Te Reirei Ae Kamiimi
Iroun Unimwaane Valeri V. Cordón
Man te Itingaun
“N na … kauki mataroan nako karawa nako imi, ma n nurakina kaakabwaiami” (Malachi 3:10).
Ngke I ikawairake i Guatemala, a bwaibwai au utu n te auti ni karaobwai are e karaoi kabooraoi ibukin te tiim n takakaro.
Tamau e tangiriia ataein ara utu bwa a na reireiniia ni mwakuri korakora. Ti buokia n te auti ni karaobwai. I a bon rereke naba n te kaangaanga ngke I uarereke. Taraakina bwa I aki toki n urui bwaai! Ma ngke I a ikawai, e kariaia tamau bwa N na tararuai taian mitiin ni itutu.
E kabooira tamara ibukin te mwakuri are ti karaoia. Ngkanne e na bae n titiraki, “Tera ae ko na karaoia nakon am mwane?” I ataa raoi te reke bwa: “N na kabwakaa au kabuanibwai.”
Ngke 13 au ririki, e korakora te ruuti n ara bitineti. Ti nang riai ni kanakoi ara mitiin ni waewae aika mwaiti. N oneamwiin mwaitiia ara tia mwakuri aika 200, e a uarereke riki bwa ai tii niman. A mwakuri n ara karaati inanon mweengara.
I kakabwaka au kabwianibwai n taainako, ma I aki rang oota raoi n aron kakawakina. Ngkanne I ataa te reirei ae kamiimi. Te Kaonobong teuana I ongo bwanaaia au karo ni maroro ni karaurau. Tamau e tuanga tinau bwa iai te mwane ae bon tau ni kabwaka te kabwianibwi ke ni kabooa te amwarake. E aki tau ibukin baika uoua. I rangin n raraoma. Tera ae e na karaoia tamau?
Te Tabati teuana I noora tamau n anga te tinaniku nakon ara beretitenti n te mwaanga. E rineia bwa e na kabwaka te kabwianibwai! I kukurei bwa e karaoia, ma I raraoma naba. Tera ae ti nang kanna?
Te ingabong are imwiina tabeman aomata a karebwerebwe iaon ara mataroa. A tuanga tamau bwa a kainnanoi kabooraoi n te tai ae waekoa. N aron ae taneiai te aba iai a kabooira aomata imwiin tian te oota. Ma aomata aikai a kabooa tamau n te bong anne, e ngae ngke imwaain ae ti karaoi taian kabooraoi!
N te wiikente teuana, I reiakina te reirei ae tamaroa are i uringnga inanon maiu. Tuan te kabwianibwai e buokai ni katea ara onimaki ao ni kaota ara kakaitau ibukin Tamara are i Karawa. Kabwakaan te Kabwianibwai bon te kakabwaia!