Kawai ibukin te Kukurei ae Koaua
Iroun Unimwaane Ulisses Soares
Man te Beretitentii n te Itingaun
Man te maroro are e atuunaki, “Kawai ibukin te Kukurei ae Koaua,” are e taekinaki i Brigham Young Iuniwetiri–Hawaii n Tuun 8, 2017.
E bia ae ngaira n tatabemaniira nako ti rineia n tangira te Uea ao n iri Kawaina nakon te kukurei.
Iaon bwaai ni kabane, te Tama are i Karawa e tangira kukureira ae koaua ao akea tokina.
“Kukureira boni ngaia bairean kakabwaia ni kabane are E anganiira—reirein te euangkerio, tuua, otenanti, ana reitaki te utu, burabeti, tembora, tamaroan te karikibwai, ao te tai n rinanon taai ni kakatai. … E anga Natina ae Tangiraki bwa e na kakoroa nanon te Mwakuri ni Kamaiu bwa ti aonga ni kukurei n te maiu aei ao ni karekea bwaninin te kimwareirei n te maiu ae e na roko.”1
Aomata n taabo nako iai te bwai ae a kakaea. N oin aia kawai, te bwai are a kakaea bon te kukurei. N aron raonakina ma te koaua, e ngae n anne, a mwaiti ae a kararoaaki man kukurei “ibukina bwa a aki ataia bwa a na kunea iaa” (R&B 123:12).
Ibukina bwa a aki ataia bwa a na kunea iaa te kukurei ae koaua ao n akea tokina, a kakaea inanon bwaai ake a tii uota te kukurei ibukin tii te tai aei—kabooan bwaai, ukoukora te karineaki ao te kamoamoaaki man te aonaaba rinanon anua aika aki riai, ke n tii bane am tai iaon te tikiraoi ao te kabwakabwaka.
Te kakatonga e kairiruaaki n taainako ma te kukurei. Taraakina bwa ngkana angiina aomata a ukoukora te kakatonga tii inanon te tai aei, a na karako kukureia. N ae taneiai te aba, te kakatonga e aki teimaan bwa tii inanon teutana te tai.
Ngkai e taku Beretitenti David O. McKay (1873–1970): “Ko na bae ni karekea te kakatonga ae tii teutana taina, eng, ma ko aki kona ni kunea te kimwareirei, ko aki kona ni kunea te kukurei. Te kukurei e tii kuneaki n te kawai are a tia n toua aomata aika mwaiti, e wariki, ma e eti are e kairiiri nakon te maiu are akea tokina.”2
N akean te tekeraoi ibukiia aika mwaiti, te kukurei e kaangaanga kabwarabwaraana. Taan rabakau iaon te tiaenati a ataia bwa “ae e riaon riki te iango ae tamaroa, te kukurei bon te mweeraoi n raonaki ma maiuakinan te maiu ae raoiroi—bon anne, ma namakinan te kukurei ae korakora.”3
E kaotaki n te kakae bwa te kukurei tiaki mwiin te waekoa ni bitaki man te taneiai teuana nakon are imwiina. N oneamwiina, karekean te kukurei e irekereke ma te konabwai ni boboutoka ae teimaan ibukin te bwai ae rangin kakawaki riki n te maiu. Bairean te kukurei bon man taian katei, anua, ao banna aika iangoaki ake ti kona ni maroroakin ni kainetii ma ara mwakuri mai inanora. Mwaitin kukureira ni koauana bon “iaan tararuraakin arora.”4
Ti na iangoi tabeua kawai ibukin te kukurei ake a kuneaki ni booki aika tabu ao n reiakinaki irouia burabeti ao abotoro n taai aikai. Ni kakaonimaki ao ni kamatoai raoi mwanekan waera iaon kawai aika eti e na kariaira ni kakukureira ni mwanangara ae imwaaira.
Te Tamaroa
Te moan mai ibuakon kawai aikai bon te tamaroa, are te banna ibukin katei ao aroaro ake a boboto iaon anua ni maiu aika raraoi. E raonaki ma tuan te itiaki man te wenenibure ao aroaro n te itiaki, are e na katauako n rin inanon ana tembora te Uea aika tabu. Aomata aika raoiroi a bwaina te kamoamoaki ao te korakora mai inanoia. A onimaki ibukina a tau ni karekea ao ni kairiiraki iroun te Tamnei ae Raoiroi. Te tamaroa e moanaki man te nano ao te iango, ao bon bobootan teuana tengaa taian babaire ao mwakuri ni katoa bong.
