Mōn Wia Jori eo an Abuelo
Rijeje eo ej jokwe ilo Utah, USA.
“Ijela, kōjro ej aikuj āinwōt jori in,” Jimma ekar ba.
“Joļo̧k bōd bwe aolep iien ejjab pidodo n̄an ba,” (Al ko Al in Ajri, 98).
Miguel ej kōpeļļo̧k kōjem̧ eo ilo mōn wia jori eo an abuelo (jimman). Ej et bwiin nuknuk eo Abuelo ej jerbal kake. Ej juon iaan bwin ko enno ippān.
“Iakwe, Abuelo!”
Abuelo ej jilļo̧k im jin̄aki neen armej eo wia ioon juon peba. Eaar jab relōn̄tak. Ekar jab lukkuun em̧m̧an an Abuelo ron̄.
Miguel ekar jijjōt ilo juon jea in jerbal. Ekar kalimjeke nuknuk ko rōllōn̄ rej ekkarōk. Ej etōņake an Abuelo kōjerbal kajjojo iaan nuknuk, ilo an kōjerbal am̧a im būlaer ko an.
Kein jerbal ko ej kakeememej ļo̧k Miguel kōn bar juon men eo ej iakwe. Aolep iien Abuelo ej leļo̧k kijen Miguel tōn̄al n̄e ej jipan̄ karreo.
Ak Miguel ekar kwōle kiiō! Ejeļā bwe ejjab aikuj in ebbōk m̧ōn̄ā n̄e ejjab kajjitōk m̧okta, ak eļak lale Abuelo enej boub ium̧win jidik iien. “Bolen ijjab aikuj kōttar,” Miguel ekar ļōmņak.
Miguel ekkar edded ium̧win tebōļ eo im pukōt bato in tōn̄al ko. Ekar obrak kōn tōn̄aļ ko rennotata ippān—retōn̄al im bwil ippān chili pota! Ke ekar kōppeļļo̧ke, Miguel ekar en̄jake an jidik mijak. Ak tōn̄an ko rekar lukkuuj kaijjōļjōļ. Ekar ekairir im likūti ilo lo̧n̄iin.
Ejjab to jen iien eo armej eo ekar wia ekar etal. Abuelo ekar bōk juon mōttan nuknuk im jone ilo dān. Menin ej jipan̄ nuknuk kein bwe en emāeoeo im pidodo n̄an jerbale.
Miguel ekar mōkaj in wōt an warōnļo̧k tōn̄al eo. Innām ekar etetalļo̧k n̄an ijo Abuelo ej ped ie.
“Iakwe!” Abuelo ekar ba kōn juon ettōn̄dikdik. “Ij m̧ōņōņō kōn am itok im lotok n̄a.”
Miguel ekar atbakwōje Abuelo. Ej kōjatdikdik bwe Abuelo eban jeļā ke em̧ōj an kar m̧ōn̄ā tōn̄al. Miguel ekar joļo̧k inepata eo.
“Āinwōt kolukkuun boub rainin ke,” Miguel ekar ba, ilo an jitōn̄ļo̧k nuknuk ko. “Kwoj ke aikuj jipan̄?”
“In̄n̄ā! Komārōn ke jibwe tok tōreej ņe?”
Miguel ekar kajjieon̄ jibwe tōreej aitok eo. Ej likoje n̄an kōtaan pein. Ekar lukkuun pen.
“Wow, elukkuun kajoor.”
Abuelo ej ettōn̄. “Ej aikuj in, bwe en mārōn to an pād.” Abuelo ej kanōke tōreej eo ibōlōn nuknuk eo. Innām ej kōm̧m̧ane mejān āinwot an mama ba jet iien “Rimeletlet Abuelo” reitok.
“Kojelā, kōjro ej aikuj āinwōt jori in,” Abuelo ekar ba im emajadjad.
Miguel ekar kadik mejān n̄an nuknuk in. “Um. Jej aikuj?”
“Aaet, ejimwe. Jej aikuj kajoor. Bwe kapo ko an Setan ren jab kōm̧m̧an men in ad wotļo̧k.”
Tōn̄al eo ebūroro ekar itok n̄an ļōmņak eo an Miguel. Ejelā bwe ej aikuj ba n̄an Abuelo kake.
Aubelo ekar letok juon jori emo̧r jān jāļōb eo ilōn̄. “Kwoj ke loe ro̧n in ekilep?”
Miguel emaron̄ kar likūt pein ilo ro̧n̄ in. “Aaet.”
“Ro̧n̄ ekar dik emaron̄ kar pidodo ad kōm̧m̧ane. Ak rekar kōttar, im kiiō enaaj pen n̄an kōm̧m̧ane. Imminene ko renana im kālet ko rebōd rej āinwōt ro̧n̄ in. Em̧m̧anļo̧k n̄e jenaaj kōm̧m̧ane iien eo em̧ōkajtata.
Abuelo ekar bar emajadjad, im Rimeletlet Abuelo ekar bar ettōn̄dikdik. Rekar bwebwenato ilo an Abuelo jerbal. Aolepān iien eo, Miguel ekar ļak ļōmņake tōn̄al būroro eo.
Ke ekar m̧ōj an Abuelo jerbal, Miguel ekar jipan̄ e karreo. Innām Abuelo ekar jibwetok nien tōn̄al eo.
Āliktata Miguel ekar jab maron̄ dāpiji. “Ikar bok juon tōn̄al!” ekar buuļ ba.
Abuelo ekar likūt nien tōn̄al eo laļ. “Ta eo kwoj ba?”
Miguel ekar ba kōn an kar ebōk tōn̄al ak ekar jab kajjitōk. “Joļo̧k ao bōd, Abuelo! “Iban bar kōm̧m̧ane, ij kalimuur!”
Abuelo ekar atbakwōje Miguel. Miguel ekar em̧m̧an an mour.
“Kom̧m̧ool kōn am kwaļo̧k mool. Aorōkļo̧k menin in ippa jān aolep men.”
“Ilo ial eo ļo̧k n̄an mweo, Miguel ekar en̄jake āinwōt jori ko rekāāl an Abuelo. Kajoor im pojak n̄an mour in!