Jen Kwaļo̧k JEĻĀĻOKJEŅ eo Ad kōn juon Rilo̧mo̧o̧r
Jān Elder Gary E. Stevenson
Jān Doulul eo an Jon̄oulruo Rijilōk ro
Jān juon Ekōņono ilo juon Kweilo̧k Eļap an Kōrā ro, “Jeļā eo Ad kōn juon Rilo̧mo̧o̧r,” kar kwaļo̧k ilo Māe 5, 2017.
Enaan eo ad ej kōn aenōm̧m̧an, im kwe eo kwoj rikwaļo̧k naan kwoj kajedeed e. Kwomaron̄ kōm̧m̧ane menin kōn jānel in technology ko rekāāl im rekaitoktoklimo.
Pija jān Getty Images; Christ’s Image, jān Heinrich Hofmann
Jej Kabun̄ eo an Jisōs Kraist, kar ejaak ilo raan kein āliktata. Ilo ejja wāween in me Irooj eaar katakin, emōj kappeik kōj ilo raan kein āliktata n̄an “ilo̧k n̄an aolepen laļ, im̧ kwaļo̧k gospel n̄an armej otemjeļo̧k (Mark 16:15).
Rikanaan Nipai eaar kwaļo̧k kadkadin mijen in ilo tukaduin im enaan im unin kōtōpār eo: “Jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jerawiwi ko aer” (2 Nephi 25:26).
Ilo bok in Mosaia, jej riiti wāween an rikanaan Kiin̄ Benjamin ilo Bok in Mormon kar kakobaik armej ro an ilo aolepān āne eo kijeen wōt tampeļ eo, im ekar kajutak tampeļ eo, im katakin er. Ke ej katakin er, ekar barāinwōt kanaan n̄an er kōn raan kein: “Im̧ eļapļo̧k, Ij ba n̄an eok, bwe iien eo enaaj itok n̄e jeļā kōn juon Rilo̧mo̧o̧r naaj ajeeded iaolepān laļ, bwij, lo, im armej” (Mosaia 3:20).
“Jeļā eo kōn juon Rilo̧mo̧o̧r”
Juon iaan menin letok ko raorōk n̄an jolete baam̧le ko ad im leļo̧k n̄an ro jet ej “jeļāļo̧kjeņ eo kōn Rilo̧mo̧o̧r,” ak kōn Jisōs Kraist.
Kōn ijjino in epepen in jepļaaktok eo, armej raar meramļo̧k im ekar mōkaj an lōn̄ļo̧k im em̧m̧anļo̧k kein jerbal ko raan kein. Ekar juon iien eo laļ in eaar jino kajoor ilo mōn jerbal ko reļļap im kein jerbal ko im iaļan ekōnono ko imejatoto, ekōm̧m̧an bwe kanaan eo an Kiin̄ Benjamin en kūrm̧ool.
Āinwōt juon eo uwaan Doulul eo an Jon̄oulruo Rijilōk ro, em̧ōj ņa etaer rikam̧ool ro rejeņoļo̧k “kōn etan Kraist ilo aolepān laļ” (K&B 107:23) kōn ijjitōn̄ ko rejeņoļo̧k jim̧or ilo Public Affairs im Communication Services Committee, n̄aij eddoik kakūrm̧ool in kar kanaan kake—bwe “jeļā eo kōn Rilo̧mo̧o̧r” eajedeed ipeļaakin laļin—ilo ad kōjerbal kein jerbal ko raan kein me repojak n̄an kōj.
“Ilo aolepān laļ, bwij, lo, im armej”
Ilo bwebwenato, em̧m̧anļo̧k in kein būriin ko im ejaak in rātio im TV rekōm̧m̧an bwe enaan eo kōn Jepļaaktok eo en ajedeed n̄an aolepān laļ in. Elōn̄ waanjon̄ak ko emōj loi kōn menin, jet iaer rej pād ilo ememļo̧kjeņ ko ad.