“E riai te raoiroi ni katamaroa am iango n aki toki; ngkanne matoan nanom e na korakora imatan te Atua ao reirein te nakoanibonga e na timtim i aon tamneim n aron te aoi mai karawa.
“Te Tamnei ae Raoiroi e na riki bwa raom n taai nako, ao am kainuea te kainuea ae aki bibitaki n te raoiroi ao te koaua; ao am tautaeka e na riki bwa te tautaeka ae akea tokina, ao n akean aanga ni kairoro e na raanga nakoim n aki tootoki” (R&B 121:45–46).
E reirei Beretitenti Thomas S. Monson (1927–2018) bwa “akea riki te iraorao ae moan te kakawaki riki nakon oin itiakin mataniwiin nanom, oin aroaron itiakim—ao bon te namakin ae mimitong n ataia bwa ko tei n tabo ae rineaki ae itiaki ao ma te onimaki bwa ko tau ni karaoia.”5
Te Kororaoi
Te Kauoua ni Kawai ibukin te kukurei bon te Kororaoi. E reirei Unimwaane Richard G. Scott (1926–2004) man te Kooram n Abotoro n te Tengaun ma Uoman:
“N ataakina bwa te teimatoa ni kukurei e roko man arom ngkai, tiaki man bwaai aika ko karekei.
“Te kimwareirei ae koaua e roko man katei aika raraoi, ao anne e reke man teimatoan babaire aika raoiroi. … Am babaire ae raoiroi a baireiko bwa antai ngkoe ao tera ae kakawaki ibukim. A karaoi ni kabebetei bwaai aika eti. Ibukin te kukurei ngkai ao ni kabuta maium, teimatoa n ongotaeka iroun te Uea.”6
Ngkai ti kamatebwai booki aika tabu, ti reiakinna bwa berita ake e karaoi te Uea nakoira e kaunga te maiu ae raoiroi. Berita akanne a kanuai tamneira, e uota te kantaninga man kaungaakira bwa ti na aki bwarannano ngkai ti rinanoi ara kaangaanga ni katoa bong ni maiu n te aonaaba ae memeere iai anua aika eti ma bonganam. Ngaia are, ti riai ni kakoaua bwa ara iango, ara taeka, ao ara mwakuri a kairiirira inanon kawaira n oki nakon Tamara are i Karawa.
Kakaonimaki
Te kateniua ni kawai nakon te kukurei bon te kakaonimaki. E bon riai ataakina bwa te Atua e kakabwaiaira ni kaineti ma ara onimaki, are bon moan rikin maiuakinan botoniango aika tabu ao te taratara ae akea tokina. Te onimaki bon te reirei ae maiuakinaki are e kaunga te taningamarau. E kaotaki n anuara aika raoiroi ao te nano n tauraoi ni karaoi bwaai ni kabane are e butiira iai te Tama arei Karawa ao Iesu Kristo. E kaungaira bwa ti na tataro ni butiia te Uea ibukin ana kairiiri ao ni kaungaira n teirake ao ni mwakuri ma te onimaki ni karekei bwaai n teimatoa inanon Ana kantaninga.
Ngkai ko waaki nako inanon mwanangam, ko na kataaki n nooria bwa ko karaoi bwaai ni kabane ake e tuangko te Uea ae Atuam bwa ko na karaoi (taraa Aberaam 3:25). Aio mwakoron te taneiai n te maiu ae mamate. E kantaningaaki bwa ko na waaki nako man teimatoa n te onimaki iroun Kristo, ni kairaki mairoun te Tamnei ao n onimakinna bwa te Atua e na katauraoa kainnanom.
Uringnga bwa ko na aki kariaia am onimaki bwa e na kerikaaki—e ngae inanon taai aika moan te kaangaanga. Ngkai ko teimatoa, te Uea e na karikirakea am konabwai ni karietako riaon kaangaanga n te maiu. Ko na anganaki te konaa n taobarai iango aika buakaka, ao ko na karikirakea te konabwai n tokanikai ni baike a tuukiko ake a kateinang tarakiia.
Te Mimitong
Te mimitong, te kawai teuana nakon te kukurei, e irekereke ma te kororaoi n te tamnei ao n aroarom. Te mimitong e kaota itiakin te nano ao te kantaninga. Ti na kanga ni mwakuri ni katoa bong ni kanuai tamneira bwa ti aonga ni kona n karikirakea te aro n atua?
