Karekea Kinaakin te Tia Kamaiu
E maeka te tia korokaraki i Utah, USA.
Ngkai ko reiakina rongorongon Iesu Kristo, ko kaoa Ana rau ao rokona inanon maium.
Kabwarabwara man A Nga Ake Ruaman, iroun Liz Lemon Swindle
Iangoa warekan ni kabane taekan te Tia Kamaiu ni koroboki aika a tabu—te Baibara ae tabu, ana Boki Moomon, Reirei ao Berita aika Tabu, Bwaeao ae Bati Boona. Taekina te tai ao te mwakuri ae bati! Ma inanon Tianuare 2017, Beretitenti Russell M. Nelson e anga te kakaewenako bwa ti na ti karaoa aei—ni kamatebwai bwaai ni kabane are e taku Iesu ao ake e karaoi ni booki aika kariaiakaki. Beretitenti Nelson e taekinna bwa karaoan te mwakuri aei e na karikia bwa te “aomata ae kaokoro.” E na aki tii reiakina riki taekan Iesu Kristo ma e na namakina kabaeakina ae boou nako Ina.1
Ngkoe naba ko kona ni kaan riki nakon Kristo ngkai ko reirei mai Irouna. Kamatebwaia maiuna ao ana kantaninga ao kaoa Ana rau inanon maium ao e na buokiko n nakoina ao n kinaa Tamara are i Karawa. Noora aroia kairake aikai ni kaekai titiraki aika uoua: (1) Tera karakinan te Tia Kamaiu ae ko tatangiria ao bukin tera? (2) Ao e kanga kamatebwaian te euangkerio ni uota te rau nakoim?
I tatangira rongorongoia rebera ake 10 ibukina bwa Kristo e kaota te tangira ae mwaiti nakoia rebera ake a karabwa. E taku, “E kamaiuko am onimaki” (Ruka 17:19; taraa kibu 11–19). I tangira ana akoi ae takaburinako are E kaotia nakoia aomata nako.
Ibukina bwa tabeua rongorongon au reirei, ni kabane ake ikekei iai kainnanoia n tangira te rau ao te karaunano. Ia tia ni karekea te korakora ao te rau rinanon au kamatebwai n te tieminari. Taan reirei n te tieminarii a karaoi koroboki aika a tabu ao te euangkerio bwa e na rang bwainaki irouia aomata nako. E rang tamaroa aron nooran te kaokoro n te tieminari n te umwanreirei ni kabotauaki ma ae bon te kiraati ae kakaraoaki. Iai te namakin ae kakokoro ikekei are e uota te rau.
Gabriel S., ana ririki 16, Colorado, USA
Karakinan Aramwa n taekan te onimaki ao ana taeka te Atua (taraa Aramwa 32:18–43) e a tia n reireinai bwa ngkana ti unika te tangira, ti na karekea te tangira. N aron are e kabwarabwara Aramwa nakoia Tioromwaite, te onimaki kaanga ai aron te koraa. Bon kakoauana bwa e koaua te bwai teuana n aki roko ikekei n noria. E rikirake te onimaki ngkana te aomata iai nanona ni kan kakoaua ao n ongo n ana taeka te Atua. Ao ni kabane aikai e a tia ni buokai bwa N na rau, kakorakora nanou, ao ni karekea au koaua bwa Tamara arei i Karawa e noorai ni matana n tangira ao n nanoanga.
Ngke I kamatebwai koroboki aika a tabu ni katoabong, I matata riki n ana tangira ara Tia Kamaiu ibukira n tatabemaniira. Te atatai aei e buokai ni kabwarabwara nakoia raoraou n te reirei bwa a aki maroa ngkana iai aia kaangaanga ibukina bwa iai te Atua ae e tangiriira.