Ilowaan 10 iiō in Visōn eo Jinointata, im allōn̄ eo mokta jān ankar Kabun̄ in ejaak, 5,000 kape in Bok in Mormon ko rekar pojak n̄an kōjerbali. Jān iien eo, elōn̄ļo̧k jān 175 milien kape ko em̧ōj būriin i.
Jabdewōt jibbon̄ in Jabōt, komaron̄ ron̄jake ak alooje diwōjļo̧k eo imejatoto an Music and the Spoken Word, eo me epaakeļo̧k 5,000 kōttan an diwōjļo̧k imejatoto. Diwōjļo̧k eo imejatoto kein kajuon ekar kōm̧m̧an ilo rātio ilo 1929. Diwōjļo̧k eo imejatoto kein kajuon an kweilo̧k eo eļap ilo TV ekar kōm̧m̧an ilo 1949.
Men eo ekaitoktoklimo, ilo 1966, Būreejtōn David O. Mckay (1873–1970) ekar jino ekōnono kōn men ko renaaj bōk jikier: “Jerbal in ekkōņ ko an armej renaaj itok ilo lukkun kajoor in, emaron̄ n̄an kōjeram̧m̧an ak n̄an kakkure armej, im emaron̄ kōm̧m̧an bwe en juon eddo eo eļap n̄an aolep armej n̄an kōjerbal kajoor in. … Raan kein eobrak kōn kauwōtata ko reļļap, barāinwōt men ko rem̧m̧an me remaron̄ bōk jikier.”1
Ilo 1974, Būreejtōn Spencer W. Kimball (1895–1985) eaar kōmeļeļeik visōn eo an kōn raan eo ej itok: “Irooj em̧ōj an kōjeraam̧m̧an laļ in kōn elōn̄ … satellite ko. Rej pād ijo utiej ilōn̄, leto letak jikņaļ ko n̄an eiten aolep kona ko kajjojo ilo laļ in. … Ilo m̧ool satellite kein rej ijjino eo n̄an ta eo epād im̧aan n̄an diwōjļo̧k ko imejatoto ipeļaakin laļ in. … Ij tōmak bwe Irooj ej kijoroor in letok pein im jipan̄ kōj ejaake kein jerbal ko me kōj armej jejan̄in kar jeļā kaki.”2
Kōn em̧m̧anļo̧k in kein jerbal ko raan kein ilo letok letak meļeļe imejatoto im media emakajļo̧k ālkin an kar intōrnōt ejaak, jej loe bwe em̧ōj ad kam̧oole ilo aolepān mour ko ad kūrm̧ool in kanaan eo an Kiin̄ Benjamin, Būreejtōn McKay, im Būreejtōn Kimball.
Ewōr juon jekjek eo em̧ōj karōke bwe aolep kein jerbal kein raan kein ej n̄an kalōk aelōn̄ in kiin̄ eo an Irooj ioon laļ in. Ikōņaan kwaļo̧k waanjon̄ak ko kōn menin n̄an kom̧.
LDS.org im Mormon.org
Ilo 1996, Kabun̄ in eaar errā n̄an jino kōjerbal websites ko āinwōt juon iaļan enaan kab meļeļe. Jān iien eo, emaron̄ tarrin in 260 websites ko raar jino kōjerbali, ekitbuuj sites ko me repojak n̄an kōjerbal ilo aolepān laļ ko me elōn̄ membōr in Kabun̄ in ie, ilo kajin ko aer make.
Ij kwaļo̧k ruo waanjon̄ak ko ijejeļā kaki ilo websites kein. Kein kajuon ej LDS.org, kar ejaak ilo 1996, eo me rainin elōn̄ļo̧k jān 24 milien armej ro rekāāl rej alooje site in im elōn̄ļo̧k jān tarrin in 1 milien armej ro rej alooje site in kajjojo wiik. Elōn̄ membōr ro rej lo wāween kilen katakin im ekōnono ko ilo kweilo̧k ko reļļap ijin. Kein karuo ej Mormon.org, juon website kar ejaake n̄an kwaļo̧k kadkadin gospel eo n̄an ro rūtūrūr im ro mōttad ro me rejjab membōr in Kabun̄ in. Site in ej lo elōn̄ļo̧k jān tarrin in 16 milien ro rej alooje site in ilo juon iiō.