E kaeka Beretitenti Harold B. Lee (1899–1973): “Ti karikirakea arora n tamnei man te kakamwakuri. … Ti riai ni kamwakura ara onimaki ni katoabong man te tataro, man karaoan mwakuri aika raraoi ni katoa bong, man tibwauakina nakoia tabeman. Ti riai ni kamarakei tamneira ni katoa bong man kamatebwaian booki aika tabu, man [bootakin te utu n te tairiki], man iriiri bootakin te aro, man kanakin te toa. …
“Te mwaane ae raoiroi e kekeiaki ni kanakoraoa arona n ataia bwa e kainnanoa te rairannano ni katoa bong.”7
Teuana te bwai ae mimitong e irekereke ma karaoan ao kawakinan berita aika tabu inanon te tembora. Ngkana ti kakaonimaki, berita aikai a kona ni kanakoraoira n ae riaon riki tian korakorara ao ara taratara. Kakabwaia ni kabane ake a beritanaki ibukin ana euangkerio Iesu Kristo a kona n riki bwa ara bwai rinanon ara kakaonimaki nakon otenanti ao berita aika tabu imatan te Tama are i Karawa ao Iesu Kristo inanon te tembora. Mwakoron te anua ni maiu ni “maiuakina te kukure” n raonaki ma katean te tembora are ko taromauri ao ni karaoi berita aika tabu ma te Uea (taraa 2 Nibwaai 5:16, 27).
Te bwai ae kakawaki n uringaki n te kawai aei bwa ti riai n taratara raoi n rikirake n te maiu n tamnei ao te aroaro n te itiaki.
Ongotaeka
Kawakinan ana tua ni kabane te Atua e irekereke ma kawai riki tabeua nakon te kukurei. Imwiin maenakoia Nibwate mairouia Reimwanaite, e korakora maiuraoia ibukina ngkai a kawakin taian babaire, taian moti, ao ana tua “te Uea iaon bwaai ni kabane, ni kaineti ma ana tua Mote” (2 Nibwaai 5:10). Te anua aei bon teuana te bwai ae rangin kakawaki ni “maiuakina te kukurei.”
E reirei Beretitenti Monosn: “Ngkana ti kawakin tuua, e na kakukurei maiura, e na bwanin raoi, ao ni karako te kaangaanga. Kakaewenakoara ma ara kaangaanga a bon bebete uotakiia, ao ti na karekei Ana berita [te Atua] n taian kakabwaia.”8 E taku ana taeka, “Te rabakau are ti ukoukouria, te kaeka are ti rang tangiria ni karekea, ao te korakora are ti tangiria n te bong aei ni kaitarai kakaewenako n te aonaaba ae kaminonano man bibitaki e kona n riki bwa ara bwai ngkai ti anganano ma te tauraoi n ongotaeka nakon ana tua te Uea.”9
E reireiniira te Tia Kamaiu:
“Ngkana Ko Tangirai, Kawakin Au Tua. …
“Ane iai i rouna au tua nako, ane e tau, ao bon ngaia ane e tangirai: ao ane e tangirai ao e na tangiraki i roun Tamau, ao Ngai N na tangiria, ao N na kaotai nako ina” (Ioane 14:15, 21).
Mutiakinaia Tabeman ao te Tangira
Te kawai ae tamaroa nakon te kukurei bon teuana mai buakon mutiakinaia aomata—te tangira are e mwamwannano, iai nanona iai, ao mwaitin tabeua te tangira ae kororaoi ibukiia aomata ni kabane ake a maiu. Te tangira ae kaineti nakon te kukurei are e na katamaroai ao ni kakabwaiai maiura ao maiuia tabeman. E nanonaki, n aron are e taku te Tia Kamaiu, bwa ko na kaota am tangira nakoia am kariribai (taraa Mataio 5:44).
Ni karaoan aei, ko na kakoroa nanon te tua ae moan te korakora n tangira te Atua. Ko na kaakeai bwaai aika buakaka aika a riki, bwaai aika aki koaua, bwaai aika kabwaka, bwaai aika aki kakukurei. Te kukurei ae koaua ao n teimaan e tii roko ngkana ti rineia n “tangira Iehoa ae Atuam n nanom ni kabanea, n tamneim ni kabanea, ao ni korakoram ni kabanea” (Mataio 22:37; taraa naba Te Tua Kaua 6:5; Mareko 12:30; Ruka 10:27).
Ti bia ngaira n tatabemaniira nako n rineia n tangira te Uea ao n iri Kawaina nakon te kukurei “bwain ao bairean rikin maiura.”10