Jar: Kii eo n̄an Naan in Kam̧ool im Jepļaaktok eo

Jān Elder Robert D. Hales (1932–2017)

Jān Doulul eo an Jon̄oulruo Rijilōk ro

Jān kōnono eo an Oktoba 2003 kweilo̧k eo eļap.

Ļoor waanjon̄ak eo an Josep Smith im jon̄ak eo an Jepļaaktok eo. Oktakļo̧k n̄an Irooj. Bukwelōlō ilo jar. Kajjitōk ilo Tōmak. Ron̄jake Jetōb Kwojarjar eo.

Ilo jerbal eo am āinwōt ritōl ro an Kabun̄ in, emakijkij am kōn kajjitōk, “Ekōjkan aō bōk juon naan in kam̧ool kōn jepļaaktok eo an gospel eo an Jisōs Kraist?”

Bōk juon naan in kam̧ool im erom rioktak ej ijjino kōn ekkatak im jar, innām mour kōn gospel eo kōn kijenmej im kije im karuwaineneik im kōttar Jetōb eo. Mour eo an Josep Smith im jon̄ak eo an Jepļaaktok eo rej waanjon̄ak ko rekanooj em̧m̧an an jekjek in. Āinwōt [Aō kwaļo̧k] … iien ko an Jepļaaktok eo ippāmi, pukōt bun̄tōn ko me rej tōlļo̧k n̄an naan in kam̧ool. …

Poktak Eļap

Josep Smith eaar ļotak ilo Tijōm̧ba 23, 1805 eo, ilo Sharon, Vermont, USA. Eaar ļotak n̄an juon baam̧le eo me rej jar im ekkatak Baibōļ eo. Ilo an kar jodikdik, eaar erom itok limo ilo kabun̄ im “poktak eļap” ioon katak ko an Kraist, kōn pris ej akwāālel ņae pris, im rioktak ņae rioktak” (Josep Smith—Bwebwenato 1:6).

Poktak in … eaar ijjino buki epepen m̧oktaļo̧k ilo ta eo kar ņae etan Bun̄ Jān Tōmak eo Eļap. Tōre eo an Kraist, “ejjamin itok” Rijilōk Paul eaar ba, “bwe m̧okta jān raan eo, enaaj itok bun̄ eo” (2 Tessalonika 2:3).

Jet epepen ko tokālik in Jerkakpeje eo an Kraist, Rijilōk ro An kar m̧an er, katak ko An raar jorrāān, im priesthood eo kar bōk jān laļ in. Bōtaab Paul, eaar lo tōre in ad, kar Kanaan, “n̄an jerbal an iien ko re jejjet [Anij en] en kobaik men ko otemjej ilo Kraist” (Epesōs 1:10). Enaaj kar kōjepļaaktok Kabun̄ eo em̧ool an Kraist n̄an laļ in bar juon alen. …

Josep ej Lo juon Uwaak

Josep … , ke eaar 14 iiō dettan, eaar lo an make pād ilo “lim̧otak in ļōmņak kein [an kabun̄].” Emakijkij an kōn kajjitikin e make, “Eļan̄n̄e juon [kabun̄ kein] ejim̧we, ewi in iaer, im ewi wāween aō naaj jeļā e?” (Josep Smith—Bwebwenato 1:17).

Josep eaar ilo̧k n̄an Baibōl eo n̄an uwaak ko. “A eļan̄n̄e jabdewōt iaami ej aikuj mālōtlōt,” eaar riiti ilo Leta eo an Jemes, “en kajjitōk kōn e ippān Anij, eo Ej wūjlep n̄an armej otemjej, im jab eņo̧uk kake, im Enaaj leļo̧k n̄an e”(Jemes 1:5).

Ļoor tōl eo an Jemes, Josep eaar ilo̧k n̄an juon bukwin wōjke repaake m̧we im̧ōn im jar. Ke eaar kūr n̄an Anij, “iaar lo juon jurōn meram … ar wanlaļtak,” meramļo̧k jān aļ ilo raelep, im “ruo Armej ro” raar waļo̧k. “Juon iaer … , kūr [Josep] kōn etan im ba, im jitōn̄e ļo̧k eo juon—En̄in ej Nejū Jitōn bōro. Ron̄jake E!” (Josep Smith—Bwebwenato 1:16–17).

