippa ilo 3 Nipai 17 ke Rilo̧mo̧o̧r ej loļo̧k Riamedka ro im kūrļo̧k ajri ro n̄an itok n̄an E. Ej jijet ippāer im joļo̧k iien ippāer juon illo̧k juon. Ej juon bwebwenato eo ekabwilōn̄lōn̄ n̄an eō bwe ej kwaļo̧k wōn Jisōs Kraist im ewi jon̄an iakwe eo An n̄an kōjwōj kajjojo. Ij tōmak Enaaj jijet ippād wōj kajjojo barāinwōt n̄e jej aikuji An jipan̄.
Iiō in iaar idajon̄jon̄ eō make n̄an riiti juon alen in jeje ko rekwojarjar aolep raan. Ke iaar kōm̧m̧ane, iaar erreim̧aanļo̧k n̄ane aolep raan. Iaar katak ekanooj ļap jān naan ko im bwebwenato ko ilo jeje ko rekwojarjar ke iaar kajieon̄ joļo̧k iien n̄an meļeļe kaki, im em̧ōj aō epaakeļo̧k Jemedwōj Ilan̄ im Rilo̧mo̧or eo ke iaar katak kōn Er barāinwōt. Men jab in eaar bōktok eļāp aenōm̧m̧an n̄an mour eo aō.
Anna C., 17 iiō dettan, Montana,USA
Ij iakwe ke Kraist ej itok n̄an Amedka, kajjitōk eļan̄n̄e ewōr jabdewōt enan̄inmej im ikkinejnej ibwilijier, innām kōmour er. Innām Ej kōjeraam̧m̧an ajri ro reddik. (Lale 3 Nipai 17.) Ij ļōmņak ej juon bwebwenato elukkuun em̧m̧an im kajoor. Em̧m̧an ippa ajri ro, im em̧m̧an ippa n̄e armej rej leļo̧k eļapļo̧k iakwe n̄an er, kōnke ajri ro rej lukkuun erreo. Bwebwenato ej kwaļo̧k n̄an n̄a m̧wilaļ in iakwe eo an Rilo̧mo̧o̧r eo n̄an kōj. Jān An kar bwe an iakwe armej ro ilo tōre eo n̄an kōm̧m̧an jabdewōt men Emaron̄ kar, E emaron̄ iakwe kōj rainin barāinwōt.
Aiseia 53:3 ej ba Rilo̧mo̧o̧r eo ej “juon armej in būrom̧ōj, im Ear jeļā liaajlo̧ļ.” N̄e ij ļōmņak kōn Pinmuur eo an Kraist, ta eo Eaar dipuki n̄an kōj, im ekōjkan jeorļo̧k aō bōd n̄e ij ukweļo̧k jān jerawiwi ko aō, ij lukkuun in en̄jake aenōm̧m̧an. Elōn̄ armej ro ilo Bok in Mormon—ļōm̧aro nejin Mosaia, Amōn, im Alma eo Edik—raar kōm̧m̧an bōd m̧okta, bōtaab kar maron̄ jeorļo̧k aer bōd. Raar oktakļo̧k n̄an Kriast, kar ukweļo̧k, im erom waanjon̄ak ko rem̧m̧an me jemaron̄ katak jāni rainin. Ekaenōm̧m̧an n̄an n̄a n̄an jeļā bwe maron̄ jeorļo̧k bōd ko aō barāinwōt.
Alina T., 18 iiō dettan, Oregon, USA
Bwebwenato in jeje ko rekwojarjar em̧m̧an ippa ej kōn Jisōs ke Eaar ukōt dān eo n̄an wain ilo iien juon m̧are, ke Jinen eaar kajjitōk an jipan̄ (lale Jon 2:1–11). En̄in ej eo em̧m̧an ippa kōnke bwewenato ej kwaļo̧k kautiej eo an Jisōs n̄an kōrā ro im Jinen eļap tata. Bwewenato in ej kōketak ajri ro n̄an pokake ro jinier im jemeer, ejjab kōn mijak bōtaab kōn iakwe eļap. Waanjon̄ak eo an Jisōs Kraist ej ta eo aolep rej aikuj kajjieon n̄an e. An iakwe n̄an Jinen eaar jab bōjrak, im barāinwōt ad iakwe aikuj in n̄an ro jinen im jemed. Ej barāinwōt eoon eo em̧m̧an ippa kōnke An kabwilōn̄lōn̄ ej juon m̧akūtkūt in jerbal in jipan̄, im jej barāinwōt maron̄ kōm̧m̧ani kabwilōn̄lōn̄ ko kōn jipan̄ ro jet.
Bwebwenato in im bwebwenato ko jet ilo jeje ko rekwojarjar kar bōktok n̄an eō aenōm̧m̧an. Ekanooj in kaenōm̧m̧an ilo jeļā bwe eļan̄n̄e inaaj aolep iien kajjieon̄ n̄an katak kōn Kraist im ļoor katak ko An, imaron̄ bar ro̧o̧l n̄an ippān Jemedwōj Ilan̄ eo em̧m̧an juon raan.
