“O le Mea Moni, o A’u o se Tasi”

Abby Thorne

Iuta, ISA

Faato’a ou nofo ifo lava i lalo i le nofoa o le pasi ae fālō mai se tamaloa mai le auala savali ia te a’u ma fai mai, “E i ai sou agaga matagofie.”

E le tau fai atu, sa ou te’i. E le’i faamalo muamua mai lava se isi ia te a’u e uiga i lo’u agaga. I le le mautinoa ai pe faapefea ona tali atu, sa na ona ou fai lava i ai, “Faafetai lava.”

Sa ta’u mai e le tamaloa ia te a’u na mafai ona ia iloa ona o lana galuega ma lana vaega faalelotu. Sa ou faalogo ia te ia a o ia tuuina mai ia te a’u fautuaga i le auala e faatumauina ai le matagofie o lo’u agaga.

Ina ua afe atu le pasi e tu, sa ma taufai tutu uma i luga e o ese ma sa ia tuu mai se manatu mulimuli ia te a’u: “Ia mautinoa e aua lava ne’i e faalogo i na Mamona.”

Sa foliga mai na tu le taimi mo se minute. Sa vaai lenei tamaloa i se mea faapitoa i o’u foliga, ae sa leai sona manatu sa mafua ona o la’u tapuaiga.

O le a faapefea la ona ou tali atu? Ma le faamaoni lava, o lo’u manatu muamua lava o le fai atu o se tala ma faafoliga ou te lei lagonaina o ia. Sa ou popole afai ou te ta’u atu ia te ia o a’u o se tagata o le Ekalesia, atonu e tali le lelei mai pe faiupu malolosi mai foi.

Ae na oo mai se mau i lo’u mafaufau: “Aua ou te le ma i le talalelei ia Keriso: aua o le mana lava lea o le Atua e ola ai i latou uma o e faatuatua” (Roma 1:16). Sa ou iloaina ou te le ma i le talalelei, ma sa ou iloaina sa le mafai ona susulu atu lo’u agaga mo isi pe a na fai ou te lei tu atu o se molimau. Faatasi ma lo’u naunautaiga fou, sa ou tepa atu i le tamaloa ma fai i ai, “O le mea moni, o a’u o se tasi [o i latou].”

Sa pulatoa mai le tamaloa ia te a’u ae ou pulatoa atu i ai. Sa faateia a’u, sa ata o ia ma fai mai e le mafai ona auai o ia i le Ekalesia ona e fiafia tele o ia i le kofe. Sa ou ata foi, ma alu loa le tagata ia i lona ala.

E oo mai i lenei aso o loo ou fiafia lava e uiga i le filifiliga sa ou faia. Ou te iloa e mafai ona faigata ona tu atu o se tagata o le Ekalesia. O nisi taimi e ono taufaamatau! Ae a tatou tutu atu mo le Atua, e mafai ona susulu atu o tatou agaga e avea ma malamalama i le lalolagi.