Ni Karokoa Ti A Manga Kaitiboaki
Kakoauan te Mangauti
Iroun Unimwaane D. Todd Christofferson
Man te Kooram n Abotoro n te Tengaun ma Uoman
Man te taetae are kanakoaki n te maungatabu ni kabuta n Eberi 2014.
Iesu Kristo bon ti te ara ke te kawai are e na karekea te kamaiuaki nakoia natiia aomata.
Kamataata n te tamnei iroun Yajaira Ramos
Iangoia teutana te tai kakawakin te Mangauti n iangoakin kinaakin raoi Iesu Kristo are te I-Natareta ao taian kakauntaeka ao titiraki n te maiu. Ngkana arona bwa e mangauti Iesu, ngkanne E bon riai bwa bon kain karawa. Akea te aomata ae mamate ae iai irouna te mwaaka ni manga maiu riki imwiin ae e a tia ni mate. Ibukina bwa E a mangauti, e na aki kona Iesu n riki bwa te kabenta, te tia reirei, te rabi, ke te burabeti. Bukina bwa E a mangauti, Iesu e na riai n tia n riki bwa te Atua, riki Ana Rikitemanna te Tama.
Ngaia ae, tera ae E taekin e boni koaua; e aki kona ni kewe te Atua.
Ngaia ae, Ngaia bon te tia Karika te aonaaba, E taku.
Ngaia ae, karawa ao mone a bon koaua, n aron are E reirei.
Ngaia ae, iai te aonaaba n tamnei, are E kawaria imwiin Matena.
Ngaia ae, E na manga roko riki, n aron are a taekinna anera, ao “e na tautaeka i aon te aonaaba” [Taekan te Onimaki 1:10].
Mangaia ae, iai te mangauti ao te kabanea ni motikitaeka ibukiia aomata ni kabane.
Ibukin koauan Mangautin Kristo, raraoma ibukin mwakan ni kabane, ana taneiai ni kabane, raoiroin te Atua te Tama—are E anga Ana Rikitemanna ibukin kamaiuan te aonaaba—aki kona ni koaua. Raraoma iaon nanon ao te kantaninga n te maiu a bane ni bure. Iesu Kristo bon ti te ara ke te kawai are e na karekea te kamaiuaki nakoia natiia aomata. Ana akoi Kristo e bon koaua, ni kona ni kabooa te kabwarabure ao kaitiakan te tia bure are e raira nanona. Te onimaki ni koauana e raka riki nakon te iango ke te bwai ae ti karekea man ara iango. Iai te koaua ae bwanin ao e tabangaki n te aonaaba, ao iai katei aika raraoi n aki bibitaki, n aron are e reiakinaki Irouna.
Anganakira koauan Mangautin Kristo, te rairannano man uruakakin Ana tua ao tuua a kona n riki ao ni kawaekoaaki. Ana kakai te Uea a boni koaua, n aron Ana berita nakoia Ana reirei bwa a na kona ni karaoa ae aron anne ao mwakuri aika korakora riki. Ana Nakoanibonga bon te mwaaka ae koaua are “e kamwakura te euangkerio ao n taua kingiin bwain te abanuea aika raba, are kiingin te atatai ibukin te Atua. Ngaia are, e kaotaki mwaakan te aro n Atua n taian otenanti mai iai” [R&B 84:19–20]. Anganakira koauan Mangautin Kristo, te mate tiaki tokira, ao e ngae ngke “e kamaunai [rabwatara], ao [ti] na bon noora naba te Atua ngkana [akea] irikora” [Iobi 19:26].