O Le Auala na Faamanuiaina ai i Ma’ua i le Faasoaina Atu o le Talalelei
I le avea ai ma tagata fou faatoa liliu mai, sa ma le iloa ma lo’u toalua le tele o mea e uiga i le avea ma ni faifeautalai. Ae sa ma setiina se sini e faasoa atu i ni tagata se 100.
O Never ma Everjoyce Chikunguwo
O ma’ua ma lo’u toalua, o Everjoyce, e o mai mai le tamai aai o Mutare, i le tuaoi i sasae o Zimbabwe. I le taimi lava na uma ai ona papatiso i ma’ua ma faamauina, sa vave ona ma fiafia i le faiga o galuega faafaifeautalai. Sa ma faitau e faapea “ua sinasina le fanua ua saunia e selesele” (MF&F 33:7), ma e ui sa ma le’i iloaina le tele o mea e uiga i le avea ma faifeautalai, ae na tonu ia i ma’ua e manaomia ona ma “sasau atu a [ma’ua] selesaito, ma selesele ma o [ma’ua] manatu atoa, mafaufau atoa, ma le malosi atoa.”
O i ma’ua o tagata o le Paranesi a Dangamvura faatoa faatu lava i se tasi o taulaga o Mutare. I lena taimi, i le 1991, sa to’a 25 tagata o le paranesi. Sa le’i pine ae valaauina i ma’ua o faifeautalai o le paranesi. Sa tele ni mea na ma aoaoina mai se ulugalii matutua faamisiona na auauna i le matou eria. O se tasi o fautuaga na la faia o le setiina lea o ni a ma sini.
Sa ma mananao e faasoa atu le talalelei i tagata uma, o lea sa ma setiina ai le sini o le faasoa atu o le talalelei i tagata e toa 100 i le gasologa o le tausaga muamua na avea ai ma’ua ma faifeautalai o le paranesi. Atonu sa leai se ma potomasani, ae sa foliga mai sa moni lava ia i ma’ua. Sa ma faatuatuaina lava o le a fesoasoani mai le Alii ia i ma’ua.
E ala i le usuina o viiga i le Lotu, na ma iloaina ai sa i ai se ma taleni natia mo musika. Sa ma filifili e faaaoga a ma taleni, o lea na ma amata pepese ai mo—ma faatasi ma—tagata na faaalia le naunau i le talalelei a o matou feiloai e aoao i latou. Sa faatasi mai le Agaga ma i ma’ua a o ma usuina musika paia, ma sa Ia pa’i atu i loto o i latou sa ma aoaoina. Sa faapena foi i le savali o le talalelei toefuataiina. Sa ma uunaia tagata uma ia auai i le aufaipese a le matou paranesi, ma sa toatele na auai, pe o i latou o nisi o le Au Paia o Aso e Gata Ai pe leai. A o faatoateleina tagata e aoao e uiga i le talalelei, sa toatele na ulu atu i vai o le papatisoga.
Ata na tusia e Oriol Vidal
A o faaauau ai a ma taumafaiga faafaifeautalai, sa ma faaauau foi ona anapopogi ma tatalo mo aiga na auai i le Ekalesia. Sa ma lagonaina foi na molimauina e isi i le nuu ia faataitaiga amiotonu a nei aiga. Sa faateleina valaaulia na ma mauaina e aoao atu ia aiga, ma na faatumuliaina le ma lisi o aoaoga i tagata faaolioli o le ekalesia.
I se taunuuga o le aoaoina ma le ola ai i le talalelei, sa oo ina vavalalata ma agaalofa atili ulugalii faatoa papatisoina. Sa mafai e matua ona lafoai ese tumasani sa le ogatusa ma le aganuu o le talalelei. Sa latou le toe tagofia le ava malosi ma le tapaa. Sa latou aoao atu a latou fanau i mataupu faavae sa’o. O le toatele o e na matua taulai atu i mea o le lalolagi i le tuanai ua mafai nei ona taliaina valaauga i le Ekalesia. Sa oo ina avea i latou ma faamanuiaga i le latou paranesi ma le latou nuu. Sa aumai e le aao o le Alii se suiga tele i o latou olaga.
E ui sa alia’e se sauaga tele i Mutare i lena taimi, ae sa le’i taofia ai le tuputupu a’e o le Ekalesia. Sa foliga mai a o faatupulaia le au tetee, sa faapena foi le aofai o tagata sa mananao e aoao e uiga i le Ekalesia. Mo se faataitaiga, ina ua o mai nana alii o le vaegaau a le malo e suesue le Ekalesia mo ni measese, sa ootia i latou i le Agaga. Sa toatele na papatiso mulimuli ane ma faauuina i le perisitua.
Faatasi ai ma le fesoasoani a le Alii, sa i’u ai ina ma faasoaina atu le talalelei i tagata e toatele atu nai lo le ma uluai sini. Ona sa ma naunau e saili mo ni auala e mafai ona ma aapa atu ai i isi, sa mafai ai ona ma molimauina se suiga tele i olaga o le toatele i le matou nuu atoa.