Faatumauina o le Faatuatua i le Faaaunuua
Ina ua tuua e taua, faama’i, po o isi tulaga nei tagata o le Ekalesia na o i latou i o latou atunuu, o le auala lenei sa latou tumau ai i le faatuatua.
O le toatele o tagata o le Au Paia o Aso e Gata Ai i nei aso e tapuai i uarota ma paranesi, lea e mafai ona latou “potopoto soo … e anapopogi ma tatalo, ma talatalanoa o le tasi i le tasi e uiga i le uelefea o o latou agaga” (Moronae 6:5). Ae o Moronae, le perofeta na tusia na upu, sa faia nisi o le tele o ana galuega tumau a o tuua na o ia o se soo ina ua mavae le faafanoga o lona nuu.
I le talafaasolopito atoa lava o le Ekalesia, e toatele le Au Paia o Aso e Gata Ai na tumau i le faatuatua na o i latou ina ua tuua i latou i tulaga faaaunuua. O nisi, e pei o Moronae, na soifua lava i o latou aso o ni molimau ma faataitaiga mo tupulaga o lumanai. O isi na soifua ia vaai i se aso e mafai ona latou toe faasoa atu ai lo latou faatuatua.
Tatalo mo Tausaga mo Lenei Aso
Ata na tusia e Ken Spencer
Sa auai Františka Brodilová i le Ekalesia i Viena i le 1913—e tasi le tausaga a o lei amata le Taua 1 o le Lalolagi—ma sa lei i ai se fesootaiga ma isi tagata o le Ekalesia seia oo i le 1929.
Ata o Františka Vesela Brodilová mai faaaloaloaga a le Visual Resources Library
Sa fai si faigata ona muaivaaia e Františka Brodilová le matafaioi o le a ia faia i le talafaasolopito o le Ekalesia ina ua tu’itu’i atu se faifeautalai i lona faitotoa i Viena i le 1913. O le tausaga ina ua mavae lona liliu mai, sa aafia ai le Malo o Austro-Hungarian i le Taua 1 o le Lalolagi, sa toefoi atu faifeautalai i le fale, ma sa toatele alii o le ekalesia sa valaauina i le auaunaga faamiliteli, ma tuua ai Františka ma nai isi tuafafine e feiloai na o i latou.
O le fesootaiga sili lea na maua e Františka ma tagata o le Ekalesia mo le tele o tausaga. Ina ua mavae le taua, sa folafola atu i le tane a Františka, o František se tofiga i le faigamalo fou a Siekisolovakia. Ina ua la masii atu i Prague, sa na o Františka lava le tagata o le Ekalesia i lea atunuu. Sa maliu František i ni nai masina mulimuli ane, ma tuua ai Františka ma afafine laiti e toalua—Frances ma Jane—e tausi.
I le tuua ai na o ia, sa aoao ai e Františka ona afafine i le talalelei. “Sa tausi a’e a’u i le Ekalesia,” sa faamatala ai e Frances. “O le ekalesia o le matou fale lea!”1 Sa tusi atu foi Františka i taitai o le Ekalesia i Auseteria ina ia tofi atu ni faifeautalai i Siekisolovakia. Sa mumusu taitai o le Ekalesia ona o faifeautalai mulimuli lava i Prague, pe tusa ma le 40 tausaga na muamua atu, sa falepuipui mo le talaiga ona faate’a ese ai lea mai le aai. E ui i le faigamalo fou, ae sa popole pea taitai o le Ekalesia e itiiti lava sina mea ua sui.
I le le popole ai, sa faaauau pea ona tusi atu e Františka ni tusi ma tatalo mo se misiona ina ia faatuina. I le 1928, i le mavae ai ona tuua pea o Františka na o ia lava mo le sefulu tausaga, o Tomasi Pasina (Thomas Biesinger) 83 tausaga le matua—le faifeautalai lava e tasi lea sa talai i Prague i tausaga ua mavae—na toefoi ane. Sa foliga mai o le faaaunuua o le aiga ua faamutaina nei. Peitai, i se taimi puupuu mulimuli ane, o le tulaga faaletonu o le soifua maloloina o Elder Pasina na faamalosia ai o ia e tuua le atunuu.
