Kakabwaiaki Neiei Ibukin Ana Mwakuri
A aki toki aomata n atonga nakoiu bwa a na kakabwaiaki au utu ngkana I mwakuri ma te kakaonimaki bwa te mitinare ae bwanin ana tai. I kakoauai taeka ni kabane. E ngae n anne, e uarereke ae I ataia bwa teuana mai buakon kataakin te onimaki e mena i mwaiu.
I rairaki ao ni bwabetitoaki nakon te Ekaretia ngke 18 au ririki ni maiu. Tabeua ririki imwiina I namakina te kan nako ni mitinare. I tataro ao n tokina I karekea te kamatoaki ae aki kona n totokoaki bwa e eti aio; bwa aio te kawai Tamara are i Karawa e tangiria bwa N na karaoia. Teniua te ririki imwiina I a roko iaon kawaiu.-
N te Moanibong teuana I motikia bwa N na imeeri nakon Tinau. I tuai n ongora irouna n te tai ae maan ao I kan ataia bwa e uara. E waetata ni kaeka n te tai anne are I a rang kukurei iai. Engae n anne, ao kukureiu e rairaki nakon te bwaranano. Au aonnaba e bobaraaki inanon taian teekan.
E a marurung Tinau man te arekoro ao e a toki ni kamanena ni kuri ni koro teniua te ririki. Bon te tokanikai aio ae korakora ao I kakatonga irouna. I ataia n au iango bwa a na bon iai te anga are e na toki iai ao e a tia n noria bwa ngaia e bon kona ni karaoia. Engae n anne kanakoan te iango aio I kataua ni kakoaua bwa e na manga aki riki aio bwa I a katabeaki n Ana mwakuri te Uea bwa te mitinare ae bwanin ana tai.
A bitaki ni kabane ngke I wareka ana imeeri Tinau ni kunea bwa ngaia e a manga okira arona. I rootaki ao I tekateka irarikin te kombiuta n tang n aki kakarongoa. I aki kona ni kakoaua.
E bon koaua maaku are moan te kanganga. Tabebong i mwaina, I namakina ae I karietataaki, n tauraoi ni kabanea nikiran namwakainan au mition. Ao ngkai, I namakina te rawawata bwa e a toka iaou ao I a rabunaki nako i aan rawatana.
Au namakin nako a onikaki nakon te maraki n nano. Ao e kaineti nakon te Atua. Bon tiaki te mitinare ae kororaoi ngai ma I namakinna bwa I kataia ao I taku bwa te Atua e na kakabwaiai ibukin au mwakuri. I bon tia ni kata au kona ae tamaroa. I tangiria n takarua, ao ni katautaui timoin baiu nako karawa ao n toki. I tangiria bwa N na toki ni mitinare. I namakina au mwakuri bwa aki tau ao ngaia bukina ae riki aio. Ao e aera ngkanne bwa N na waaki nako? Tera nanona?
N te tairiki anne I kakaea kakabwaian te nakoanibonga. I kabwarabwara are moan te nano, te namakin ae moan te korakora mai nanou nakon toau ao au tia kairiri n te mition. Ni kabane marakin nanou, au namakin ni bwaranano, karakon au kantaninga e nako ngke ti tekateka ni karibwabwa inanon aia tabo ni kuka ae uarereke/aobiti. I anganaki te kakabwaia ao taian moan taeka aika taekinaki, “E tangiriko Tamam are i Karawa.”
Boni ngaia raoi are I kainanoia I namakina kitanakiu n tii ngai ao n ongo taeka aika uota te karaunano bwa E mena ikekei ao E ataai. Ngke I iangoa te namakin anne I ataia bwa a mwaiti aika mena ikekei nakon ae tii ngaira aman n te ruu n te tairiki anne.
N te bong are imwiina, I wareki ana taeka te anera are kaoti nakon Aramwa, “Ko na kakabwaiaki ngkoe Aramwa; ma ngaia ae, tabeka atum ao kimwareirei …” (Aramwa 8:14–15). I namakina te Uea be tangiria bwa N na tabeka atuu ao ni kimwareirei bwa bukina bwa I kakorakora kimwareireiu! I iangoaki bwa N na kukurei.
I a moana koreakin tauan mwiin bwaai ni kabane ake I kukurei iai. Man bwaai aika uarereke nakon baika a bubura ni buokai bwa N na moan bwai n ataa ao ni butimwaei ana kakabwaia te Atua ake a reitinako ni bwaro iaon atuu.
N te tai are I mimi bwa bukin tera te Atua e karaoa aei nakoiu engae n anne man ngkanne I a ataia bwa taian kataitai ao taian aoraki tiaki te maraia mairoun te Atua. Bon kaitarana. Bon te kakabwaia. Ngke I aki karekea te anga aei ibukin rikirakeu ao reireiakiu N na bon tiku naba n arou are bon ngai ngkoa. Bon te tai n kaitiakaki ni uraraken te kanganga ao I a tia n otirake ni bitaki–teutana riki te kukurei ao teutana riki te kakaonimaki.
I rang kukurei ibukin bwaai aika mwaiti. I kukurei bwa E buokai te Atua n rinanona ma te kakaonimaki nakon tokin au mition ao ni kukurei iai. I kukurei bwa E anganai taai aika mwaiti n rikirake ao n reiakina ao ni kaitiakaki. I rang kukurei i bukiia raraou ao au utu ni mweengau, ni kaan ao n raroa ake a tabekai ngke I mamara ao are tabe ni karaoia. I rang kukurei ibukin Tinau ao ibukin korakorana n aki bwara n nano n oin ana waaki. I kukurei ibukin Kristo. I kukurei bwa E uotai ngke I aki kona n nakonako ao E anganai te korakora ngke akea irou. I kukurei bwa E maiu te Atua ao bwa E ataira ni kabane.
Simone e mwakuri n te Kiribati Mition man Nobembwa 2015–2017. E mena ngkai n te YSA moan uoote i Auckland.