5 Uiga Mama o Paionia e Mafai Ona Laveaiina ai o Tatou Aiga i Aso Nei

Saunia e Valerie Durrant

E alala le tusitala i Kalefonia, ISA.

O o tatou luitau i aso nei e ono ese, ae tatou te manaomia le malosi lava e tasi e pei o paionia anamua.

O e mafaufau ea pe o tele lou faatuatua e pei o le faatuatua o paionia sa i ai? Atonu e le o valaauina le Au Paia i aso nei ina ia savavali i maila e 20 (32 km) i le aso mo masina e tele, tuua mea uma latou te anaina, pe feagai foi ma sauaga, ae e ao ona tatou faia ni faaiuga le masani ai, puipuia i tatou lava e tetee atu i tulaga lamatia faaleagaga, ma fai atu leai i le vaitafe le muta o faafiafiaga le talafeagai ia e mafai ona faalavelave ia i tatou mai mea e sili ona taua.

A tatou filifili e mulimuli ia Keriso, e ao ona tatou valaau atu i uiga mama lava e tasi ia na maua ai e o tatou tuaa paionia lo latou malosi faavavega.

O uiga mama nei e lima o na uiga mama e mafai ona faamalosia ai i tatou i aso taitasi:

Faatuatua. O le malosiaga o paionia sa maua tonu lava i se tulaga faaletagata lava ia. Sa iloa patino e i latou taitoatasi o i latou o fanau a le Atua. E mafai foi ona outou atiae lo outou lava faatuatua ia Keriso ina ia mafai ona tu malosi lau molimau e tusa lava po o a matagi e tulai mai.
Lototele. Atonu e foliga faavalevalea le faatusatusa o lou lototele i lo latou lototele. Sa feagai paionia ma lamatiaga faaletino moni i aso uma, ae e ao ona tatou faaaogaina lena lava lototele e tasi i totonu o i tatou e faasoa atu ai le talalelei i isi ma ola ai i se olaga e ese ai nai lo le olaga o loo ola ai le lalolagi. O le manatuaina o le lototele o paionia e mafai ai ona fesoasoani ia i tatou e faatoilaloina o tatou luitau.
Naunautaiga. A taia i faalavelave, e faigofie lava ona fesiligia e paionia le talafeagai o o latou tulaga, ae o lo latou naunautaiga sa fesoasoani e tauave i latou, ma faatuatua o le a lelei mea uma. O aso nei, e mafai foi ona tatou mauaina lena lava talitonuga maumaututu e tasi ma iloa ai po o le a lava le mea e tau mai e le lalolagi ia i tatou, “ua faia mea uma e tusa ma le poto o ia o lē ua silafia mea uma” (2 Nifae 2:24).
Ositaulaga. O le vaaiga mamao malosi o paionia e uiga i mea sa latou galulue ai sa fesoasoani ia i latou e fai ni osigataulaga talafeagai e faaauau ai. E mafai ona tatou faalagolago i lea lava vaaiga mamao e tasi lea na tauaveina paionia i luma—fausiaina o le Ekalesia a le Atua—pe a tatau ai ia i tatou ona ositaulagaina mea i aso nei.
Lotogatasi. O le faimalaga ai i taavale tosolima o lona uiga sa tausia e tagata uma isi tagata uma i le taimi o la latou malaga i Siona. A o tatou galulue e fausia Siona i aso nei i a tatou uarota, siteki, paranesi, aiga, ma nuu, e tatau foi ona tatou taumafai e siitia ma faaaofia ai i latou o siomiaina i tatou.