Sa faalotovaivaia Františka ae sa tonu ia te ia e tusi atu pea i tagata ma taitai o le Ekalesia i nuu mamao. Sa tauia lona faapalepale: i le aso 24 Iulai, 1929, sa taunuu ai Elder John A. Widtsoe (1872–1952) o le Korama a Aposetolo e Toasefululua i Prague faatasi ma se vaega o faifeautalai. I lena afiafi, sa fe’a’ei ai Františka ma le vaega i luga o se mauga e lata ane i le Karlštejn Castle, lea sa faapaia ai e Elder Widtsoe ia Siekisolovakia mo le tala’iina o le talalelei ma faatulaga aloaia ai se misiona. “E toalaiti ni nai tagata e mafai ona iloaina le olioli na matou lagonaina,” sa tusia mulimuli ane ai e Františka. “Sa matou tatalo mo tausaga e tele mo lenei aso.”2
Sa i ai Františka ina ua faapaia e Elder John A. Widtsoe (i ai la’ua uma i le atulaina ogatotonu) ia Siekisolovakia mo le tala’iina o le talalelei i le 1929.
E toeitiiti lava ono masina o feiloai pea le paranesi i le fale o Františka. Mulimuli ane sa fesoasoani Františka i ona afafine i le faaliliuina o le Tusi a Mamona i le [gagana] Sieki ma faataatia se faavae mo le Ekalesia i le atunuu ua ta’ua nei o Ripapilika o Sieki.
E pei o Františka, e toatele tagata o le Au Paia o Aso e Gata Ai na onosaia le faaaunuua. O alii ma tamaitai nei sa i ai faatasi ma uluai tagata na faasoa atua le talalelei ma faataatia le faavae o le Ekalesia i o latou nuu moni, lea sa faatagaina ai isi e faasoa atu mulimuli ane i le faaaumeaina e le Au Paia.
O Le Meaalofa Tumau o le Faatuatua Moni
I le avea ai ma toeaina pulefaamalumalu, sa tauave ai e Fujiya Nara (i le suti uliuli) le tiute mo le faatumauina o le fesootaiga ma tagata o le ekalesia ina ua tapunia le Misiona a Iapani i le 1924.
Ina ua tapunia le Misiona a Iapani i le 1924, sa toatele tagata o le ekalesia na lagona le le mautonu ma le tuulafoaiina. O le taitaiga mo tagata o le ekalesia pe tusa ma le 160 o Iapani na taatia atu lea ia Fujiya Nara, o le toeaina pulefaamalumalu i le atunuu, o lana galuega i auala o nofoaafi na mafai ai ona ia asiasi atu i tagata o le ekalesia na salalau solo. Ina ua le mafai ona ia asiasi atu, sa faatumauina e Fujiya ana fesootaiga e ala i le lolomiina ma le faasalalauina atu o se mekasini na faaulutalaina Shuro (Lau Pama) lea na ia faasoa atu ai savali o le talalelei ma faamalosiau atu ai i le Au Paia i tausaga faigata na sosoo ai.
