N te Bwabete
Taian Bwaene ao Bwatoro
Tamnein Titita Okazaki courtesy of Church History Library; tamnei tabeua mairoun Getty Images
Te Atua e anganiira bwaintangira, aika a mwaiti, ao kakaokoroaki aika a mwaiti, arora ni kakaokoro aika a mwaiti, ma tera te bwai ae rang kakaawaki bon te bwai ae ti ataia imarenara—bwa ngaira ni kabane bon Natina.
Kaewenakoara ngkai ngaira kaain te Ekaretia bwa ngaira ni kabane n tatabemaniira ti riai n reireiaki imarenara, bwa ti aonga ni bane n itangitangiri ao ni bane n rikirake.
Ana reirei te euangkerio a bon bane n riai ni karaoaki. A rang kakaawaki, ma karaoakiia e bon nakon temanna ma temanna. N na tibwa te katoto ae beebete ni kaota te kaokoro imarenan reirein te Ekaretia ao katein te aba. Aio te bwatoro ni biitu mai Utah, are e karaoaki ni mweengan temanna bwa kanaia kaain ana utu n tain te tinoo. Kaain Hawaii aki kabonganai bwatoro. A kiniki uanikai aika tau ibukin tabeua te bong ao a kawakini inanon taian bwaene n aron aei ibukiia aia utu. Kanoan te bwaene aei bon mwangkoo, bwanana, pineapple, ao bwaabwaia … a kinaki irouia kaain Boreniitia bwa kanaia kain ana utu n tain abaia ae katawaai uanikai ni katoa ririki.
Te bwaene ao te bwatoro bon nnen bwaai aika a kakaokoro, ma kanoaia titebo: uanikai ibukin te utu. E eti te bwatoro ao e kairua te bwaene? E aki, a bon kaai n eti. Bon nnen bwaai aika a bwainaki n te katei ao kainnanoia aomata. Ao a kaai ni bwainaki ibukin kanoaia are a kona n uoti, are te uanikai.
Ngkai, Tera te uaa? E koreia Bauro: “Ao uan te Tamnei te tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki, te nimamannei, [ao] te taubaang” [I-Karatia 5:22–23]. Te itaritari inanon te Bootaki n Aine, te itaritari n te kooram n nakoanibonga, n te karinerine n ikotaki ni butimwaean te toa, uaan te Tamnei e katiteuanaira inanon te tangira, kukurei, ao te rau ngkana ti mena n te Bootaki n Aine i Taipei ke i Tonga, ke n te kooram n nakoanibonga i Montana ke Mexico, ke n te bootaki n toa i Biiti ke i Biribin.
… Ngke I weteaki nakon te Beretitentii ni Kabuta ibukin te Bootaki n Aine, Beretitenti [Gordon B.] Hinckley e taetae nakoiu: “Ko uota te anua ae bon riai ni mena ikai n te beretitentii aei. Ko na kinaaki bwa temanna naba ngke ae ko tei ibukiia ake a mena iaon tian Amerika ao Kanata. … A na nooria inanom bwa te tia tei ibukin te katiteuanaaki n te Ekaretia.” E kakabwaiaai bwa e na kabwaraaki neweu ngkana I taetae nakoia aomata.4
… [Ngkana I taetae n aba ake tabeua,] I kona n namakina “uaan te Tamnei” bwa e uotii au taeka nako nanoia, ao ni uota rikaaki aia tangira, kukureia, ao aia onimaki. I kona n namakina te Tamnei are e katiteuanaira.
Tariu ao mwaaneu, ngkana tao ami uanikai taian biiku ke bwaabwaia, ao ngkana kam uoti inanon bwatoro ke bwaene, ti karabwai ngkami ibukin ami anganano inanon te tangira. Tamara are i Karawa, ti bia katiteuanaaki ao ti bia riki bwa am bwai,5 I tataro n aran ara Tia Kamaiu, Iesu Kristo, amen.