N na Kanga ni Manga Karikirakea au Kamatebwai ni Booki aika Tabu?

Sarah Keenan

Utah, USA

I a maan n okira mweengau man au mition ibukin tii teniua namwakaina ngke I a moanna ni korakai ma warekan booki aika tabu.

I a tia ni wareki booki aika tabu ni katoa bong iaon au mition ao ni berita n reitinakoa ngkana I okira mweengau. Ma ngkai e waaki nako te tai, iai baika a kaoti inanon te kawai. E rang mwaiti au oumweeki, e korakora tabeu n te mwakuri, ke I bon rangin kua. Ma reken nako au anga, e keerikaaki korakoran au wareware ni booki aika tabu ni karokoa are e a bon kaangaanga naba au wareware teutana.

I kauka ana Boki Moomon te tairiki teuana ao ni baireia n tii wareka teuana te kibu. Te kibu are I warekia e kauringai bwa inanon booki aika tabu ao iai inanona “ana taeka te Atua aika tamaroa, eng, te taeka are e kamaiua te aomata ae ikoaki” (Iakobwa 2:8).

I Iangoa raoi te kibu aei ao n ataa mwiina ae buakaka bwa aki mwannanoan te kamatebwai ni booki aika tau e a riki nakoiu. I a namakina riki te rawawata n te reirei, te aki mwamwannano n te taromauri, ao n raroa riki mairoun te Atua. Tamneiu e kainnanoa kamaiuana man ana taeka te Atua ake a kuneaki ni booki aika tabu. I ataia I kainnanoia ni manga barongai baike a moanbwai irou.

I rairaki nakoia raoraou, au utu, ao au taan kairiiri ni bubutiia aia iango ni buoka aron kaboouan au kamatebwai ni booki aika tabu. I kunei teniua bwaai aika a rangin n ibuobuoki.

Te moan, I ataia bwa kamatebwaian booki aika tabu n te tairiki e a korakora ibukiu. Te kamatebwai n te moaningabong e anganai te kariaia n iangoi reirei ao tuua rinanon te ngaina ake I wareki n te moaningabong anne.

Te kauoua, ti reiakinaki bwa ti na wareki booki aika tabu ma ara utu, ma ngke I mena n te kaoreti ao n raronako mairouia au utu, I moana au wareware ni booki aika tabu ma kaain au ruu ao raoraou. Aio e buokai n teimatoa ni kabaeaki, ao e anainano nakon reirein te euangkerio aika moan te korakora.

Te kateniua, I moanna ni korei ana wirikiriki te Tamnei ao iango ake I karekei n tain au kamatebwai. Aio e buokai ni katururua au iango iaon baike I wareki ao ni buokai riki ni kinaa bwanaan te Tamnei.

Warekan booki aika tabu tetaina e riki bwa au moanbwai inanon maiu, I kunea bwa e mwaiti riki au tai ao korakorau ni kakoroi bukin bwaai ake I riai ni katiai. Ae kakawaki, I a manga namakina riki kaaniu ma te Atua ngkai I wareka ao ni iangoi raoi booki aika tabu. Ngkai ngkana I kabanea au tai iaon booki aika tabu, I namakina te rau ao ni kunea kamaiuan tamneiu.