Anij Jemen im Nejin, Jisōs Kraist, kar kōnono ippān Josep. Raar uwaake kajjitōk eo an. Raar katakin e bwe Kabun̄ eo em̧ool an Kraist eaar jako jān laļ in. Josep eaar katak bwe rein uwaan Doulul in Anij eo raar armej ro rejeno̧lo̧k im oktak, Raar jeļā kajien kōn etan, im Raar m̧ōņōņō n̄an uwaake jar ko an. Lan̄ ko raar peļļo̧k, tōre in bun̄ jān tōmak eo eaar jem̧ļo̧k, im meram eo an gospel eo eaar ijjino romaakļo̧k.

Āinwōt Josep, elōn̄ iaad rej lo er make ilo aer pukōt meram eo em̧ool. … Āinwōt Josep, jej aikuj etale jeje ko rekwojarjar, jar, … [erom] ettā, im [katak] n̄an kōjerbal tōmak.

Moronai im Piliej Kooļ ko

Ium̧win jilu iiō ko ālkin Visōn eo M̧oktata, Josep [eaar ba eaar emakijkij an en̄jake ebbeer kōnke kōn m̧ōjņo̧ ko an im jab wānōk ko]. Bōtaab eaar jab jerwaane tōmak eo an ak meļo̧kļo̧k kajoor in jar.

Ilo Jeptōm̧ba 21, 1823, ke eaar 17 iiō dettan, [Josep] eaar bukwelōlō n̄an kajjitōk “jeorļo̧k bōd kōn aolep jero̧wiwi ko [an]” … im [n̄an jeļā] aō jutak im̧aan [Anij]” (lale Josep Smith—Bwebwenato 1:29). Ke eaar jar, juon meram … eaar waļo̧k, ļapļo̧k “m̧ae ruum̧ eo eaar meramļo̧k jān lukwolpān raelep” (eoon 30). Ilo meram eo kar jutak juon armej nuknuk kōn juon liboror “ebbooļoļ ekanooj mouj otem mouj” (eoon 31). Eaar kūr Josep kōn etan im kwaļo̧k kadkad in e make āinwōt Moronai. Eaar ba “bwe Anij ekar wōr juon an jerbal n̄an [Josep] n̄an kōm̧m̧ane” im kar jiron̄ e kōn juon ļo̧o̧k in etto “ej jeje ioon pileij gold ko,” me, n̄e kar ukōte, eaar erom Bok in Mormon. Bok eo epād ie juon ļo̧o̧k an tarlep in gospel eo. (Eoon ko 33–34) … Kar tōlļo̧k Josep n̄an … ļo̧o̧k eo, kar kalbwin … [Ilo] Bat eo epaak … Cumorah.

Raan eo tok juon Josep kar lo piliej ko, bōtaab iien eo ejjan̄in kar jejjet n̄an n̄an kwaļo̧ki tok. Moronai eaar kōmeļeļeik Josep n̄an ioon e ijo ejja raan eo wōt kajjojo iiō ium̧win iiō ko emen (lale eoon 52–53). Joseph eaar pokake. Kajjojo iiō eaar ilo̧k n̄an bat eo ijo Moronai eaar leļo̧k n̄an e “naan in tōl” (eoon 54) ikkijien Jepļaaktok eo an Kabun̄ eo an Kraist. …

Josep eaar bōk piliej ko ilo Jeptōm̧ba 22, 1827, ke eaar 21 iiō dettan. Eaar barāinwōt bōk kein jerbal in etto n̄an ukōti, kar ņae etan Urim im Thummim eo. Kōjerbal kein ukook in ekwojarjar, ippānļo̧k Jetōb Kwojarjar eo, Josep eaar jino jerbal in ukook eo. …

Jepļaaktok eo ej Jepepļo̧k

Ke eaar 23 iiō dettan, Josep eaar ukōt piliej ko ke e im [rijeje eo an], Oliver [Cowdery,] raar lo juon eoon kōn peptaij n̄an jeorļo̧k bōd ko. … Raar kōņaan jeļā eļapļo̧k. Josep eaar jeļā ta eo n̄an kōm̧m̧ane.

