Sauniuniga o le Olaga

O A Mea Tatou Te Faia i le Malumalu?

O le malumalu o se nofoaga paia e mafai ona tatou faalatalata atili atu ai i lo tatou Tama Faalelagi ma Iesu Keriso. I totonu o le malumalu, e aoaoina ai i tatou i upumoni taua, auai ai i sauniga faaleperisitua (sauniga paia), ma osia ai feagaiga (folafolaga paia) faatasi ma le Atua e saunia ai i tatou e toefoi atu i Lona afioaga.

E mafai ona tatou mauaina sauniga mo i tatou lava faapea ai foi ma o tatou tuaa. Mo se faataitaiga, e mafai e talavou ona auai i papatisoga e fai ai ma sui o o latou tuaa ma isi sa lei mauaina le avanoa e papatiso ai i le pule tatau a o soifua i latou. Mo tagata matutua, o isi sauniga o le malumalu e aofia ai faaeega paia ma faamauga (e pei o faaipoipoga faalemalumalu).

Papatisoga ma Faamauga mo o Tatou Tuaa

O le papatisoga ma le faamauga e taua i le faaolataga o tagata uma e mafai ona tali atu, o e sa ola i le lalolagi (tagai i le Ioane 3:5). Peitai, e toatele tagata ua maliliu e aunoa ma le mauaina o le avanoa e faalogo ai i le talalelei pe mauaina foi nei sauniga. E ala i le alofa tunoa ma le alofa mutimutivale o Iesu Keriso, o se ala lea ua saunia mo tagata uma e maua ai nei faamanuiaga. I totonu o malumalu, e mafai e tagata agavaa o le Ekalesia ona faatino papatisoga e fai ai ma sui o i latou ua maliliu. I le lalolagi o agaga, o loo tala’i ai le talalelei (tagai MF&F 138), ma o i latou e faalogo i ai e mafai ona filifili e talia [le talalelei] ma sauniga e faatino mo i latou.

Faaeega Paia

O le upu faaeega paia o lona uiga o le “meaalofa.” O le faaeega paia o le malumalu o se meaalofa lea mai le Atua lea Na te tuuina atu ia te oe faamanuiaga faapitoa, e aofia ai le “mana mai luga” (MF&F 95:8).

Ina ua e auai i le Ekalesia, sa e mauaina ni sauniga se lua—papatisoga ma le faamauga. O le faaeega paia o le malumalu e maua foi i ni vaega se lua. Muamua, e te mauaina le sauniga amata, lea e “mulumulu” mama ai oe i se faiga faafaatusa ma tauagafau ma maua ai faamanuiaga faapitoa e faatatau i lou tofi paia ma le gafatia e faavavau. I le vaega lona lua, e te mauaina le vaega o totoe o lou faaeega paia a o e aoao atili e uiga i le ata o le faaolataga, e aofia ai le Foafoaga, lo tatou faamoemoega i le lalolagi, ma le misiona ma le Togiola a Iesu Keriso.

I le taimi o le faaeega paia, tatou te faia ai ni folafolaga faamaoni ia usiusitai i le Atua, mulimuli ia Iesu Keriso, ia ola mama a’ia’i, ma fesoasoani e fausia le malo o le Atua. Afai tatou te tausia a tatou feagaiga, tatou te maua folafolaga o le mauaina o faamanuiaga uma e faavavau a le Atua.

Faamauga

O aiga e totonugalemu i le fuafuaga a le Atua mo lo tatou fiafia. O le tuufaatasia o aiga e faavavau o le faamanuiaga silisili lea o loo maua i totonu o le malumalu e ala i le pule faamau o le perisitua—le pule lava lea e tasi sa ta’u atu e Iesu i Ana Aposetolo (tagai i le Mataio 16:19). O faamauga o le malumalu ua mafai ai e tane ma ava ma fanau ma matua ona faatasia e faavavau e ala i lo latou faamaoni i a latou feagaiga.

O Faapefea Ona E Saunia?

E mafai faapefea e le tausiga o au feagaiga o le papatisoga ona fesoasoani ia te oe e saunia ai e maua sauniga o le malumalu?

O a nisi mea e te manaomia ona fai e saunia ai e maua sauniga o le malumalu?

O aoga lau pepa faataga o le malumalu. Afai e le o i ai sau pepa faataga o le malumalu, e mafai ona e faatulagaina se taimi e vaai ai lou epikopo po o le peresitene o le paranesi.

Ina ia aoao atili e uiga i le alu i le malumalu mo le taimi muamua, asiasi i le “Inside Temples” i le lds.org/temples.

O Le Malumalu: O Se Faatusa o lo Tatou Faatuatua

“O malumalu taitasi o se faatusa lea o lo tatou faatuatua i le Atua ma o se faamaoniga o lo tatou faatuatua i le olaga pe a mavae le oti. O le malumalu o se faamoemoega lea o gaoioiga uma, lesona uma, ma laasaga uma e agai ai i luma i le Ekalesia. O a tatou taumafaiga uma i le talaiina atu o le talalelei, faaatoatoaina o le Au Paia, ma le togiolaina o e ua maliliu e tau atu i le malumalu paia.”

Peresitene Russell M. Nelson, “Ia Saunia mo Faamanuiaga o le Malumalu,” Liahona, Oke. 2010, 46.