Lem̧ōņōņō: Eļapļo̧k jān Tammwin
Kar katakin kōj bwe bōk lan̄lōn̄ ej unin leplep eo an ad mour (lale 2 Nipai 2:25). Kōn menin etke lem̧ōņōņō jet iien ekanooj in āinwōt epen? Bōlen kōnke jejjab meļeļe ta eo lukkuun meļeļe in lem̧ōņōņō… im ta eo ejjab.
Ta In Lem̧ōņōņō?
Ilo jon̄an eo epidodo tata, lem̧ōņōņō ej utiejān jekjek in kōļmenļo̧kjeņ eo am̧ ekadu kitien n̄an juon jon̄ak eutiejļo̧k jān jokkun en̄jake bajjōk eo am̧.1 Ilo bar juon wāween ba, ej meļeļe in en̄jake em̧m̧an.
Ekanooj lōn̄ wāween ko n̄an kōm̧m̧ane juon en̄jake em̧m̧an—kōm̧m̧an kōjak ippān juon m̧ōttam̧, ikkure juon ikkure eo ekōjak, ak em̧ool kan̄ juon m̧ōttan cheesecake—bōtaab ejjam̧in aitok kitien. Emakijkij an m̧ōkaj ad etal jān juon jekjek in m̧ōņōņō n̄an bar juon ilo ad kajjieon̄ bar akjo̧kwe tok en̄jake eo eutiej. Bōtaab ejjab lem̧ōņōņō eo ej aitok kitien ke?
Aaet—bōtaab eļapļo̧k meļeļe eo jān am̧ ļōmņak, eo ej etke emakijkij ad likjab n̄an bōke. Laļ in ej jiron̄ kōj bwe mour eo ewōr tokjān aikuj in obrak kōn kalimomo, bwe raan ko am̧ rej aikuj obrak kōn jab inepata im kalimomo ko ejjeļo̧k jem̧ļo̧kier. Bōtaab m̧ool eo ej, kwojjab aikuj kalimomo eo ejjab bōjrak n̄an am̧ maron̄ “mour ilo juon wāween elem̧ōņōņō” (2 Nipai 5:27). Lem̧ōņōņō eaitok kitien ta eo jemaron̄ ņa etan lem̧ōņōņō em̧ool—ej juon en̄jake eikōn̄, edim an mour em̧m̧an iijello̧kin an juon en̄jake ealikkar an lemōņōņō ekajoor. Kam̧ōņōņō im m̧ōņōņō rej makunļo̧k, bōtaab lem̧ōņōņō em̧ool ejjab juon tammwin ej ilo̧k—eaitokļo̧k wōt kitien jidik. Eļan̄n̄e en̄jake m̧ōņōņō ej ļōbat en̄jake ko am̧ ilōn̄ in jokkun wōt juon eo am̧, bōk lem̧ōņōņō eo em̧ool ej āinwōt ļōbat jokkun wōt juon eo make.2
Komaron̄ ļōmņak bwe lemōņōņō eo edim ej aikuji jeraam̧m̧an eo edim im anemkwoj eo jān metak ak mālijjon̄ ko. Bōtaab ekkatak ko rej kwaļo̧k bwe jekjek ko rem̧m̧an ejjab kajju letok lemōņōņō, im ko rejjab em̧m̧an rejjab bōbraik er. Ijello̧kin, ilubwilijin aolep un ko me rejelet lemōņōņō eo am̧, kālet ko am̧ rej jet iaan im̧we ko reļļaptata.3 Elder Ulisses Soares jān Būreejtōnji eo an Jiljilimjuonn̄oul eo eaar katakin“Lem̧ōņōņō ej kōmlet jān iminene ko, m̧wil ko, im jon̄an ko an ļōmņak me jemaron̄ kajjuon ņa mejļaer kōn m̧akūtkūt eo ļōmnņake.” Lem̧ōņōņō eļapļo̧k jān juon baj tammwin em̧m̧an ak juon mour ejjeļo̧k inepata—ej juon wāween ļōmņak im mour me jemaron̄ kōjbwebweik. Jon̄ak ko tammwin em̧ool rej jeleti jān bōdan̄ im ad kar rūttotak, bōtaab kālet ko an juon make eļap ijo kuņaan. Ilo kōkaduki, “lem̧ōņōņō ej juon kālet me jabdewōt emaron̄ kōm̧m̧ane.”4
Ekōjkan Aō Maron̄ Erom M̧ōņōņō?
Kōn menin ekōjkan ad lukkuun in kōm̧m̧ane “kālet” eo n̄an erom m̧ōņōņō? Ta jekjek eo jab jeļā kake jān elōn̄ armej n̄an lem̧ōņōņō eo ad? Āinwōt an Elder Soares kar kōmeļeļeik, lem̧ōņōņō eo em̧ool ej aikuj “juon kijejeto an kijenmej n̄an juon men eo eļapļo̧k an aorōk ilo mour.” Āinļo̧k wōt, Viktor Frankl, juon eo eaar mour jān kakkure an kijeek im juon taktō in lale rinan̄inmej in kōļmenļo̧kjeņ eo ebun̄bun̄, kar kwaļo̧k bwe lem̧ōņōņō ej “men eo ej waļok jān kijejeto an juon make n̄an juon eddōkļo̧k eļapļo̧k jān juon make.”5
Im ta eo emaron̄ in juon eddōkļo̧k eļapļo̧k jān eo Anij eaar kōm̧anm̧ane n̄an kōj? Ilo ad kappukōt lem̧ōņōņō eo, jej aikuj jab etal ettoļo̧k jān karōk eo an Jemedwōj Ilan̄. Ālkin men otemjej, ej ņa etan “karōk in m̧ōņōņō” kōnke ewōr unin! (Alma 42:8, 16). Elōn̄ jeje ko rekwojarjar rej kam̧ool bwe ļoor karōk eo an Anij ej bōktok lem̧ōņōņō (lale 2 Nipai 2:13; Helamōn 13:38). Men̄e mour jim̧we ejjamin naaj kadeoor kōj jān aolep en̄jake an rup bōro, enaaj likūt kōj ilo juon jekjek me em̧m̧anļo̧k ad maron̄ en̄jake lemōņōņō ilo mour in, im ej tōlļo̧k kōj n̄an mour āinwōt Anij im lan̄lōn̄ indeeo ilo laļ eo ej itok.
Āinwōtļo̧k wōt tōmak, lem̧ōņōņō emaron̄ m̧ōjņo̧ļo̧k ak kajoorļo̧k, pedped ioon m̧akūtkūt ko ad. Eļan̄n̄e kwoj joļo̧k am̧ iien pukōt kalimomo eo an jidik wōt iien, am̧ lem̧ōņōņō enaaj “m̧akūtkūt kōn jabdewōt kōto” (Epesōs 4:14). Ak eļan̄n̄e kwoj kajjieon̄ mour jim̧we, kwonaaj ejake juon kōļmenļo̧kjeņ edim an aenōm̧m̧an eo eaorōk im em̧m̧an eo me emaron̄ wōnm̧aanļo̧k wōt jekdo̧o̧n jabdewōt ļan̄. Im n̄e kwoj kaorōk tōmak eo am̧ ioon kalimomo, komaron̄ lo lan̄lōn̄ eo em̧ool—kain eo me maron̄ loe wōt jān “ej m̧ool in ukeļo̧k im rittā ilo pukot m̧ōņōņō” (Alma 27:18).