Seia Tatou Toe Feiloai
Aumai e le Tusi a Mamona le Anoanoai o Faamanuiaga
Mai le “O Le Tusi a Mamona—O Le Maa ‘Au’au o La Tatou Tapuaiga,” Liahona, Ian. 1987, 6–7.
O loo i ai se mana i le tusi o le a amata ona tafe mai i o outou olaga i le taimi tou te amatalia ai se suesuega faamaoni o le tusi.
Ata na saunia e Bjorn Thorkelson
Pe le o i ai ea se mea i le taele o o tatou loto o loo faananau atu ia latalata atili i le Atua, ia avea atili e faapei o Ia i a tatou savaliga i aso taitasi, ia lagonaina Lona faatasi mai i taimi uma ia i tatou? Afai o lea, o le Tusi a Mamona la, o le a fesoasoani sili atu ia i tatou [ia latalata atili atu i le Atua] i lo se isi lava tusi.
Ua le na o le faapea ua aoao mai e le Tusi a Mamona ia i tatou upu moni, e ui o le mea moni lena na te faia. E le na o le faapea ua molimau mai e le Tusi a Mamona ia i tatou Keriso, e ui ina tonu lena mea. Ae e i ai se mea e sili atu. O loo i ai se mana i le tusi o le a amata ona tafe mai i o outou olaga i le taimi tou te amata ai ona faitau ma suesue ma le loto i ai i le tusi. O le a outou maua ai le malosi sili atu e tetee atu ai i faaosoosoga. O le a outou maua ai le mana e aloese ai mai mea tau faasese. O le a outou maua ai le mana e tumau ai i le ala lauitiiti ma le vaapiapi. O tusitusiga paia ua ta’ua o “afioga o le ola” (MF&F 84:85), ma e leai se isi mea e sili atu ai ona moni lena faaupuga nai lo o le Tusi a Mamona. A amata loa ona e matelaina ma galala i le fia maua o na afioga, o le a e mauaina le ola i se faatelega sili atu naua o faamanuiaga. …
O nei folafolaga—alofa ma le lotogatasi faateleina i le aiga, ava ma le faaaloalo i le va o matua ma fanau, faaleagaga ma le amiotonu faateleina—e le o ni folafolaga fai fua, ae o le uiga tonu lava lea o le saunoaga a le Perofeta o Iosefa Samita ina ua ia saunoa o le a fesoasoani le Tusi a Mamona e faalatalata atili atu i tatou i le Atua. …
Ua silia ma le 10 tausaga talu ai na ou faia ai le faaupuga lenei e uiga i le Tusi a Mamona:
“Pe o faalagolago ea taunuuga e faavavau i lo tatou tali atu e uiga i lenei tusi? Ioe, a lē o lo tatou faamanuiaga ia po o lo tatou ta’usalaga.
“O tagata uma o le Au Paia o Aso e Gata Ai, e tatau ona avea le suesueina o lenei tusi o se galuega faifaipea o le olaga. A leai o loo ia tuuina lona lava agaga i le tulaga lamatia ma teenaina le mea lena e mafai ona maua ai e lona olaga atoa le lotogatasi faaleagaga ma faaleatamai. O loo i ai se eseesega i le va o se tagata liliu mai o loo atiae i luga o le papa o Keriso e ala i le Tusi a Mamona ma piimau pea i lena āi uamea, ma le tagata e le o faia faapea.”
… Aua tatou te tumau i lalo o le ta’usalaga … e ala i lo tatou manatu mama i lenei meaalofa silisili ma ofoofogia ua tuuina mai e le Alii ia i tatou. Ae ia tatou maua folafolaga e fesootai ma le faatauaina [o le tusi] i o tatou loto.