Taulimaina o Fesili Faigata: 3 Mataupu Faavae E Mafai Ona Fesoasoani

O le auala lenei e saili ai tali i se ala e faamalosia ai lou faatuatua.

Sa i ai sau fesili e uiga i le talalelei po o le Ekalesia? Pe sa e popole pe o le uiga o lau fesili ua le lava lou faatuatua po o le le lava foi o le malosi o lau molimau?

O fesili o se vaega masani ma talafeagai o lau malaga i le olaga faaletino. E mafai ona latou taitai atu oe i le malamalama ma le faatuatua. Peitai, o ou uiga, uunaiga, ma le faagasologa mo le sailia o tali e aafia ai le taunuuga.

I le seminare o le a e aoao ai i nei mataupu faavae e tolu o le atamai i aoaoga faavae e mafai ona fesoasoani e taiala oe i upu moni e faavavau.

Faatino i le Faatuatua

A i ai sau fesili, e mafai ona e faatino i le faatuatua e ala i le filifili e faalagolago i le Atua ma liliu atu muamua ia te Ia mo ni tali. E aumai e le Atua ia tali i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). E taua le faalagolago i le molimau ua uma ona e maua i taimi e masalosalo ai.

“Masalosalo i ou masalosaloga ae e te lei masalosalo i lou faatuatua.”¹ —Elder Dieter F. Uchtdorf

“Pipiimau i mea ua uma ona outou iloa ma tutu malosi seia oo ina oo mai le malamalama sili atu.”² —Elder Jeffrey R. Holland
Iloilo Manatu ma Fesili i se Vaaiga Faaletalalelei

Afai e te iloiloina ni fesili i le anotusi o le ata o le faaolataga ma aoaoga a le Faaola, o le a mafai ona e amata vaai i mea i le ala e silasila i ai le Atua. O lenei faiga o le a fesoasoani ia te oe e toe suesueina au fesili e faaaoga ai le tagavai o le upumoni a le Atua nai lo upu a le lalolagi.

“O le taula atu i upumoni e faavavau … o le a tatou maua ai le filemu lea e sau mai le faatuatua ia Iesu Keriso ma le iloa o loo tatou i ai i luga o le ala i le ola e faavavau.”³ —Peresitene Dallin H. Oaks

“Afai e te iloaina soo se mea e foliga mai o loo punitiaina le malamalama ma le olioli o le talalelei i lou olaga, ou te valaaulia oe e tuu i se vaaiga faaletalalelei. Vaavaai e ala atu i ni tioata faaletalalelei ma ia mataalia e aua le faatagaina ni mea e le taua i le olaga e faanenefuina lau vaaiga e faavavau o le fuafuaga sili o le fiafia.”⁴ —Elder Gary E. Stevenson
Saili le Malamalamaaga Atili e ala i Punavai ua Tofia mai le Lagi

Ua tuu atu e le Atua ia te oe ni punavai se tele e faaaoga a o e sailia le upumoni. Ua aofia ai le Agaga Paia, o tusitusiga paia, lou aiga, taitai o le Ekalesia, ma e oo lava i punavai i fafo atu o le Ekalesia e faamalosia ai lou faatuatua ia Iesu Keriso. A e saili mo ni tali, ia mautinoa ia e iloa le eseesega i le va o punavai e le faatuatuaina ma punavai e faatuatuaina, ia o le a faamalosia ai lou faatuatua ma valaaulia ai le Agaga Paia i lou olaga.

“O faamanuiaga e tele … e oo mai i au taumafaiga e faalautele, faalolotoina, ma faateleina lou malamalamaaga o le upumoni. Faaaoga ia tusitusiga paia ma tautinoga a perofeta e faalautele ai lou iloa.”⁵ —Elder Richard G. Scott (1928–2015)

“E faaauau pea ona tatou sailia le upumoni mai tusi lelei uma ma isi punavai anoa. ‘Afai o i ai nisi mea e mama, matagofie, pe logoleleia pe tauleleia, matou te saili atu i nei mea’ [Mataupu Faavae o le Faatuatua 1:13].”⁶ —Elder Dieter F. Uchtdorf

Faataitai i ai mo oe lava ia!

O faataitaiga nei ua faaalia ai le auala e mafai ona faia ai. Ia manatua e le o ni tali atoatoa nei, ua na o ni faataitaiga o le auala e mafai ona taumafai ai se alii talavou po o se tamaitai talavou e tali nei fesili mo i latou lava. O le a e manao e faaauau pea ona suesue ma tatalo e uiga i autu o loo i ai ni au fesili e maua ai ni tali ma faamalosia ai lau molimau.

