N̄an Un eo
Etke Anij ej kōtļo̧k tariņae?
Pija ko jān Getty images
Tariņae eļakkar m̧ōttan wōt bwebwenato kōn an armej ioon ļal in jān enan̄in kar jino in. Bōtaab Irooj, Irooj in Aenōm̧m̧an eo, eaar jab kōņaan bwe jān tariņaeik doon. Ej jan̄ n̄e armej ro an rej kālet n̄an jab iakwe doon im “er ejjeļo̧k aer en̄jake, im … dike bōtōktōkier make” (Moses 7:33), kakkure laļ kōn nana (lale Jenesis 6:11–13). Ro me nana eo aer ej bōktok tariņae n̄an laļ in naaj ekajet kōn jerbal ko aer.
Irooj eaar kakien armej ro An n̄an “unujiļo̧k tariņae im kabun̄bun̄ļo̧k aenōm̧m̧an” (K&B ko 98:16). Mekarta, n̄e laļ ko rej tariņae n̄ae doon, Irooj eaar barāinwōt ba bwe jet iien jej polel ilo kattōrak ņae baam̧le ko, laļ ko, im anemkwoj ko ad ņae kakkure, kōjerbal maron̄, im kakien (lale Alma 43:47; Alma 46:12–13; K&B ko 134:11). Im Armej ro Rekwojarjar ilo Raan-ko Āliktata ro rej pād ilo jarin tariņae ko an laļ ko aer rej pokake pedped eo an “tōl an kiin̄ ro, president ro, ripepe ro, im riekajet ro” (Laajrak in Tōmak ko 1:12).