Maria D., ana ririki 17, Guadalajara, Spain
Inano: Kristo ao Ataei n Ana Boki Moomon, iroun Del Parson
I tatangira n 3 Nibwaai 17 ngke e roko te Tia Kamaiu i Amerika ao e kaoia ataei bwa a na nakoina. E tekateka ma ngaiia ao e kabanea ana tai ma temanna imwiin temanna. Anne bon te karaki ae kakaongora irou are e kaota aron Iesu Kristo a mwaitin ana tangira ibukira n tatabemaniira. I kakoaua bwa E na bon tekateka naba irarikira ngkana ti kainnanoa Ana ibuobuoki.
N te ririki aei I kaewenakoai bwa N na wareka teuana te iteraniba man koroboki aika a tabu ni katoa bong. Ngkai I karaoa anne, N na rikirakei n ni kan kakaraoia ni katoa bong. I a tia n reiakina ae mwaiti man ana taeka ao man karaki man koroboki aika a tabu ngkai I kataia ni kabanea au tai n kan oota mai iai, ao Ia kaniiaki riki nakon Tamara are i Karawa ao te Tia Kamaiu ngkai I reiakina ae mwaiti mai irouia. Anne ae e uota te rau ae mwaiti inanon maiu.
Anna C., ana ririki 17, mai Montana, Amerika
I tatangiria ngke e roko Kristo i Amerika, e titiraki ngkana iai ae e aoraki ke ae e korakai ibuakoia, ao imwiina e kamarurungiia. Imwiina E kakabwaiaia ataei aika a uarereke. (Taraa 3 Nibwaai 17.) I taku bwa bon te karaki ae rang kan ae rang korakora. I tatangiriia ataei aika a uarereke, ao I kukurei ngkana aomata a anganiia riki te tangira ae bati, ibukina bwa ataei a rang n itiaki. Te karaki e kaotia nakoia ana Tangira te Tia Kamaiu ae nano ibukira. Ngkai E tangiriia aomata n taai akekei ngkanne e tau ni karaoi ni kabane ake E karaoi, E kona n tangiriira naba n te bong aei.
Itaia 53:3 e taku bwa te Tia Kamaiu“bon te aomata ae nanokawaki,, aoe ataa naba te rawawata.” Ngkana I iangoa ana Mwakuri ni Kamaiu Kristo, tera are E rinanona ibukira, ao arou are E kona iai ni kabwaraaki au bure ngkana I raira nanou man au bure, I namakina raoi te rau. Mwaitiia aomata n ana Boki Moomon—natin Motiaea, Amon, ao Aramwa te teei—iai rongorongoia aika aki raraoi n taai ake mai imwaina, ma a kabwaraaki aia bure. A rairaki nakon Kristo, rairinanoia, ao a riki bwa banna ni katoto aika raraoi ake ti a kona n reireiaki mai iai ni boong aikai. E karaunano irou ataakina bwa I kona naba ni kabwaraaki au bure.
Alina T., ana ririki 18, Oregon, Amerika
Te karaki ae I tatangiria ni koroboki aika a tabu bon rongorongon Iesu ngke E bita te ran nakon te wain n tain te mare, are e tuangnga tinana (taraa Ioane 2:1–11). Aio raoi ae I tatangiria te karaki are e kaota ana karinerine Iesu nakoia aine ao riki bon tinana. Te karaki aei e kaungaia ataei bwa a na ongotaeka irouia aia karo, tiaki ibukina bwa a maaku ma bon man aia tangira ae bane nanoia iai. Ana banna ni katoto Iesu Kristo bon ngaia are aomata ni kabane a riai ni kataia ni katotonga. Ana tangira nakon tinana e aki kona n toki, ao ai aron naba ara tangira nakoia ara karo. Bon ngaia naba ae I tatangiria ibukina bwa Ana kakai bon karaoan te mwakuri, ao ti kona naba ni karaoi kakai man buokakiia tabeman.
Te karaki aei ao karaki ake tabeua man koroboki aika a tabu a tia ni uota te rau nakoiu. E rang karaunano ataakina bwa ngkana I kataia n tainako n reirei mairoun Kristo ao n irii Ana reirei, I kona n okira Tamara are i Karawa ae tangira n te bong teuana.