Aisea e faataga ai e se Tama Faalelagi alofa ia mea leaga e tutupu?

Faatino i le faatuatua: Na ou lagonaina le alofa o le Atua mo a’u ma iloa o loo soifua o Ia, e ui ou te le malamalama i le mafuaaga e faataga ai e le Atua mea leaga e tutupu.

Suesue manatu ma fesili mai se vaaiga faaletalalelei: O le faitalia o se vaega taua o le ata o le faaolataga. Ua auina mai i tatou e le Atua i lalo i le lalolagi ina ia oo i tofotofoga, faia ni faaiuga, ma maua se tino faaletino. Ae o le faatagaina o tagata e fai ni faaiuga o lona uiga o nisi taimi o le a faia ai e tagata ni filifilliga sese ma aafia ai olaga o isi tagata. Ma o tofotofoga ia e le o se taunuuga o ni filifiliga le lelei—e pei o faalavelave faalenatura, le atoatoa o le malosi, ma le oti—e mafai ona maua ai avanoa mo tatou e faamalosia ai a tatou molimau ma faalagolago ai i le Atua.

Saili le malamalamaaga atili e ala i punavai ua tofia mai le lagi: O le a se tala a tusitusiga paia ma perofeta o aso nei e uiga i le mafuaaga tatou te oo ai i ni mea faigata? “O lou tiga ma ou puapuaga o le a nao sina minute laitiiti; ma ona oo lea, a fai e te talitalia lelei, o le a faaeaina oe e le Atua i lugā” (MF&F 121:7–8). Sa saunoa Elder Jeffrey R. Holland o le Korama a Aposetolo e Toasefululua e faapea, “E le tuua lava e le Atua i tatou, e le tuua i tatou e le lagolagoina i luitau tatou te fetaiai.”⁷ Ou te le iloa ia mafuaaga mo o’u tofotofoga uma, ae ou te talitonu na faatino e Iesu Keriso le Togiola mo a’u ma mo tagata uma. E mafai ona ou liliu atu ia te Ia ma i le Tama Faalelagi mo le filemu, malosi, ma le lagolago i taimi o o’u tofotofoga (tagai i le Alema 7:11–12).

E mafai faapefea ona ou iloa le taimi e talanoa mai ai le Agaga Paia ia te a’u?

Faatino i le faatuatua: E ui i nisi taimi e faigata ai mo a’u ona iloaina pe o o’u mauaina ni musumusuga, ae ou te iloa mai le faalogo atu i molimau a isi ma le faitauina o tusitusiga paia o le a fesoasoani mai le Agaga ia ou malamalama pe afai ou te taumafai e faalogo atu i Lana fautuaga.

Suesue manatu ma fesili mai se vaaiga faaletalalelei: Ua foai mai e le Atua ia i tatou le meaalofa o le Agaga Paia ina ia mafai ai ona tatou mauaina musumusuga e fai ai le mea sa’o. Afai ou te mauaina se uunaiga e fai se mea lelei, e mafai ona ou iloaina e mai le Agaga, e tusa lava pe foliga mai o o’u lava ia mafaufauga.

Saili le malamalamaaga atili e ala i punavai ua tofia mai le lagi: Ua aoao mai tusitusiga paia: “Ia e loto maualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (MF&F 112:10). Sa aoao mai Elder David A. Bednar o le Korama a Aposetolo e Toasefululua e faapea “o le manao faamaoni ma le agavaa e valaaulia ai le agaga o faaaliga i o tatou olaga.”⁸ Afai o loo ou taumafai ina ia lotomaualalo ma fai le mea silisili ou te mafaia ina ia agavaa ai mo le Agaga, o le a fesoasoani mai le Alii e taitai atu a’u i tali. O le a Ia aoao a’u i le auala e fetalai patino mai ai le Agaga ia te a’u.

Faaiuga

O fesili e le o se faailoga o le leai o se faatuatua; e masani lava o fesili o se faailoga o se molimau o loo tuputupu ae. A e faatino i le faatuatua, suesue manatu ma fesili mai se vaaiga faaletalalelei, ma saili le malamalamaaga atili e ala i punavai ua tofia mai le lagi, e mafai ona e mauaina ni tali i au fesili ma se faatuatua tele atu ia Iesu Keriso.