Ina ua mavae ona aveese e le galuega a Fujiya o ia ma avatu i Manchuria ma le faafuasei ona maliu o le na suitulaga ia te ia o le toeaina pulefaamalumalu i le 1937, sa lei pine ae motusia fesootaiga ma tagata o le ekalesia i Iapani. “E ui sa leai ni fesootaiga ma le Aai o Sate Leki,” sa saunoa ai Fujiya, “… ae sa i ai lava lo matou talitonuga maumaututu o le a toe tatalaina le Ekalesia [iinei].”3
I le taimi o le Taua Lona II o le Lalolagi, sa toefoi atu ai Fujiya i Tokio, lea na ia tala’i atu ai i ona tuaoi ma faatulaga ai ni sauniga a le Aoga Sa i vaiaso taitasi. Ina ua mavae le taua, sa maua ai se Fujiya se tusi na tuu e Edward L. Clissold—o se tagata o le Au Paia o Aso e Gata Ai sa tautua i le militeli a Amerika—sa valaauliaina tagata o le Ekalesia i le atunuu ia faafesootai atu o ia. Sa vave ona asiasi atu Fujiya ia Edward i lona potu o le faletalimalo. Ina ua auai atu Edward i sauniga a le Au Paia o Aso e Gata Ai i Tokio, sa faate’ia o ia i le oo atu e latalata i le 100 tagata na auai.
“I na mea uma,” sa saunoa mulimuli ane ai Fujiya, “o le meaalofa aupito silisili, ma se meaalofa tumau, o le iloaina lea ma le opomauina o le faatuatua moni—o lona uiga o le iloaina lea o le Tama Faalelagi, o Iesu Keriso ma le Agaga Paia.”4
Atiaeina o le Ekalesia i Hawaii
O se tasi o uluai tagata liliu mai i Hawaii, sa fesoasoani Jonathan Napela e faaliliu le Tusi a Mamona i le gagana Hawaii.
Ata o Jonathan Napela mai faaaloaloga a le Potutusi o Talafaasolopito a le Ekalesia ma Akaiva
O Jonathan H. Napela o se faamasino faaaloalogiaina tele i le motu o Maui a o lei papatisoina o ia ma lona faletua, o Kiti, i le 1851. Ina ua mavae ona faamalosia Jonathan e faamavae mai lona tofiga o le faamasino ona o lona auai ai i le Ekalesia, sa ia tuuto atu lona malosi e atiae ai le Ekalesia i tagata e tautatala i le gagana Hawaii. Sa aoao e Jonathan le faifeautalai o George Q. Cannon i le gagana, sa fesoasoani e faaliliu le Tusi a Mamona, ma atiae le uluai polokalama mo le aoaoina o faifeautalai i soo se gagana ese.
O se taunuuga, e silia ma le 3,000 tagata moni o Hawaii na auai i le Ekalesia i totonu o le tolu tausaga. “E matua manino lava ia i matou o le ekalesia lenei a le Atua,” sa tusia ai e Jonathan. “E toatele o i ai luga o nei motu ua mauaina se faatuatua malosi e ala i le alofa tunoa o le Atua, e ala ia Iesu Keriso le Alii, ina ia mafai ona mauaina le Agaga Paia.”5
I le 1872, sa maua ai Kiti Napela i le lepela ma sa manaomia ai ona ave i le nofoaga o lepela i Moloka’i. Nai lo le nofo ai faatasi ma le Au Paia, sa aioi atu ai Jonathan i le nofoaga ia taofia ai foi ma ia. “I le taimi puupuu na totoe,” sa ia tusi atu ai i le fono faatonu o le soifua maloloina, “Ou te fia faatasi ma lo’u toalua.”6 Sa taliaina le talosaga, ma avea ai Jonathan ma peresitene o le paranesi i Moloka’i. Sa galulue vavalalata lava Jonathan ma le patele Katoliko i le lotoifale, Patele Tamiano, e auauna atu ia i latou uma na mafatia i le faama’i. Sa i’u ina maliu Jonathan i le lepela na maua ai o ia i le nofoaga.
“Ua Ou Olioli i le Avea ai ma se Meafaigaluega i Aao o le Atua”
Wilhelm Friedrichs (lona lua mai le agavale) ma Emil Hoppe (ogatotonu, laina pito i tua) sa auai i le uluai papatisoga i Atenitina.