Apps ko an Taļboon
Pija jān Getty Images
Aaet, kein jerbal ko raan kein relukkun mōkaj, ejaikuj kijejeto ko ewōr tokjāer im kein jipan̄ ko n̄an wōnm̧aanļo̧k wōt. Kōn ejaak in smartphone ko ekōm̧m̧an bwe en kajoor im mōkaj an koneek im tōpar jon̄an data eo ilo juon iien leto letak melele. Enan̄in aolep data ej ejaak ilo jekjek ko an Apps ko an Taļboon, ak “apps.” App eo kein kajuon Kabun̄ in eaar wiaki im kōjerbale ekar jino jerbal ilo 2007.
Elōn̄ waanjon̄ak ko in an wōr tokjen ad kōjerbal Apps ko an Taļboon ko n̄an kajedeed ad “jeļā kōn Rilo̧mo̧o̧r.” Ijjab maron̄ kōmeļeļeiki kobban elōn̄ apps ko me epidodo am ello, ak erkein rej jet iaan waanjon̄ak in apps ko me kōmaron̄ jeļā kaki:
-
Gospel Library
-
Mormon Channel
-
LDS Tools
-
LDS Music
-
Family Tree
Men kein milien kōttan kōjerbali ilo juon wiik ippān milien ro remaron̄ deļo̧n̄e ļo̧k.
Social Media
Meļeļein, social media ko rej kein jerbal ko rej kōjerbal kamputōr ko rej kōtļo̧k an kajjojo im doulul ko alooje, ejaake, im kwaļo̧ke meļeļe ko, ļōmņak ko, im bar jekjek ko jet n̄an leto letak enaan ilo iaļan enaan ko imejatoto.
Jinion ilo 2010, Kabun̄ in eaar kijorror im errā in kōjerbal social media n̄an kōm̧m̧an im kajedeed “jeļā eo kōn Rilo̧mo̧o̧r.” En̄in ej juon iaļan bōk meļeļe eo emōkaj im epidodo. Jejjab maron̄ keidi jon̄an an mōkaj an okoktak.
Juon jekjek eo em̧ōj loi ilo social media ej bwe jibaan wōt am jeļā kilen kōjerbal kein jerbal ko rekāāl, ebar lōn̄ ekāāl ļo̧k, ekiļepļo̧k, ak elōn̄ļo̧k kilen kōjerbali ko me rekabwilōn̄lōn̄ ebar mōj ejaaki.
Inaaj kakaduik aō kōmeļeļeik ļaļem kein jerbal ko rekāāl an social media ko me Kabun̄ in ej kōjerbale āinwōt jāneļ in bōk meļeļe:
1.Elōn̄ļo̧k jān 2 bilien armej ro rej kōjerbal facebook ipeļaakin laļ in. Ijin, armej ro rej kōjerbale rej kōm̧m̧an aer make iaļan aer maron̄ tōpar ro mōttaier.
2. Instagram ej juon social site eo me ej pedped wōt ilo pija im bitio.
3. Pinterest ej āinwōt juon bulletin board. Ijin ej pija ko ņa etan “pins” rej pād ilo board eo. Men kein remaron̄ naan in kōketak ak pija ko ewōr meļeļeier.
4. Twitter ej juon iaļan bōk meļeļe imejatoto me emaron̄ kōm̧m̧an bwe ro rej kōjerbale ren ijjilkinļo̧k im riiti 280 leta ko ilo message ko ņa etan “tweets.”
