Ngkai Ti Waaki Nako ni Bootaki

Iroun Beretitenti Russell M. Nelson

Tariu ao mwaneu aika kam tangiraki, I nanorinano ngkai I mena ibuakomi n te moaningabong aei. Aua te bong n nako ti tauna te mwaane ae moan te korakora, ana burabeti te Atua—Beretitenti Thomas S. Monson. Akea taeka aika a na kona n tei raoi ibukin ke ni katamneia maiuna ae moan te kakawaki man tikiraoi. N na bon aki mwaninga ana tangira ao ara iraorao ma te kakaitau ibukin te bwai ae reireinai. Ngkai ti riai n taraa te tai ae imwaira ma te onimwaki ae bwanin iroun ara Uea Iesu Kristo, are bon ana Ekaretia aei.

Uoua te bong n nako a bane ni bootaki Abotoro aika maiu n ruun te Salt Lake Tembora are mai ieta. A karaoa te babaire ae boraoi ikekei, te moan, ni manga katean te Moan Beretitentii ngkai ao, te kauoua, bwa N na riki bwa ana Beretitenti te Ekaretia. Aki tau taeka n tuangi ngkami tera aron te namakin ni karekeia Tariu—Taari aika iai irouia ni kabane kiingin te nakoanibonga ae kaokaki rinanon te Burabeti Iotebwa Timiti n te bong aei—katokai baia iaon atuu ni katabuai ao ni kaokoroai bwa ana Beretitenti te Ekaretia. Bon te waaki ae tabu ao ni kananorinano.

E riki ngkanne bwa tabeu ni kaokoroia naake e a tia te Uea ni katauraoia bwa a na riki bwa au kauntira. N na kanga n rineia ti uoman mai ibuakoia Abotoro ake Tengaun ma Uoman ake tabeman, ake I rangin n tangiriia n tatabemaniia nako? I rangin ni kakaitau nakon te Uea ibukin kaekakin au tataro n tangira. I rangin ni kakaitau bwa Beretitenti Dallin Harris Oaks ao Beretitenti Henry Bennion Eyring a tauraoi ni beku ma ngai bwa te Moan ao te Kauoman ni kauntira. E a tia Beretitenti Dieter F. Uchtdorf n teirake n nakoana n te Kooram n Abotoro n te Tengaun ma Uoman. E a kaman tia ni karekei tabena aika kakawaki ibukin aika e bon tau nako iai.

I kaota te karinerine nakoina ao nakon Beretitenti Eyring ibukin aia mwakuri ae moan te tamaroa bwa kauntira nakon Beretitenti Monson. A tia n rangin ni konabwai, mwakuri korakora, ao ni kairaki mai ieta. Ti rangin ni kakaitau ibukiia. Iai nanoia ae korakora ngkai ni mwakuri n te tabo are e rangin ni kainnanoaki iai.

Ao te Abotoro are te kauoman ni maan Beretitenti Oaks e riki ngaia bwa te Beretitenti n te Kooram n Abotoro n te Tengaun ma Uoman. E ngae n anne, n anganakina nakoana n te Moan Beretitenti ao ni boraoi ma ana kaetieti te Ekaretia, Beretitenti M. Russell Ballard, are te kauoman ni maan, e na riki bwa te Bonomwi ni Beretitenti n te kooram anne. A na ikarekebai ni mwakuri korakora kaain te Moan Beretitentii ma te Tengaun ma Uoman n ataa ana kaantaninga te Uea ao ni wakina Ana mwakuri ae tabu.

Ti rangin ni kakaitau ibukin ami tataro. Ake a tia n anga ni kabuta te aonaaba ibukira. N te moaningabong imwiin maten Beretitenti Monson, teuana te tataro are e karaoaki iroun te ataeinimwaane ae aua ana ririki ni maiu ae arana Benson. I taekin mwakoro aika rineaki man ana reta tinana are koreaki nakon kainabau, Wendy. E tataro Benson, “Te Tama are i Karawa, ko rabwa bwa e a kona Beretitenti Thomas S. Monson ni manga noora kainabana. Ko rabwa ibukin ara burabeti ae boou. Buokia bwa e na ninikoria ao n aki maaku ngkai e boou. Bukoia bwa e na rikirake ni marurung ao ni korakora. Buokia bwa e na karekea te mwaaka bukina bwa iai irouna te nakoanibonga. Ao buokiira bwa ti na raoiroi n tainako.”

I karabwa te Atua ibukiia ataei n aron aei ao ibukiia kaaro aika a kabanea nanoia nakon aia motinnano nakon te raoiroi, te nano ni karokaro—ibukiia kaaro, taan reirei, ao kaain te aro aika a uoti rawawata aika korakora ao a bon teimatoa n iai nanoia ni kan beku. N taekana riki teuana, ibukimi n tatabemani ngkami, I rangin ni kakaitau ma te nanorinano.

Te Uea ngaia ae e Kairiiri

Ngkana ti bane ni waaki rake, I kaoi ngkami bwa kam na iangoa te katei ae karinerine are e tararua iai Ana Ekaretia te Uea. Ngkana e a mate te Beretitenti n te Ekaretia, akea te bwai ae raba bwa antai ae e na weteaki imwiina nakon te mwakuri anne. Akea te bwai ae na karaoaki, akea te anainano, ma ti mwakuri n te babaire aika nakoraoi mai ieta, aika katukaki iroun te Uea.

