Juon Katak Ekabwilōn̄lōn̄

Jān Elder Valeri V. Cordón

Jān Jiljilimjuonn̄oul eo

“Inaaj … kapeļļo̧k wūnto ko an lan̄, im lutōkļo̧k jeraam̧m̧an” (Malakai 3:10

Ke ikar rittoļo̧k ilo Guatemala, ekwe wōr juon an baam̧le eo aō m̧ōn kōm̧m̧an uniform in ikkure.

Jema ekar kōņaan bwe ajri ro ilo baam̧le eo am en tiljek ilo jerbal. Kōm̧ ekar jipan̄ e ilo m̧ōn kōm̧m̧an nuknuk eo. Ke ikar dik wōt emākijkij aō kar ioon jorāān. Aolep iien ij rube men ko otemjej! Ak ke ikar rittoļo̧k, jema ekar kōtļo̧k bwe in lale mejin in kōm̧m̧an nuknuk ko.

Jema ekar kōļļā wōņāān jerbal ko kōm̧ kar kōm̧m̧ani. Innām ej kajjitok, “Kwonaj ta kōn jāān eo am?” Iaar jeļā uwaak eo ejimwe: “Kōlļā juon m̧ōttan jon̄oul eo aō im kōjparoki n̄an aō mijen.”

Ke ekar 13 aō iiō, pejnej eo am ekar dikļo̧k an kōm̧m̧an jāān. Kōm̧ kar joļo̧k mejin in keke ko am. Ijjelo̧kin rūbukwi rijerbal ro, ekar wōr wōt dikļo̧k jān ļalem rijerbal ro. Rekar jerbal ilo etōn̄aak eo am ilo m̧weo imom̧.

Iien otemjej ij kōļļā juon m̧ōttan jon̄oul, ak ikar jab lukkuun meļeļe ewi jon̄an aorōk in. Innām ikar ekkatak juon katak ekabwilōnlōn. Juon jibbon̄ in Jādede ikar rōn an jinō im jema kōnono ilo anikien eo edik. Jema ekar ba n̄an jinō bwe ebwe jāān eo n̄an kōļļā juon m̧ōttan jon̄oul ak wia mōn̄ā. Ejabwe n̄an kōm̧m̧ane ruo iaan men kein. Iaar inepata. Ta eo jema enaj kōm̧m̧ane?

Jabōt eo ikar loe an jema leļo̧k juon envelope n̄an branch būreejtōn eo. Ekar kalet n̄an kōm̧m̧ane juon m̧ōttan jon̄oul! Ikar m̧ōņōņō bwe ekar, ak ikar barāinwōt inepata. Ta eo kōm̧ naaj mōn̄ā?

Jibbon̄ eo juon, jet armej rekar kōļļaļļaļ ilo kōjem̧ eo am. Rekar ba n̄an jema bwe eļap aer aikuj iuniform ilo iien eo em̧ōkajtata. Ekkā wōt an armej kōļļāik kōm̧ m̧o̧kta jān an wōrtar eo dedeļo̧k. Ak armej rein rekar kōļļāik jema raan eo, aaet m̧okta jān am kōm̧m̧ani iuniform ko!

Ilo juon wiik, ikar ekkatak juon katak eaiboojoj me ej pād ippa n̄an indeeo. Kien juon m̧ōttan jon̄oul ej jipan̄ kōj kalōk tōmak eo ad im kwaļo̧k ad kam̧m̧oolol n̄an Jemedwōj Ilan̄. Kōļļā juon m̧ōttan jon̄oul ej juon kōjeraam̧m̧an!