5. Snapchat ej ļōme pija ko im bitio ko rekadu me ej kajju jako ak emaron̄ ilowaan 24 awa.
Ilo elōn̄ doulul ko, jej kōjerbali social media site kein ilo juon wāween ekajoor.
Komaron̄ reiliļo̧k n̄an enaan eo ilo kweilo̧k eo eļap kōn liājļōļ an Elder Jeffrey R. Holland jān Doulul eo an Jon̄oulruo Rijilōk ro jejjo iiō ko rem̧ootļo̧k.3 Jān enaan eo an, juon bitio jidikdik kar kōm̧m̧ane me ekar wōr tarrin in ruo milien armej ro raar alooje ilo Facebook wōt, kōn elōn̄ taujin ko raar likes, shares, im jeje ennaan ko rem̧man4
Ilo Okwōj 2019, Būreejtōn Dieter F. Uchtdorf eaar likūt juon bitio ilo Instagram, ej katakin kōn katak ko an gospel in n̄an ļaddik eo jibūn Erik ilo—komaron̄ ke kajidede ia ņe—ilowaan baļuun eo!5 Bitio eo an Būreejtōn Uchtdorf ilo Instagram taujin armej raar nōbar e, im elōn̄ ennaan ko rem̧m̧an ilo bitio eo.
Kabun̄ in ej barāinwōt kwaļo̧k ilo akkaun eo an ilo Instagram ilo Nobōm̧ba 2017 juon pija in Elder Dallin H. Oaks im Elder M. Russell Ballard uwaake juon jiron̄ kajjitōk ko kōn sister ro rej jerbale mijen ko. Ilōn̄ļo̧k 112, 000 kōttan an armej alooje kajjitōk in.
Ilo Pinterest eo, juon emaron̄ lo bukwi pins ko jān LDS.org im elōn̄ļo̧k jān kajjojo member in paij in, raar im̧we ro jet.
N̄an waajon̄ak, elōn̄ naan ko an rikanaan em̧ōj share i—mokta im kiiō. Juon pin an juon iaan katak ko an Būreejtōn Thomas S. Monson ej ba āinwōt in, “Elōn̄ ilo mour in rej pedped wōt ioon m̧wil ko m̧wilid.”6
Juon tweet me Elder David A. Bednar jān Doulul eo an Jon̄oulruo Rijilōk ro eaar kwaļo̧k e iiō eo ļo̧k ilo jibbon̄ in Ijtō eo kar 210,000 alen an armej lale. Elder Bednar eaar kwaļo̧k juon enaan eo ekadu im elōm̧wan bwe, “Ejako ijin: bwe em̧ōj An jerkakpeje” (Matu 28:6), emaron̄ wōr kajoorin eo eļap im ejjeļo̧k jem̧ļo̧kiņ.
Snapchat
Āliktata, pija ko im naan ko rej kwaļo̧k enaan eo an Būreejtōn Monson ilo Enaan ko an Būreejtōnji eo Kein Kajuon me ekāāl tata im ej waļo̧k ilo Snapchat.
Mōttan ļo̧k Kauwōtata ko
Kiiō, jej nōbar aolep em̧m̧an ko an kein jerbal ko rekāāl raan kein im kwaļo̧k wāween kōjerbali, ij ļōmņak ej barāinwōt ļap tokjen n̄an kōmeļeļeik jet iaan kauwōtata ko rej waļo̧k jāni.
Jej aikuj jeļā kōn jon̄an iien ko jej juļo̧ki ilo social media ko ak ilo ad kōjerbal apps ko an taļboon ko. Kilen kōjerbal social media ej bar kadikļo̧k kapeel ko an armej ikijeen iaiao im jeļmae doon, eo me emaron̄ kakkure kapeel ko me rej ejaak ikkijeen iaiao ko an elōn̄ rūm̧m̧an ded ro.
Nana ko mōttanļo̧k men ko rejjab em̧m̧an reban lukkuun alikkar. Eļapļo̧k jorrāān ikkijeen an̄ūri pija ko renana ilo jukjukin pād in, eo me enana ilo an jelōt im kakkure membōr ro an Kabun̄ in im baam̧le ko.
