Tamoe atu i totonu i le Ekalesia

Daniel R. Thompson, Kalefonia, ISA

I se tasi aso, a o tau saili se nofoaga e tamoe ai, sa ou filifili e faataitai le pakaga taavale o se lotu i le matou pitonuu. Sa ou fiafia i ai ona sa malamalama i molī ma faasimā. Sa ou iloa o le tamoe faasefulu i le faasefululima faataamilo i le fale o le a atoa ai la’u toleniga tolu maila (4.8 km).

O a’u tamoega i le pakaga taavale sa faaauau pea, sa fai ma tuu, mo le tolu tausaga. Mai lea taimi i lea taimi, sa ou vaai ai i tagata i le pakaga taavale ona o nisi taimi ou te tamoe ai a o faia ni sauniga Lotu ma isi gaoioiga.

E tele ni taimi, sa ou maua ai uunaiga sa ou manaomia ona talanoa i se tasi e uiga i le Ekalesia, ae sa ou le iloa pe faapefea ona faia. A o ou foi atu i le fale mai le galuega i se tasi afiafi, sa tonu ai ia te a’u ou te afe [i le falesa] ma vaai pe mafai ona maua atu ai se tasi iina. Ina ua ou savali atu i totonu o le falesa, sa ou maua atu ai faifeautalai a o faamaeaina le la faatalanoaga ma lo la peresitene o le misiona. Sa ou faailoa atu i ai a’u lava ma matou nonofo ai i lalo i le faapaologa. O iina sa la’ua aoaoina ai a’u i la’u uluai lesona o le talalelei.

I le gasologa o isi vaiaso e lua na sosoo ai, sa faaauau ai pea ona matou feiloai ma faifeautalai. Ina ua ou auai i le sauniga faamanatuga, sa faaali mai e tagata o le uarota ia te a’u le alofa, taliaina, faaaumeaga, ma le faamalosiauga. A o ou mafaufau e uiga i mea sa ou aoaoina, sa ou iloa ai o lo’u fiailoa e uiga i le Ekalesia sa atiaeina i se manaoga mo a’u ia filifili ina ia papatisoina. Sa ou lagonaina le uunaia o a’u e le Agaga e fai le mea ua finagalo lo’u Tama Faalelagi ia te a’u e fai, ae sa ou faaauau pea ona tauivi ma le faaiuga. Sa i’u lava ina papatisoina a’u ia Novema 2001, i le 36 o o’u tausaga.

O la’u faaiuga e tamoe i totonu o le pakaga taavale o le falesa sa foliga mai sa le’i taua i lena taimi. Ae sa taitai atu ai i o’u faamanuiaga silisili: o lo’u avea ai ma tagata o le Ekalesia; feiloai ai i lo’u toalua aulelei, o Jennifer; ma faamauina ai ia te ia mo le olaga nei ma le faavavau i le Malumalu o San Diego Kalefonia.

O lea la, afai e te vaai i se tasi o faamalositino i le pakaga taavale i le tou falelotu, ia faailoa i ai oe lava ia. E te le iloa lava—atonu e le pine ae avea o ia ma tagata sili ona fou o le tou uarota!