Ni katoa bong n ana mwakuri n ibuobuoki te Abotoro bon te bong ni kamatebwai ao ni katauraoi ibukin mwakuri riki tabeua nakon taai aika a na roko. E kabanei ririki aika mwaiti n te mwakuri ibukin te Abotoro ni mwaing man te kaintekateka n ataei nakon te kaintekateka ae a maan riki inanon te kamronron. N te tai anne, e karekei moan atatai te abotoro n ana mwakuri te Ekaretia. E moanna naba n taneiai ma kaain te aonaaba, n ikotaki ma rongorongoia, aia katei, taetae ngkai katabeana e uotia ni kabutaa te aonaaba. Te waaki ae nakoraoi aei n te waaki ni kairiiri n te Ekaretia e onoti. Akea te bwai ae I ataia n ai arona. E na aki kamimiira te bwai anne, bukina bwa aio ana Ekaretia te Uea. E aki mwakuri n ai aroia aomata.

I a tia ni mwakuri n te Kooram n Abotoro n te Tengaun ma Uoman iaaia niman Beretitenti n te Ekaretia ake mai imwaina. I a tia ni matakuakiniia Beretitenti n tatabemaniia nako ni karekei kaotioti ao kaekaan te kaotioti anne. Te Uea e a tia ao E na kaetiia ao ni kairiia n tainako mai ieta Ana burabeti. Te Uea ngaia ae e Kairiiri. Ngaira kaain te Moan Beretitentii n Abotoro n te Tengaun ma Uoman ti a tia ni katabuaki ni kaota koauan Arana ni kabutaa te aonaaba e na teimatoa ni ukeuke n ataa Ana kaantaninga ao n iria.

Tiku iaon te Kawai ae e a tia ni Beritanaki

Ngkai, n na kangai nakoia kaain te Ekaretia n tatabemaniia nako, teimatoa iaon te kawai are e a tia ni beritanaki. Am motinnano n ira te Tia Kamaiu man karaoan berita aika tabu ma Ngaia ao ni kawakin berita aika tabu aikanne e na kauka te mataroa nakon kakabwaia n tamnei ni kabane ao te tai ae tauraoi nakoia mwaane, aine, ao ataei n taabo ni kabane.

Ngkai kaain te Beretitentii aika boou, ti tangiria ni moanna ma tokina n ara iango. Ni bukina aei, ti taetae nakoim n te bong aei man te tembora. Te kouru ae ti bane ni uaiakinna bon te entaute ma te mwaaka n ana auti te Uea, ni kabaeaki bwa utu, kakaonimaki nakon berita aika a karaoaki n te tembora are e katauiira ibukin ana bwaintituaraoi te Atua ae te kabanea n tamaroa—anne are bon te maiu are akea tokina. Otenanti n te tembora ao berita aika tabu aika ko karaoi ikekei bon kiing ni kakorakorakin maium, am mare ao am utu, ao am konabwai ni kaitarai ana mwakuri te tia kakaitara. Am tataro n nebonebo n te tembora ao am mwakuri n ibuobuoki ikekei ibukiia am bakatibu e na kakabwaiako ma rikiraken am kaotioti ao te rau ao e na kakorakora am motinnano n teimatoa iaon te kawai ae e a tia ni Beritanaki.

Ngkai, ngkana ko aki kakaonimaki, I kona ni kaoko bwa ko na oki ma te kaantaninga ni kabane inanou n taiaoka n oki. Tera nako tabeaiangam, tera nako am kangaanga, iai nnem n aei, n ana Ekaretia te Uea. Ngkoe ao te roro aika a tuai bungiaki a na kakabwaiaaki n am mwakuri ngkai n oki nakon te kawai ae e a tia ni beritanaki. Tamara are i Karawa e kakukureia Natina, ao E tangiriira ni kabane bwa ti na oki nakoina. Aio ana kouru Ana Ekaretia Iesu Kristo Ibukiia Aika Itiaki ni Boong aika Kaitira—bwa E na buokiira n tatabemaniira nako n oki nakon mweengara.

I kaota au tangira ae korakora ibukim—te tangira are e a tia n rikirake inanon ririki aika mwaiti ni kaitibo ma ngkoe, n taromauri ma ngkoe, ao ni beku ibukim. Katabeara mai ieta bwa ti na nakon aaba, reeti, neewe, ma aomata ni kabane, ni buokiia ni katauraoa te aonaaba ibukin Kauaokin te Uea. Aio ti na karaoia ma te onimaki iroun te Uea Iesu Kristo. Aio Ana mwakuri ao Ana Ekaretia. Boni ngaira Ana Toro.

I katanoata nanou ae korakora nakon te Atua Tamara ae Akea tokina ao nakon Natina, Iesu Kristo. I kinaia, I tangiriia, ao ni berita bwa N na beku Ibukiia—ao ngkoe—ma nikiran ikeikeu ni kabane maiu. N aran Iesu Kristo ae tabu, amen.