Āliktata, ij kwaļo̧k bar jet kakobaba ikkijeen nana ko, nana in ejelōt aolep, ekitbuuj jiron̄ im mama ro im kōrā ro pālele ro ilo epepen in. Ij kōkaļļe nana kein ruo āinwōt “kōņaan an laļ in” im “nana ko ilo keidi.” Ij ļōmņak wāween eo em̧m̧antata n̄an kōmeļeļeiki nana kein ruo ej n̄an kwaļo̧k jet waanjon̄ak.
Kōnono kōn, pija ko me rej waļo̧k ilo social media im kwaļo̧k mour ko ilo wāween ko rem̧m̧antata im jet iien rejjab lukkuun m̧ool. Robrak kōn pija ko rem̧m̧an kōn kein kainōknōk in mōko, jikin vacation ko raibojoj, im kilen kōpooj m̧ōn̄ā ko renno. Kauwōtata eo, aeet, ej bwe aolep armej rej inepata bwe ilo aer lale reban maron̄ tōpar kōņaan ko an laļ iņ.
Kar im̧we kōn juon pijain juon “baankeek” keek in keememem, leddik eo nej nejū ekar kajjieon̄ in kōm̧m̧ane āinwōt. Ijjeļo̧kin an lukkun kate bwe en āinwōt, eaar kāļet bwe en kōketak ro jet ilo an likūt “Pijain An jab jejjet jerbal eo an” (jim̧we).
Kōjatdikdik, jej maron̄ jeļā eļapļo̧k, lo eļapļo̧k kōjak, im an dikļo̧k en̄jake in inepata n̄e jej lo pija ko remaron̄ kwaļo̧k kōņaan ko an laļ in im maron̄ tōlļo̧k n̄an nana in keidi.
Men in ejjab waļo̧k āinwōt juon kōkaļļe in iien ko ad ak, ļōme naan ko ān Paul, kar bar iien ko moktaļo̧k: “Ak rej jon̄e er ippān doon … im keidi er n̄an doon, re jab mālōtlōt”(2 Korint 10:12).
Elder J. Devin Cornish jān Jiljilimjuonn̄oul ejjab to ekar leļo̧k naan in kapiļōk: “Ej nana ad mour kōn kōj make ilo an ejjeļo̧k jipan̄ kōn ad jiie im keidi. Jebōd ilo ad ņa ruōd m̧āke kōn men ko jej men ko ewōr ippād ak ejjeļo̧k im kōn ļōmņak ko an ro jet. Eļan̄n̄e jej aikuj keidi kōj, jān keidi ekōjkan kar kōj jem̧aan n̄an kōj rainin—im em̧ool ta eo jekōņaan erom ilju im jekļaj.”7
Jen kwaļo̧k juon iaan ittiņo̧ ko baam̧le eo am, me jej loe ilo pija in an baam̧ļe in (peij eo juon) me rekar pijaik jejjo iiō ko rem̧ootļo̧k, mokta jān an social media bun̄bun̄. N̄e ren kar pija rainin, enkar waļo̧k im̧ejatoto, kwaļo̧k juon baam̧le emen uwaan ro raibojooj, rej ekkanōk nuknuk kōļar ko rejejjet n̄an doon, im em̧m̧an m̧wilier rej mōņōņō kōn iien pija eo an baam̧ļe eo. Kwokōņaan ke ron̄ juon bwebwenato em̧ool.
Ij keememej wōt taļboon ko̧o̧l jān kōrā pāleeō. “Gary, kōpad ia? Kom e ijin ilo jikin kōmman pija e. Kom aolep pojak in pija. Ekar jab pidodo ilo am kōpooj nuknuk ko, karōk er, im pojak. Mōttan jidik kōtōpar ke ije?”
