Bannan te Onimaki
Rakotomalala Alphonse
Sarodroa, Madagascar
Ngke e a moanna n tangira te euangkerio Rakotomalala, te umwantabu ae uakaan e mena i Antsirabe, n te kaawa ae 30 te maaire (50 kiiromiita) man ana kaawa i Sarodroa. Rakotomalala ma raoraona a kunea te kawai ni karaoa mwanangaia ni katoa Tabati.
N te bong aei, iai ana autinibootaki Sarodoa ike e riaon 100 kaain te aro n roroko ni katoa Tabati. Rakotomalala e noora ana kaawa ni butimwaea te euangkerio. Aman mitinare a mwakuri mai Sarodroa ao e reitinako n rikirake te Ekaretia.
Cody Bell, te tia rawetamnei
Ngke e aoraki tibu te unimwaane, I mwananga nako Antisirabe bwa N na raonna. A roko mitinare ni kawara mweengana n angin te tai. Ngai ma tibu te unimwaane tiaki kaain te Ekaretia, ma e tangira kakawarana irouia mitinare. Te tairiki teuana, a kakabwaia tibu te unwimaane, ao imwiin te kainutu n te tairiki, a anganiira ana Boki Moomon.
“Taiaoka wareka te boki aei ao butia te Atua ngkana e koaua,” a taku.
Ngke I oki nako Sarodroa, I aki kan wareka ana Boki Moomon ibukina I taku bwa e aki koaua. Ngkanne, te bong teuana I a taonaki n te aoraki ao I tiku n te auti tabebong te bong. Ngkai I kakaea te bwai ae N na karaoia, I kunea ana Boki Moomon ao ni moana au wareware.
Imwiina, I oki nako Antisirabe ao ni kaitibo ma mitinare. A reireinai taekan ana Boki Moomon ao taekan te Burabeti Iotebwa Timiti. I tuangiia bwa tiaki kainnanoia burabetia bwa akea burabeti ni boong aikai. A butiai mitinare bwa N na tataro nakon te Atua ao ni butia ngkana iai te burabeti ngkai. A berita bwa e na kaekaai te Atua. I tataro ao n namakinna bwa baike a taekin mitinare a bon koaua.
I kan nakon n taromauri, ma akea au mwane ibukin kantokau n te bwati. I maroro ma raoraou, Razafindravaonasolo, ao e taku bwa N na bwaatika ma ngaia. Ti bwaatika uoua te aoa mai Sarodroa nako Antisirabe ni katoa Tabati. Ngkana N nang kua n toutou ni kabuta te bwaatika, N na bae n toka mai ibuki ao e a manga toutou ni kabutia. Ngkanne e a manga kua, ti a manga kaibibita nnera.
N te kabane, Ngai ma ana utu Razafindravaonasolo ti a kaaina te Ekaretia. Ti nanako n taromauri i Antisirabe ni karokoa are e kaukaki te mwaanga i Sarodroa. Ti rangi ni kukurei ngke ti kona n nako n taromauri ni bon oin ara kaawa!
Taman Razafindravaonasolo e weteaki bwa te beretitenti n te mwaanga. N te bong teuana I kaitibo ma ngaia ao ni kaungaai bwa N na katauraoai ibukin au mition. I taku bwa I aki kona ni mitinare, ma e kakoaua bwa I bon kona. I butimwaea te wewete ni beku i Madagascar Antananarivo Mition. I a iein ngkai ao iai uoman natiu. I kakaitau ibukin au utu ao e mwaiti baika I rinanona nakon are N na kona n tibwauaia are e buokai n ataia bwa e koaua te Ekaretia aio.
Imwiin kaainakin te Ekaretia, Rakotomalala (atai) e beku i Madagascar Antananarivo Mition, ao Razafindravaonasolo (maing) e beku n te Democratic Republic of the Congo Kinshasa Mition.
N 2013, membwa i Sarodroa a katea te umwantabu ae uarereke bwa a na taromauri inanona. E kukurei Rakotomalala ni buoka karaoan te bitiaki are e kainnanoaki n te kateitei.
Te raiti bon te kai n amwarake ae unikaki ae teimatoa i Madagascar. A kuri aomata ni kabane i Sarodroa a mwakuri n tawaana n raiti ni boutokaia aia utu.
Ngkai e reitinako n rikirake te Ekaretia, membwa i Sardroa a kainnanoa te umwantabu ae boou. Ma te umwantabu ae boou irarikiia, Rakotomalala ao tabeman taan mwakuri a bita te umwantabu are ngkoa are e karaoaki man te kai nakon taian kiraatiruum ao ana aobiti te bitiobi.
Man boong ake a bwaatika inanon uoua te aoa n teuana te kawai n nako n taromauri ni katoa Tabati, Rakotomalala ao Razafindravaonasolo a teimatoa n riki bwa raao aika tamaroa. A kakaitau ibukin kakabwaia ake a karekei man te euangkerio ma aia utu.
Rakotomalala ao Razafindravaonasolo a tei imoan te umwantabu ae boou i Sarodroa. Te umwantabu aei, e karaoaki man te timanti ao te buriki, e kateaki irouia membwa.