Ilo Māe 15, 1829, [Josep im Oliver] raar ilo̧k n̄an wōjke ko n̄an kajjitōk ippān Irooj. Ke raar jar, Jon Ripeptaij eaar waļo̧k “kōdo̧ in meram” (Josep Smith—Bwebwenato 1:68). E … ekar peptaiji Rilo̧mo̧o̧r eo ilo mour, [im] eaar kabwijer kii ko an priesthood eo remenin aikuj n̄an kōm̧m̧ane kain̄i jab eo kōn mālim eo an Anij.

… Jon … kar likūt pā ko pein ioon [bōran Josep innām Oliver] im kar leļo̧k Priesthood eo an Aron ioerro [kajjojo] (lale K&B 13; Josep Smith—Bwebwenato 1:68–69). … Ilo jem̧ļo̧k in ļo̧k Māe ak jino in Juun 1829, Melkisedek, ak Priesthood eo, eutiejļo̧k kar leļo̧k ioon Josep im Oliver jān Rijilōk Piter, Jemes, im Jon.

Ukook eo an Bok in Mormon eaar barāinwōt dedeļo̧k ilo Juun jab eo, im bok eo kar kōm̧m̧ane ilo M̧aaj 26, 1830. … Raan ko tokālik, ilo Eprōļ 6, Kabun̄ eo eaar ejaak. … Āinwōt kar kanaan jān Paul, Kabun̄ eo etto an Kraist eaar bar juon alen jutak ioon laļ in.

Bōtaab jerbal eo an Jepļaaktok eo ejjan̄in de kar jem̧ļo̧k. … [Kirtland Tampeļ eo, tampeļ eo m̧oktata kar ekka ilo tōre in bōk eddo in,] kar aje … ilo M̧aaj 27, 1836. Juon wiik tokālik, ilo Eprōl 3, juon kweilo̧k eaar kōm̧m̧an ie. Ļoor juon jar ekwojarjar im meļak, … Irooj Jisōs Kraist [eaar waļo̧k n̄an Josep im Oliver.] … Moses, Elias, im Elijah raar barāinwōt waļo̧k [ilo Kirtland Tampeļ eo] im [leļo̧k kii ko an priesthood] n̄an Josep (lale K&B 110).

Juon Jon̄ak n̄an Kōj n̄an Ļoore

Ro jeiū im jatū, jemaron̄ ke lo jon̄ak eo? Aolep iien ko reļļap an Jepļaaktok eo—Visōn eo M̧oktata, waļo̧kļo̧k eo an Moronai im wōnm̧aantak eo an Bok in Mormon, im jepļaaktok eo an priesthood eo, im waļo̧ktok eo an Jisōs Kraist [ilo] tampeļ kwojarjar eo An—kar waļo̧ktok jān jar. …

[Elōn̄ iien ko] iaar en̄jake kam̧ool eo ban kowane an Jetōb eo an Anij, āinwōt juon kijeek ebwil ilo būruwō, bwe gospel eo kōjepļaaktok em̧ool. … [Eļan̄n̄e kwojjab jeļā men kein kōn kwe make,] ikōņaan kwaļo̧k bōk kūr eo kar letok jān Moronai ilo Bok in Mormon: “Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar. Im jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k” (Moronai 10:4–5). …

… Ļoore waanjon̄ak eo an Josep Smith im jon̄ak eo an Jepļaaktok eo. Oktakļo̧k n̄an Irooj. Bukwelōlō ilo jar. Kajjitōk ilo Tōmak. Ron̄jake Jetōb Kwojarjar eo. … Im ilo etan Jisōs Kraist, ij kallim̧ur, “Eļan̄n̄e kom̧ij … kajjitōk ippān [Jemed Ilan̄] ilo tōmak, lōke bwe kom̧ naaj bōk, kōn niknik ilo kōjparok kien ko [an Irooj], em̧ool otem m̧ool men kein naaj kwaļo̧ki n̄an kom̧” (1 Nipai 15:11).