O Se Tulaga o Lagona Faanoanoa o le Sapati

Saunia e Alyssa Nielsen

E alala le tusitala i Iuta, ISA.

Sa ou iloa lava e tatau ona ou fiafia i le Sapati, ae ou te leiloa pe faapefea.

Ua ta’u mai e tusitusiga paia o le aso Sapati o se aso paia. O se aso olioli ma fiafia, o se aso e malolo ai, o se aso faamanatu.¹ Ae i ni nai tausaga talu ai, a o ou talavou, sa ou maua ni Aso Sa faanoanoa. Nai lo le filemu, sa ou lagona le atuatuvale. Nai lo le olioli, faanoanoa. Nai lo le faamoemoe, ta’usalaina. Sa i ai ni ou lagona malolosi o le faanoanoa i le Sapati.

O taeao o Aso Sa taitasi, pe a maea se taimi tele o le maasiasi i le lafi i lalo o lo’u ieafu, e i’u lava ina ou ioeina o le Aso Sa moni lea ma fai ai loa o’u ofu mo le lotu. I le lotu, ou te iloiloina lo’u vaiaso ua tuanai. I le taimi o le faamanatuga, ou te faaopoopo uma mea na ou toilalo ai, e tu a’e lava le failauga muamua e le’i taitai lava uma [na faaopoopo]. O le vaega atoa e totoe o le lotu e avea ma se taua o le tautaofiofi o loimata a o faateteleina le ta’usalaina i faanoanoaga fou o lagona le fiafia tele i le lotu.

Sa faapena foi ma le aoauli. Ou te lagona le ta’usalaina i filifiliga ua tuanai, atuatuvale i filifiliga o le lumanai, ma le faanoanoa i tulaga o loo i ai i le taimi nei. A aunoa ma le aoga ma gaoioiga faaopoopo e faalavelave ia te a’u, ou te faaaluina lo’u taimi e mafaufau ai i manatu le lelei.

Ina ua maea ona faalogologo, faitau, ma toe faitau le saunoaga a Peresitene Russell M. Nelson i le konafesi aoao ia Oketopa 2015 e uiga i le auala e avea ai le Sapati o se aso fiafia, sa ou tatalo mo le filemu ma le fiafia mo le Sapati nai lo le faanoanoa lea sa ou lagonaina i le taimi nei.² Ma sa oo mai se tali.

Taulai Atu i le Tama Faalelagi ma Iesu Keriso

Sa ou lagona le uunaia e sui la’u taulai mai o’u pagatia i la’u sootaga ma le Tama Faalelagi ma le Faaola. Nai lo le mafaufau loloto i o’u toilalo, sa ou faaalu le taimi e mafaufau loloto ai i lo La aafiaga i lo’u olaga.

A oo mai mafaufauga le lelei, sa ou ta’u soo ia te a’u lava mea sa ou iloa ma talitonu i ai e uiga i le Atua ma Iesu Keriso: O a’u o se afafine o le Atua. E alofa o Ia ia te a’u. O Iesu Keriso o lo’u Tuagane, ma na Ia togiola mo a’u. E finagalo i Laua ia ou fiafia ma toefoi atu ia te i Laua. O le Sapati o se meaalofa mai le Atua.

Sa amata ona ou faatino le faatuatua i lenei molimau.

Talia ma le Agavaa le Faamanatuga

O le suia o la’u taulaiga na taitai atu ai a’u e toeiloilo foi le auala na ou taulimaina ai le faamanatuga. Mo se taimi umi na ou taulimaina ai le faamanatuga o se taimi e faasala ai a’u lava ia. Ae e le o lona faamoemoega lena. O le faamanatuga o se sauniga paia e toe faafou ai a tatou feagaiga. O se avanoa e toe faamamaina ai e ala i le mana togiola a Iesu Keriso. O le taulai atu i le sauniga ma le feagaiga i le faatuatua ma se loto salamo, na ou iloa ai sa ofo mai e le faamanatuga le filemu a o ou taliaina le meaalofa o le faamagaloga, tausia o a’u feagaiga, ma le mauaina o le Agaga o le Alii (tagai i le MF&F 20:77, 79).

O le mafaufau i le Togiola a Keriso i le taimi o le faamanatuga na aumaia ai se isi meaalofa i lo’u mafaufau. E le gata na mafai ona faamagaloina a’u, ae sa mafai foi ona ou mauaina le faamalologa ona na tauaveina e lo’u Faaola i Ona lava luga o’u tiga ma vaivaiga (tagai i le Alema 7:11–12). Na auala mai i Lana Togiola ma le faamanatuga, sa mafai ai ona ou maua le filemu ma le malosi i le Sapati—po o se isi foi lava aso—nai lo le atuatuvale ma le faanoanoa.

Ma sa ou mauaina lena filemu. O loo i ai lo’u Faaola iina mo a’u i Aso Sa ma taimi uma!

Faataitai Onosai Faatuatua

Sa le o se vaifofo lea e tasi le vaiaso. Sa avea o se tauiviga, ma sa alu ai se taimi. “Ae peitai a tatou faamoemoe i le mea ua le vaaia, tatou te faatalitali atu i ai ma le onosai” (Roma 8:25). Sa faaauau pea ona ou galue i la’u taulaiga ma tatalo ia lagona le fiafia mo le Sapati.

I le aluga o taimi, sa ou maua le filemu ma le fiafia i lena aso paia, ae sa lei mafai ona ou faavaivai ai iina pe toe see atu foi i faanoanoaga o le Sapati. O vaiaso taitasi e manaomia ai se taulaiga filiga i le Faaola ma le faamoemoega o le Sapati, ae ou te iloa o le folafolaga o le filemu ma le olioli e moni lava.