Anne R., ana ririki 17, mai Victoria, Aotiteria
I tangira karakinan Kristo are e nakonako iaon te ran. E nakonako nakon te booti are a bane iai ana Abotoro, ao e kaoa Betero bwa e na nakoina iaon te ran. Betero iai ana onimaki n te moan tai ao e kona n nakonako iaon te ran, ma imwiina e bua ana onimaki ao e a tabe naba n iinako. Imwiin Kristo e anganna baina bwa e na taua (taraa Mataio 14:25–33). Te karaki e rang onoti irou ibukina bwa Kristo n tainako iai ana ibuobuoki inanon maiura—E kataniira.
Au kamatebwai e buokai ibukina bwa I kamatebwai n te moaningabong ao e katamaroa riki au bong. Ngkana I aki kamatebwai, e aki nakoraoi au bong ke ni kukurei—e bon aki karekea te namakin ae raoiroi. Ngkana I wareki au koroboki aika a tabu n tatainako n te moaningabong, au bong a taraa n tamaroa riki ibukina bwa I kaoa te Tamnei ae Rairoi bwa e na raonai inanon te ngaina.
James K., ana ririki 17, mai Alaska, Amerika
Te Mwakoro man Kristo ao te Kaubwai n Ataei ae Tautaeka, iroun Heinrich Hofmann
I tangira rongorongon Kristo ao te ataeinimwaane ae kaubwai (taraa Mareko 10:17–22). E anganai te iango ae bati ao te taratara ibukin moanibwaian te Atua ni bwaai ni kabane. Ngkana ko tuangaki bwa ko na kabonakoi am bwai ni kabane bon te bwaai ae rang ni kangaanga ni bon nakoira ni kabane. Ma I taku bwa ngkana ko tauraoi ni moanibwaia te Atua iaon am bwai ni kabane bon teuana te bwai are ti riai n reiakinna ngaira ni kabane n maiura. Ana tangira Iesu Kristo ibukira ni kabane e bon rang mwaiti. E bon rang n tamaroa riki nakon mwaitin te mwane ke ara bwai are ti karekei n te maiu aei.
Warekan koroboki aika a tabu e uota te rau ao te mwengaraoi, n raonaki naba n te wanawana ae korakora ao te ataibwai. E ngae ngke I aki namakina n tainako te mwaaka ni waekoa ni kamatebwaia koroboki aika tabu, I ataia bwa warekan koroboki aika tabu e bita maiu ao e buokai n namakina te Tamnei ao ni kinaa Ana wirikiriki.
Yuzhen C., ana ririki 19, mai Taichung, Taiwan
Inanon Te Aine are E Riinga Buruburun ana Kunnikai Kristo, iroun Heidi Daynes Darley
Ngkai Kristo iaon Kawaina n noora te ataeinnaine ae e a kan mate, te aine ae nrara e tii riinga Ana kunnikai ao e a kamarurungaki. Kristo e rairaki n taetae ma ngaia imwiin ataakina are e a tia n riinga.(taraa Ruka 8:43–48). N aki taraa are e na buoka riki temanna, Kristo e karekea ana tai ni buoka naba neiei. Kristo e karekea ara tai ibukira naba ni kabanea.
I rang n tabetabe ni maiu, ni biri nakon te reirei ke au kiraati ke mwananga ake tabeua. Inanon aikai ni kabane, e aki reke au tai n tiku tii ngai ke n namakina te rau. Ngkana I wareka au boki aika a tabu ke n tataro, I namakiina te rau. E rang tikiraoi namakinan anne ao ni karekea te tai ni mwaawa man bwaai aika aki karaua te iango. Inanon taai aika a rau akanne, I rikirake ni kaan riki nakon te Tia Kamaiu ao n rikirake inanon te euangkerio.
Zoe B., ana ririki 17, Utah, Amerika