En̄jake Aō Bar Pād ilo Kapijuknen eo Aō

Judy Rascher, Colorado, USA

Iaar jab pojak n̄an kūr eo an būratōr eo aō. Eaar ba, “Mam̧a ej kab jako,” ekar ba. “Eaar wōtļo̧k im kaj bōran.”

Iaar ilbōk. Jinō ejako, im ej kab m̧ōj aō kōnnaan ippān bon̄ōn eo juon. Ikab de kajjitōkin eō make etke eaar tin waļo̧k. Ijjab maron̄ meļeļe etke eaar ilo̧k jen eō. Iaar illu! Iaar libobo ioon aō illu ium̧win jet wiik.

Aaet, iaar ļōmņak in joņae wōn. An Anij bōd. Eaar m̧ōkaj an bōk e jān n̄a. Ejako aolep ememļo̧kjeņ ko ilo mour eo aō ippān jinō, im iaar ļōmņak kōnke E. Iaar juon uwaan membōr in Kabun̄ in tōre eo, ak iaar juon Rikūrijin eo ewūjlepļo̧k. Ijelo̧kkin reilo̧k n̄an Anij kōn kajoor, iaar oktakļo̧k jān E im joļo̧k E jān mour eo aō.

Iaar lukkuun oon̄ kōn jinō. Ke iaar rūttoļo̧k, m̧weeo im̧ō ippān ro jinō im jema eaar juon jikin kōjparok. Jekdo̧o̧n ia eo ij pād ie ak ta eo ij kōm̧m̧ane, aolep iien ij bwebwenato ippān jinō ak joļo̧k iien ippān, iaar en̄jake aō pād ilo kapijuknen eo aō. Bwe kiiō “ilo m̧weeo” iakwe eo iaar en̄jake ejako.

Iiō ko rem̧ootļo̧k, iaar nan̄in luji tōmak eo aō. Iaar kajjieon̄ meļeļe etke jinō eaar mej, ak ejjeļo̧k men en eaar bōktok n̄an eō aenōm̧m̧an. Innām, enan̄in juon wiik, kōļmenļo̧kjeņ eaar bar itok n̄an eō: Ij aikuj kappukot jipan̄ jān lan̄. Ikar jiron̄ļo̧k eo m̧ōtta ejiten bōro eo eaar juon membōr in Kabun̄ in. Eaar kajjitōk eļan̄n̄e ikōņaan jeļā eļapļo̧k kōn tōmak eo an.

Iaar jab kile jinoin, ak Jetōb eaar karuj aō jān juon kiki eļap. Toon wōt aō kar katak kōn gospel in, eaar toon wōt aō kar lo jikin eo ejokne. En̄jake eo “ilo m̧weeo” eaar bar ro̧o̧ltok.

Iaar peptaij ilo Māe 2013. Ij kam̧m̧oolol bwe tōmak eo aō ej ro̧o̧ltok. Iaar jab bar oktakļo̧k jān Irooj. Ijoke, iaar bōk E. Ij būrom̧ōj wōt kōn jako eo an jinō, ak kōn tōmak eo aō ilo Anij, ijeļā bwe inaaj juon raan pād “ilo m̧weeo” ippān jinō im jema indeeo.