O le auaiga o Friedrichs ma Hoppe sa na o le pau ia o tagata o le Au Paia o Aso e Gata Ai i Atenitina ina ua latou masii atu iina mai Siamani i le amataga o le vaitau o le 1920. Sa taumafai Wilhelm Friedrichs ma Emil Hoppe e faasoa atu le talalelei i lo latou atunuu fou, sa tufatufa atu ia tamaitusi ma valaaulia isi e auai i a latou fonotaga. “Ou te faalagolago atoa i lo’u Tama Faalelagi o le a ia auina maia ni uo faamaoni o e o le a taliaina le Talalelei,” sa tusia ai e Wilhelm, “aua ua ou olioli i le avea ai ma se meafaigaluega i aao o le Atua.”7
Peitai, sa i ai ni luitau iloga. Sa nonofo valavala mamao ia aiga ma sa ao ona faimalaga i le lua itula ina ia feiloai faatasi ai. Ona o Emil o se tiakono ma o Wilhelm o se aoao i le Perisitua Arona, sa le mafai ai ona la faatautaia sauniga e pei o le faamanatuga pe tuu atu foi ni faamanuiaga faaleperisitua.
I le 1924, sa fanauina ai e Hildegarde Hoppe se pepe teine, ae sa maliu i le lua masina mulimuli ane. A o faanoanoa o ia, sa fesili ai Hildegarde pe mafai faapefea ona faaaofia le igoa o le pepe i totonu o faamaumauga a le Ekalesia. O se taunuuga, sa amata ona fesootai atu Wilhelm i taitai o le Ekalesia i le Aai o Sate Leki.
I le tausaga ma le afa mulimuli ane, sa auina atu ai Elder Melvin J. Ballard (1873–1939) o le Korama a Aposetolo e Toasefululua faatasi ma isi faifeautalai ina ia feiloai i le vaega faatupulaia o tagata liliu mai i Buenos Aires. Ina ua latou taunuu atu ia Tesema o le 1925, sa papatisoina e Elder Ballard le toatele o tagata liliu mai ma faatulaga ai se paranesi. I le Aso o le Kerisimasi, sa faapaia ai e Elder Ballard ia Amerika i Saute mo le galuega faafaifeautalai ma faatulaga ai le uluai misiona i le konetineta.
Toe Aumaiga o le Talalelei i Ona Tagata
Ina ua feiloai Phillipe ma Annelies Assard (agavale) ma Lucien ma Agathe Affoué i Côte d’Ivoire, sa olioli uma ulugalii e toalua i le iloa sa le i tuua na o i latou i le Ekalesia iina.
Sa atiae e Phillipe ma Annelies Assard se olaga toafimalie i le taimi na tu’itu’i atu ai faifeautalai i le la faitotoa i Köln, Siamani, i le 1980. Sa vave ona la taliaina le talalelei ma lagona le “lofituina i faamanuiaga.” Sa lei pine ae lagona e Phillipe se manao malosi e toe foi atu i lona atunuu moni o Côte d’Ivoire e faasoa atu i ai le talalelei toefuataiina. “O le 1986 la, i le mavae ai o le tele o tatalo ma anapogi ma lo’u toalua,” sa faamatalaina e Phillipe, “sa tonu ai ia te a’u e toe foi atu i Ivory Coast e foai atu mea ua ou maua, e faaleleia ai le toatele o lo’u aiga ma lo’u nuu.”8
A o lei tuua Siamani, sa feutagai Phillipe ma taitai o le Ekalesia. E ui sa leai ni iunite a le Ekalesia i Côte d’Ivoire, ae sa i ai se aofaiga o tagata sa auai i le Ekalesia a o i ai i isi atunuu. Sa tuu atu i le au Assards se lisi o o latou igoa ma mo le tausaga na sosoo ai sa ia tusitusi atu ai ma le filiga i tagata taitoatasi. Na faasolosolo lava, sa toefaamumu e le au Assards aloiafi o le faatuatua i isi ma sa maua ai le faatagaga e amata ona faia ni sauniga i Aso Sa i lo latou fale. Sa sosoo ai ma uarota ma paranesi, ma i le 1997 sa faatu ai le uluai siteki i Côte d’Ivoire.