Auina Atu e le Faifeau Peresipeteriane Samoa le Fanau i ni Misiona
Sa avea o ia ma se Faifeau Peresipeteriane o le na lauga atu i lana faapotopotoga mai le Tusi Paia mo le silia ma le 20 tausaga.
Ma a’o avea o ia ma se faifeau, sa ia auina atu le toalima mai le toaono o lana fanua i ni misiona mo le Ekalesia a Iesu Keriso o le Au Paia o Aso e Gata Ai.
O le susuga ia Faatalimaua “Moapi” Uelese o le ua maliu e manatuaina pea o se tamalii e le’i faamaimauina ni ana upu po o lona taimi.
Ae i lalo ifo o lona uiga filemu, sa soifua Moapi i se olaga tulaga ese.
Sa soifua mai i Fasito’o Uta, Samoa, sa valaauina Moapi e avea o se faifeau mo le Ekalesia Peresipeteriane i le vaitau o le 1990. Sa maua lana tusi faamaonia faafaifeau ma galue soosootauau ma le Faifeau o lana tapuaiga pele, ma tuuina atu le tele o lauga mai le Tusi Paia.
Sa ia malamalama i le Tusi Paia i totonu ma fafo ma ola e tusa ma ona aoaoga, o le tala lea a le afafine a lana fanau o Shaqaila.
“O ia o se tagata e le tautala soo ae pe a ia tautala e i ai lava pea sina faailoaga o le Atua. E auai o ia i le lotu i Aso Sa uma ma lauga atu i le tele o sauniga,” o le tala lea a le afafine a lana fanau.
Ina ua latou siitia atu i Niu Sila, sa liliu lana fanau o Roy, Vini, Dave, Moapi, Siaosi, ma Mareta i le Mamona. E toalima mai le toaono na auauna atu i ni misiona.
Fai mai lona faletua o Ma Italia Uelese la te faatagaina le la fanau e auai i Le Ekalesia a Iesu Keriso o le Au Paia o Aso e Gata Ai ona e “lelei”.
“E le ulaula ma inupia tagata o le Ekalesia o lea ma te fiafia ai i tulaga faatonuina o le Ekalesia ma vaai i le eseesega sa faia i olaga o le ma fanau,” o lana tala lea.
Ina ua maea a latou misiona, sa auauna atu atalii o Moapi i ni tofiga faaletaitai i le Ekalesia o ni Epikopo, Peresitene o Siteki ma i le Au Fautua Maualuga.
Peitai o le susuga i le faifeau ia Moapi sa fiafia tele i le faatuatuaga Peresipeteriane ma sa musu e liliu i le Mamona.
“Na te lei tetee i le Ekalesia i soo se auala, mamanu po o tulaga,” o le tala lea a Shaqaila.
“Ae sa matua maaa lava o ia. Ina ua talosaga atu tagata o le aiga ia te ia ma tinamatua e papatiso, na te tali mai, ‘Ou te iloa le ala i le lagi’. E masani lava ona talie i matou o fanau a fanau e uiga i ai ona o ia o se tagata matua ulu malo lava, ae na faamaluluina lona loto i le aluga o taimi.”
I tausaga e tele mulimuli ane ma i le 78 o ona tausaga, na auai ai Moapi ma lona faletua i le sauniga faamanatuga mo le uluai taimi i se faletapuai a le Au Paia o Aso e Gata Ai, o ni nai vaiaso ao lei maliu le la tama tama o Moapi le Itiiti.
“Sa la nonofo i le atulaina pito i tua ma sa fai le matatioata pogisa a tamamatua. I se taimi mulimuli ane sa la fesili ai i lo’u tama po o le a se mea na te manao mai ia i laua ao lei maliu. Sa matou manatu o le a talosagaina i laua e tama ina ia papatiso aua o se manaoga sili lea a le aiga, ae peitai na te lei fai i ai, sa ia faaali atu lona alofa mo i laua ma sa la tuumuli atu.”
Ao lei maliu [Moapi le itiiti], sa tele ni po sa le mafai ai ona moe Moapi. E tele ina ia miti i lona atalii o loo fai mai, “Ou te alofa ia te oe tama”.
O lena mea na matua faagaeetia ai ma atuatuvale ai o ia, o le tala lea o le afafine ia Mareta.
I le sauniga o le falelauasiga a lona atalii i Hastings, sa lagona e Moapi le “le mautonu” ma sa o ese faatopetope atu mulimuli ane.
I lena afiafi sa ia feiloai ai ma lana fanau i Aukilani ma tau atu ia i latou “O le a ma papatiso ma Tina”.
“O le mea moni lava, ou te manatu sa fai sina matou tetei” o le tala lea a Shaqaila.
“Ou te lei mafaufauina o le a ou ola e vaai i le aso o le a ia tuua ai lana ekalesia ma liliu mai i la matou ekalesia.”
O le masina talu ona mavae le maliu [o Moapi le itiiti], ia Novema 2012 na ulu ifo ai Moapi ma lona faletua o Ma Italia Uelese i le vai o le papatisoga. Na 78 tausaga o Moapi ae 72 lona faletua.
O le aso na sosoo ai, na faailoa atu ai e Moapi le talafou i lana aulotu o le a ia auai i le Ekalesia Mamona.
“Sa tetei ma faanoanoa le aulotu ona o le a latou misia o ia. O ia lava le tagata sa vaaia i latou uma. Peitai sa latou malamalama uma lava ona sa latou iloa o lana fanau sa Mamona,” o le tala lea a le afafine ia Mareta.
Ma o faamanuiaga ia na mulimuli mai ina ua mavae lena aso na matua maoae lava, o le tala lea a Shaqaila.
“Soo se taimi lava ou te alu ai e asi i la’ua, ou te lagona sa i ai le Agaga i lo la fale,” o lana tala lea.
“Na faamalosia la’u molimau i le savali atu i totonu ma vaai ia te ia [Moapi] o faitauina le Tusi a Mamona i le Faasamoa. E faasoa mai e tamamatua lona malamalama mai le Tusi a Mamona ma e mafai ona e iloa e i ai sana molimau e uiga i ai.”
“Ma le isi, ina ua ia papatiso sa ia tuuesea le aganuu Faasamoa lea e tetee atu i aoaoga o le talalelei. Sa ia talosagaina ia aua lava nei faia se Faasamoa i lona falelauasiga. Sa ia faamuamuaina le talalelei nai lo lona aganuu ma o se tulaga maoae lea mo ia ma le aiga.”
O Moapi o le ulumatua o le fanau e toa 11—ua papatisoina uma i latou i le Ekalesia. Sa faamauina uma i latou mulimuli ane i le malumalu.
Na maliu Moapi i le aso 11 Fepuari, 2018, o siosiomia e uo mamae ma aiga.
Ua faamoemoe Shaqaila o le a manatuaina pea lona tamamatua o se “tagata e matau i le Atua ma tumu i le faatuatua.”
“Sa ia tuua se talatuu—ia faatuatua e le aunoa i le Atua ma le Faaola ma ia naunau e faia ni ositaulaga e mulimuli ia i laua.
“Ina ua maliu tamamatua sa ia silafia lelei lava le mea o le a ia alu i ai. Na fiafia o ia e alu. Sa aumaia ia te ia e le talalelei le filemu ma le faamautinoaga afai o le a oti o ia o le ia faatasi ma le Atua ma e pele ia te ia.
“Aua lava le faavaivai—e tutupu vavega.”