Ua I’u Lava [Ina Maua] se Aiga e Faavavau
E alala le tusitala i Colorato, ISA.
“O soo se mea e te faamaufaailogaina i luga o le lalolagi o le a faamaufaailogaina i le lagi” (Helamana 10:7).
O le a le uiga o le ‘E Faavavau Aiga?’” Sa fesili ai Mia. Sa faaminoi atu lana maa o le taaloga i luga o le laupapa. Sa la taaalo ma lana uo mamae, o Zoey, i se taaloga i totonu o le potu malolo a Zoey. I luga o le puipui sa i ai se ata o loo faapea mai, “E Faavavau Aiga.” Sa fiafia Mia i lena faaupuga.
“O lona uiga e tusa lava pe a e oti, e avea pea outou ma se aiga,” sa faamalamalama atu ai e Zoey. Sa ia tuu i lalo se kata ae faaminoi lana maa o le taaloga.
Sa tilotilo solo Mia i le potu. Sa foliga masani lava. Sa i ai nofoa momi, laulau, aluga, ma se TV. Ae sa ese lagona sa i ai i le fale o Zoey mai lona lava fale. “E i ai sou aiga e faavavau?” Sa fesili atu ai Mia.
Sa autilo i luga Zoey mai le taaloga ma se ataata. “Ioe! Sa faaipoipo lo’u tina ma lo’u tama i le malumalu. Ina ia mafai ona matou toe faatasi e faavavau.”
“Pe o le mafuaaga lena e ese ai lagona i le tou fale?” Sa fesili atu ai Mia.
Sa foliga le mautonu Zoey. “Ese?”
Sa lei iloa e Mia pe faapefea ona faamatala le lagona i totonu o le fale o Zoey. Sa fiafia ma mafanafana. Ae fai si faavalevalea o lena tala. “E le afaina,” na ia fai mai ai. “Ta taaalo pea.”
I lena po sa le mafai ona taofi le mafaufau o Mia e uiga i le aiga e faavavau a Zoey. Sa fiafia o ia i le lagona i totonu o le fale o Zoey. I ni nai aso o le a malaga ese ai le aiga o Mia i Onatario, Kanata. Sa ia tomanatu pe faamata e faape’i lagona o le a i ai i lo latou fale fou.
“Mama, e lagona le fiafia tele i le fale o Zoey,” sa fai atu ai Mia a o faamoe o ia e Mama i lona moega. Ou te manao i lo tatou fale fou ia lagona foi faapela.” Sa mafaufau Mia e uiga i lona alofa tele ia Tina, Tama, ma ona tuagane laiti. “Ou te fia manao ia faavavau foi lo tatou aiga.”
Sa faalogo ma le filemu Tina. Ona ia fai mai lea, “E faapena foi a’u.”
O le aso na sosoo ai, sa valaau atu ai Tina i le tina o Zoey. Sa ia iloa ai e auai le aiga o Zoey i Le Ekalesia a Iesu Keriso o le Au Paia o Aso e Gata Ai.
“Ou te fia alu i lena lotu,” sa fai atu ai Mia i ona matua a o teu a latou ato. Sa toetoe lava a gaogao lo latou fale.
“Sa fai mai le tina o Zoey e mafai ona ia fesoasoani ia i tatou e sue se fale lotu,” sa fai mai ai Tama a o faamau se pusa.
Sa ataata Mia ma lagona se minoi i totonu o lona manava. Atonu e mafai ona lagona le mafanafana ma le fiafia o lo latou fale fou e pei o le fale o Zoey!
Ina ua latou faamautu i lo latou fale fou, sa amata loa ona ō le aiga o Mia i le lotu. Sa lelei tele tagata iina. Sa ta’u e tagata uma le tasi ma le isi o “Uso” ma “Tuafafine.” Sa o Mia ma ona tuagane laiti i le Peraimeri. Sa fiafia o ia e usu pese ma faitau ia tusitusiga paia.
Sa le’i pine ae o mai ni tamaitai talavou se toalua i le fale o Mia. O o laua igoa o Sister Justin ma Sister Ramos, ma o i laua o ni faifeautalai. Sa la ta’u atu i le aiga o Mia e uiga i le Tama Faalelagi, Iesu, ma le Tusi a Mamona. Sa fiafia Mia e faalogologo e uiga i le talalelei. E oo lava i ona tuagane sa saofafai ma le fifilemu ma faalogo!
Sa ta’u atu e Mia ia Sister Justin ma Sister Ramos e uiga i le fale o Zoey. “Ou te manao i se aiga e faavavau e pei o le aiga o Zoey.”
“E finagalo le Tama Faalelagi ia i tatou uma ia i ai ni aiga e faavavau,” sa fai atu ai Sister Ramos ma se ataata tele. “E finagalo o ia ia tatou fiafia.”
Sa le’i pine ae filifili loa le aiga o Mia ina ia papatiso.
Sa malaga atu Zoey ma lona aiga i le taavale i Onetario mo le papatisoga. I le tausaga mulimuli ane, sa latou toe o mai foi. O lenei la taimi ona ua faamauina ai Mia ma lona aiga i totonu o le malumalu!
O le aso o le faamauga, sa tu ai Mia i fafo o le malumalu faatasi ma lona aiga, sa laei papae. Sa latou ataata fiafia tele. Sa lagona e Mia le mafanafana ma le filemu i lona loto. “Ua avea nei i matou o se aiga e faavavau!” sa ia fai mai ai ma le fiafia.
“E sa’o,” na fai mai ai Tama. “O i tatou o se aiga e faavavau.”