Ina Ua Faigata le Auauna Atu
E alala le tusitala i Santiago, Filipaina.
E mafai faapefea ona ou tausia se tagata ma se uiga faigata faapea?
Ata na tusia e Chris Thornock
O se tasi o mea aupito sili ona luitauina ua ou faatoilaloina, o lo’u uiga “Ou te le kea.” Sa ou le pulunaunau i mea sa ou faia, sa ou ita ma lē onosai i tagata.
Sa suia atoa lenei uiga i se tuuaga a le aoga ina ua talosagaina a’u e tausi lo’u tama matua e 76 tausaga le matua. O “Papa,” e pei ona matou valaauina ai o ia, sa mafatia i le pe o le tino (stroke), lea sa pe atoa ai le afa o lona tino. Ina ua talosaga a’u e lo’u aiga e tausi o ia mo le lua masina, sa le mafai ona ou mafaufauina pe faapefea ona fai!
Sa tatau ona ou vave ala i luga e sauni lana malu taeao, lana vai taele, ma ana vailaau faafomai. Sa ou fesoasoani ia te ia e savalivali solo mo ana faamalositino i aso taitasi. Talu ai e faigata ona fealuai, o lea sa ou i ai i ona talaane i taimi uma, sa aofia ai le taimi e faamālū ai ma le falemamao. I le avea ai ma se teine 18 tausaga le matua, o le vaega lenei sa sili ona faigata.
E ese ai mai nei mea uma, sa faigata ona faatasi ma ia. E le o ia o se tagata o le Ekalesia ma sa ese ana mataupu faavae nai lo a’u. O ia o se toeaina sa tumu i faanoanoaga—sa faataio i taimi uma, e le taitai ata, ma fai mai soo, “O le a ou oti!” Ona o lenei uiga, sa faigata ai mo i ma’ua ona fefaasoaa’i i se sootaga lelei.
O le taimi muamua, sa ou faia mea uma na mafaia e aloese ai mai a’u feau, ae sa le aoga lena faiga. O lea sa ou filifili ai e sui o’u uiga ma tuu atu la’u taumafaiga silisili ona lelei.
I le mavae ai o se vaiaso o lenei uiga fou, o le auauna atu ia Papa sa oo ina avea ma se olioliga ia te a’u. Sa faatupulaia lo’u onosai, ma sa oo ina ou malamalama i ona mafatiaga. A o ou auauna atu ia te ia, sa ou le toe manatu ia te ia o se avega ae nai lo lena, o se avanoa e fatua’i ai ni taimi lelei faatasi ma ia.
Sa suia foi Papa. O lenei toeaina mata faasiasia sa avea ma tamamatua laumatafiafia ma agamalu. Sa oo lava ina fiafia e faalogologo i pese o Faapitoa mo le Autalavou (EFY).
I se tasi po na ou faalogo atu ai ia te ia o manamananū mai, o lea sa ou tilotilo atu ai i totonu o lona potu e fia iloa po o le a lana mea o fai. Sa tatalo o ia mo le taimi muamua. Sa musuia lava a’u i aso uma e lenei suiga.
O lea la ua ou toe foi i le kolisi, ae o loo ou alu pea faalua i le masina e asi Papa faatasi ma lo’u aiga. Ma te aai faatasi ma ia ma pepese faatasi ma ia. Ua faateteleina le faaletonu o lona soifua maloloina, o le taimi nei la o le fesoasoaniga aupito sili ona mamana e mafai ona ou avatu o tatalo mo ia.
Ou te faafetai mo le avanoa e tausi ai Papa ona sa fesoasoani ia te a’u e iloa mea ou te gafatiaina ona avatu. O le alofa o se mea mamana tele—na ia faamaluluina uma o ma loto ma Papa. Ua ou aoaoina le uiga o le ositaulaga ma le agaalofa. O le mea moni, e faamalamalama e le alofa mama loto uma!