Ekwe, ikar meļo̧kļo̧k im jan̄in etal jān opiij eo! Ikar rumuj jimatten awa, aolep men rekar jab lukkuun jejjet ke ikar jako, ekar jab jemļo̧k an poktak.
Ta eo eaar waļo̧k? Ekwe, ļaddik eo erutotata neju, ekar e ikkure ilo yard eo im lo juon wōjke abōl, kar ittim jet, im kar jujen kad lak ļaddik ro jet. Ekar kade likiņ ļaddik eo kein kajilu nejū kōn juon abōļ im kōm̧m̧an bwe en wōtļo̧k, im ekar jino jan̄.
Ejja iien eo wōt, ke ej waļo̧k menin, ļaddik eo kein karuo nejū, eaar jijjet laļ im jeraujij eo an eaar walōn̄ļo̧k. Ajri ro jet raar lo bwe jittokin in ikkure kōļar mouj, ejjab jittokin jar ko me jinen eaar leļo̧k n̄an e bwe en kanōke. Ekar kajjitōkin e, “Etke kwar jab kanōke jittokin in jar ko am?
Eaar ba, “Ekwe, idiki. Rekamōņōjņōj.”
Im ke ej kannaan n̄an e, ļaddik eo nejū ruo an iiō ekar ettōrļo̧k n̄an jikin ikkure eo, aujek neen, im ekar juur juon men, tippok im eaar bōtōktōk botin. Ekar to̧o̧r bōtōktōk n̄an jiln̄ij mouj eo an, im ekar māār. Iien eo ņe ij kab tōparļo̧k. Wāweeņ eo wōt n̄an ukōt aolep men ko raar bōk jikier ej n̄an ukōt likļo̧k buruōn nuknuk eo im kabōde, nooje bōtōktōk ko jān camera eo.
Kōn menin, ke ļaddik eo nejū erūttotata ekar ettōr to ettōr tak im kadkad kōn abōļ ko, eaar tippok im ettonoon bukien neen kōn pedkat in ujooj ko. Kōn menin, ilo pija in, pein ekar likūt ioon bukien neen im nooje ettoon in ujooj ko.
Ak ļaddik eo kein kemen nejim, ekwe, kōm kar kōttar e 20 minit bwe mej ko mejān raar jako aer būrōrō kōn an kar jan̄.
Im, aaet, bōtōktōk ko an raar kiiō pād ilo tulikin jiln̄ij eo an.
Kiiō, ļaddik eo nejum̧ kein karuo ekar likūt pein ioon jittokin ko bwe en jab waļo̧k jittokin in ikkure ko an.
Ak n̄a, ekwe, Gary ej pād ilo juon em̧ eo epok kōnke erumuj aō tōpar tok ekar unin an waļo̧k aolep men kein.
Kōn menin, n̄e kwoj loe pijain aibojooj an baam̧le eo ad im n̄e ļōmņak, “Etke jejjab maron̄ karōki aolep men kein bwe ren erom āinwōt juon baam̧le eo ewāppen āinwōt baam̧le ilo pija in?” kom jeļā m̧ool in kiiō!
Social Media im Jerbal in Mijenede
Pija jān Getty Images
Ilo am kalimjōkļo̧k, jej aikuj mejmejkaruo kōn nana ko, ekitbuuj kōņaan ko an laļ in im wāween keidi ko renana. Laļ iņ ekkā ejjab lukkuun meram āinwōt ilo kalimjōke lok ilo social media. Men̄e, elōn̄ ļo̧k em̧m̧an ko im renaaj waļo̧k jān iaļan bōk meļeļe kein.
Missionary Department eo ekar leļo̧k jet kōmeļeļe ko rekāāl ilo wāween kaminene me social media emaron̄ jipan̄ kōn jerbal in mijenede. Ewōr kein jipan̄ ko ilo intōrnōt n̄an kōj me jemaron̄ kōjerbal wāween ko rekajoor, repidodo, reļōm waan, im rewājepdik.
