Iep ko im Bato ko

Jān Chieko N. Okazaki

Kōn Sister Okazaki

Chieko Nishimura Okazaki (1926–2011) eaar rūttoļo̧k ilo Hawaii, USA, ilo juon baam̧le riBudda im ro jibūn ri Japan. Ekar kobatok ilo Kabun̄ in ke ej 15 an iiō.

Ilo tōre eo, Sister Okazaki em̧ōj an kile an tarpok kōn ļāmoreņ eo an im manit eo an. Inepata kōn wāween an ro jet naaj meļeļe kōn er ālkin an kar jar in tariņae eo an Japan baam̧ e Pearl Harbor, Hawaii, Sister Okazaki im jinen raar ippān doon im tili aolepān menin jolet ko aer jān Japan. Innām eaar kalim̧jōk e ilo kilaaj eo im ļōmņāk, “Ijjan̄in kar juur ļo̧k Japan. Ejjab n̄a RiJapan ilo buruō. Āk ijjab maron̄ kōjekdoon kadkadū. Mej kā meja, kilū, im koļan bōra rej RiJapan.”¹

Sister Okazaki eaar ioon an armej dike RiJapan ilo aolepān mour eo an. Ekar jino katakin ejjab to ālkin World War II ke ekar ļap wōt an armej dike RiJapan ilo Amedka eņ. Jilu kōrā raar makoko in kadeļo̧n̄e ajri ro nejier ilo kilaaj eo an. Ak ejjab to Sister Okazaki eaar bōk er n̄an kilaaj eo an.²

Sister Okazaki eaar kōrā eo jinointata eaar jerbal ilo aolepān doulul ko jilu an kōrā: kein kajuon Doulul an Jiron̄, innām Būrāimāri, innām Doulul eo an Kōrā ro.³

Enaan in ej m̧ōttan ekōnono eo an ilo Eprōļ 1996 kweilo̧k eo eļap kōn ippān doon jekdoon jān kajjojo laļ. (punctuation and capitalization standardized).

Anij eaar letok n̄an kōj elōn̄ menin letok ko, elōn̄ kain kajjojo laļ, im ad manit jān doon, ak juon men eaorōk ej ta eo jejeļā kōn kōj kajjojo—bwe jej ajri ro Nejin.

Kōttōbar eo ad in bwe kōj ro uwaan Kabun̄ eo an Jisōs Kraist jen ekkatak jān doon, bwe jen maron̄ iakwe doon im jim̧or eddōkļo̧k.

Katak ko ilo gospel eo relukkuun aorōk. Raorōk, bōtaab manit ko ej ad pepe. Ikōņaan kwaļo̧k juon waanjon̄ak em̧m̧an n̄an kwaļo̧k oktak eo ikōtaan katak ko an Kabun̄ in im manit ko. En̄in ej juon bato in peaches jān Utah, kar kōpooj e jān juon kōrā jān Utah n̄an naajdik baam̧le eo an ilo iien m̧ōļo̧. RiHawaii rejjab kakkoņ leen wōjke ilo bato. Rej ittim leen wōjke jon̄an en ebwe n̄an jejjo raan im rej illik ilo iep ko āinwōt in n̄an baam̧le ko aer. Iep in elōn̄ juon man̄ko, binana, juon pineapple, im juon kennabu … juon RiPolynesia ej ettim n̄an naajdik baam̧le eo an kōn juon mejatoto ijo leen wōjke ko rej kaļļe aolep iiō.

Basket im bato rej kantāinōr ko reoktak, ak kobbaer rej juon wōt: leen wōjke n̄an baam̧le eo aer. Em̧m̧an ke bato eo im enana ke iep eo? Jaab, aolepāer rem̧m̧an. Rej kantāinōr ko rekkar n̄an manit im aikuj ko an armej ro. Im rekkar kōn kobban ko ilowaer, ko me rej leen wōjke.

Kiiō, ta leen wōjke eo? Paul ej ba n̄an kōj: “A leen Jetōb, yokwe, lan̄lōn̄, aenōm̧m̧an, meanwōd, jouj, em̧m̧an, [im] tiljek” [Galatia 5:22–23]. Ilo doulul eo an Kōrā, ilo doulul eo an priesthood, ad kautiej ilo ad koba ippān n̄an bōk kwojkwoj, leen Jetōb ej kobaik kōj ilo iakwe, lan̄lōn̄, im aenōm̧m̧an im men̄e kōrā in epād ilo Taipei ak Tonga, men̄e doulul eo an em̧m̧aan ej pād ilo Montana ak Mexico, im men̄e kweilo̧k in kwojkwoj eo ej kōm̧m̧an ilo Fiji ak Philippines.

… Ke iaar bōk kūr eo n̄an Būreejtōnji eo Eutiej an Kōrā, Būreejtōn [Gordon B.] Hinckley eaar kapilōk eō: “Kwonaaj bōktok kapeel ko rejeņoļo̧k n̄an būreejtōnji in. Renaaj kile eok āinwōt juon eo ej bōk jikin ro rej pād ilikin Amedka im Canada. … Renaaj kalimjōk eok āinwōt juon eo ej kwaļo̧k aer juon wōt ippān Kabun̄ in. Eaar letok juon kōjeraam̧m̧an bwe lo̧o̧ū en kar maron̄ jeļā kōnono ilo aō kar kōnono n̄an armej ro.⁴

… [Ke iaar kōnono ilo bar jet laļ,] Iaar en̄jake Jetōb ilo an bōki naan ko aō im un̄ur buruōer, im iaar maron̄ en̄jake “leen jetōb” ej letok n̄an eō en̄jake kōn iakwe eo aer, aer lan̄lōn̄, im aer tōmak. Imaron̄ en̄jake Jetōb ilo an kōm̧m̧an bwe jen juon wōt.

Ro jeiū im jatū, men̄e leen wōjke ko kijem rej peaches ak kennabu, im men̄e kwoj likūt ilo bato ko ak iep ko, jej kam̧m̧olool eok kōn am kōm̧m̧an ilo iakwe. Jema Ilan̄, ikōņaan bwe kōm en juon wōt im bwe kōm en Am,⁵ Ij jar ilo et eo ekwojarjar etan ad Rilo̧mo̧o̧r, Jisōs Kraist, amen.