Anne R., 17iiō dettan, Victoria, Australia
Em̧m̧an ippa bwebwenato eo ke Krasit ej etetal ioon dān. Ej etetalļo̧k n̄an wa eo ijo aolep Rijilōk ro rej pād ie, im Ej kūrļo̧k Piter n̄an toļo̧k n̄an ioon dān eo. Piter eaar wōr an tōmak ilo jino in im maron̄ etetal ioon dān eo, innām ej jerwane tōmak eo an im jino an tūm̧laļļo̧k. Innām Kraist ej eļļo̧keļo̧k pein im jibwe e (lale Matu 14:25–33). Bwebwenato eo eaorōk n̄an n̄a kōnke Kraist iien otemjej Pein ej pād ilo mour ko ad—Ej kōjparok kōj.
Ekkatak ko aō rejipan̄ eō kōnke ij ekkatak jeje ko rekwojarjar aō ilo jibbon̄ im ekōm̧m̧an bwe raan eo en em̧m̧an. N̄e ijjab ekkatak, raan eo aō ejjab āinwōt em̧ōņōņō im limo—ejjab em̧m̧an en̄jake. N̄e ij riiti jeje ko rekwojarjar aō iien otemjeļo̧k ilo jibbon̄, raan eo aō ekanooj in em̧m̧anļo̧k kōnke ij karuwaineneiktok Jetōb Kwojarjar eo n̄an an pād ippa ilo raan eo.
James K., 17 iiō dettan, Alaska, USA
Dipdik in jān Kraist im Rilale Owōj eo, jān Heinrich Hofmann
Ij iakwe bwebwenato eo kōn Kraist im likao eo em̧wie (lale Mark 10:17–22). Ej letok n̄an eō elōn̄ kōļmenļo̧kjeņ ko im erreim̧aanļo̧k ko kōn likūt Anij im̧aan ilōn̄ in men otemjej. Ke kar kajjitōk n̄an wia kaki aolep m̧weiuk ko an ilo mour in enaaj kar lukkuun in pen kajjitōk eo n̄an enan̄in aolep armej. Bōtaab ij ļōmņak bwe kōn m̧ōņōņō in likūt Anij ioon m̧weo ko ej juon iaan men ko me kajjojo iaad ej aikuj katak kake ilo mour in. Iakwe eo an Jisōs Kraist ejjeļo̧k jem̧ļo̧k in n̄an kōj ej m̧ool in ļap. Ej lukkuun in em̧m̧an jān jabdewōt bwebwenato kōn jāān ak m̧weiuk ko jej bōk ilo mour in.
Riiti jeje ko rekwojarjar rej bōktok n̄an eō aenōm̧m̧an im kaenōm̧m̧an, ej barāinwōt ļapļo̧k jān māletlet im meļeļe. Men̄e imaron̄ jab iien otemjej en̄jake kajoor eo an ekkatak jeje ko rekwojarjar m̧ōkaj an waļo̧k, ijeļā bwe riiti jeje ko rekwojarjar rej kareel ilo em̧m̧an mour eo aō im jipan̄ eō n̄an en̄jake Jetōb eo im kile im̧we ko An.
Yuzhen C., 19 iiō dettan, Taichung, Taiwan
Dipdik in jān Woman Touches Hem of Christ’s Garment, jān Heidi Daynes Darley
Ke Kraist ej pād ilo iaļ eo An n̄an lo juon jiron̄ me epaak an jako, kōrā eo eaar to̧rļo̧k bōtōktōkin ej jibwe wōt nuknuk eo An im kar mour. Kraist ej oktakļo̧k n̄an jipan̄ liin ālkin kile bwe liin eaar an̄uri E (lale Luk 8:43–48). Kōjekdo̧o̧n etal n̄an jipan̄ bar juon, Kraist eaar kōm̧m̧an iien n̄an liin barāinwōt. Kraist ej kōm̧m̧an iien n̄an aolepādwōj barāinwōt.
Eļap an kanooj poub mour eo aō, ettōrļo̧k n̄an jikuuļ ak kūlaj in ballet ko ak jerbal ko jet. Ilo aolepān men jab kein, ejjab aō iien makeļo̧k ak en̄jake aenōm̧m̧an. N̄e ij riiti jeje ko rekwojarjar aō ak jar, ij en̄jake aenōm̧m̧an. Em̧m̧an n̄an en̄jake wāween jab eo im bōk kakkije jān poub ko. Ilo iien in aenōm̧m̧an ko, ij eddōk epakeļo̧k Rilo̧mo̧or eo im eddōkļo̧k ilo gospel eo.
Zoe B., 17 iiō dettan, Utah, USA