Elōn̄ apps ko me rej kōjerbali ilo kein jerbal ko raan kein ilo jejjetin im wāween ko rekōketak. Jej aikuj kōm̧m̧ane aolep men jemaron̄ e bwe jen katakin kilen kōjerbal ilo jim̧we kein jerbal ko raan kein n̄an diktak in epepen in im n̄an kakkōļ im bōbrae wāween kōjerbal ilo jab jim̧we. Menin ej aikuj jipan̄ kam̧ool n̄an kōj bwe jeraam̧m̧an in kein jerbal ko raan kein renaaj ļapļo̧k jān m̧ōttanļo̧k kauwōtata ko.
“Raibojooj Wōt RiKwaļo̧k Naan Ro”
Ilo iien eo ij kōļmenļo̧kjeņ im jar ilo m̧ool kōn ennaan in, iaar rūj jibbon̄on eo kōn juon al eo elōm̧wan ilo ļōmņak eo aō: “Ewi wāween an aiboojoj rikwōj mejān lan̄ rein me rej kwaļo̧k n̄an kōj gospel in aenōm̧m̧an in.”8
Enaan eo ad ej kōn aenōm̧m̧an, im kom ro komij rikwaļo̧k naan ro raibojooj ro rej kajedeed e. Komaron̄ kōm̧m̧an menin kōn jāneļ in kein jerbal ko raan kein me rekāāļ im̧ rekaitoktoklimo. Jej mour ilo juon laļ eo ejeņoļo̧k kōn tarļep in gospel im kōn maron̄ in n̄an kajedeed gospel in aenōm̧m̧an kōn adiin peim.
Ewōr naan in kanaan an rikanaan ro jem̧aan, eo ejjejet an kwaļo̧k kadkadin iien kein ad im letok tōl ilo raan kein: “Im eļapļo̧k, Ij ba n̄an eok, bwe iien eo enaaj itok n̄e “jeļā kōn juon Rilo̧mo̧o̧r naaj ajeeded iaolepān laļ, bwij, lo, im armej.” (Mosaia 3:20).
Ebar wōr naan ko me rej itok kōn revelesōn ko raan kein, rej kōnono n̄an im letok tōl kōn iien kein ad im jekjek ko jej pād ie. Ij kouti Elder Bednar: “Ij tōmak bwe em̧ōj an jejjet n̄an kōj ro rikaļoor an Kraist n̄an kōjerbal kein jerbal kein rekkar im rem̧m̧anļo̧k n̄an kam̧ool kōn Anij Jemed Indeeo, karōk eo ekamōņōņō An n̄an ro Nejin, im eo Nejin, Jisōs Kraist, āinwōt Rilo̧mo̧o̧r an laļ; n̄an kajedeed m̧ool eo kōn Jepļaaktok eo an gospel eo ilo raan ko āliktata; im n̄an kadedeikļo̧k jerbal eo an Irooj.”9
Ij kūr kom n̄an lukkuun ļōmņak kōn eddo eo am n̄an kwaļo̧k kōn gospel in aenōm̧m̧an āinwōt rikwaļo̧k ņaan ro reaibojooj. Jen kōm̧m̧ane ijoko koņaad n̄an kwaļo̧k ad “jeļā kōn juon Rilo̧mo̧o̧r” n̄an aolep laļ, bwij, lo, im armej. Wāween eo em̧m̧antata ej jidik kōn jidik ilo juon wāween eo ejeņoļo̧k me em̧m̧an n̄an kwe im baam̧le eo am. En wōr ippād peran n̄an blog, like, share, post, friend, tweet, snap ilo wāween eo me enaaj kaibojooj, ņōbar, im kautiej kiļaan Jemedwōj Ilan̄ im bōktok juon jeļā kōn Rilo̧mo̧o̧r n̄an baam̧le eo am, ro rejitōn bōro, im ro mōttam—ekitbuuj ro mōttam ilo social media.