7 Motugā’afa mo le Tuuina atu o se Lauga

Saunia e Sarah Hanson

E alala le tusitala i Iuta, ISA.

E te lauga i le sauniga faamanatuga i se taimi vave? Faataitai motugā’afa nei.

Ou te le iloa ia te oe, ae a tofia a’u e lauga i le sauniga faamanatuga, ou te lagona lava le popolevale—e le ona o le tusiga o le lauga ae o le tuuina atu moni o le lauga. Ou te popole i taimi uma, “Ae a pe afai e pe iva [la’u lauga]? Ae faapefea pe afai e galo ia te a’u ona ta’u atu se mea? Ae faapefea pe afai e feseta’i ia te a’u se upu?”

Na e lagonaina lea lava lagona e tasi? (Talosia e le na o a’u.) Afai o lea, ia e le o le iuga lea o le lalolagi! Siaki motugā’afa nei e fitu e faaleleia ai ou tomai tautala ma tuu atu ai se lauga mataalia.

Sauniaina o le Lauga

Faaaoga tusitusiga paia ma aoaoga a perofeta o aso nei (tagai MF&F 52:9). O le fatu lea o lau lauga. Aua o le tasi lea o mafuaaga autu ua tatou i ai i le Lotu—ia aoao atu ma aoao mai le talalelei a Iesu Keriso. E mafai ona e suesueina lau autu faatasi ma le fesoasoaniga a le Taiala i Tusitusiga Paia (i le scriptures.lds.org) ma lauga o le konafesi aoao (saili e ala i autu i le gc.lds.org). Ia mautinoa ua e malamalama i mau ma upusii ua e fuafua e faaaoga i lau lauga. Afai e te manaomia se fesoasoani, fesili i ou matua po o taitai o le Ekalesia.
Valaaulia le Agaga. O se manatu lelei i taimi uma le muai tatalo ma saunia ia maua le Agaga e faatasi ma oe a o e lauga atu. E le gata e aumai e le Agaga le mafanafana i ou musele, ae e molimau mai foi o Ia e uiga i le upumoni (tagai i le MF&F 42:14). Valaaulia le Agaga i a outou sauniga faamanatuga e ala i le tuuina atu o lau molimau e uiga i mea e te talitonu i ai e moni.
Mafaufau i se tala patino. O se tasi o auala sili e faia ai fesootaiga ma isi o le auala atu lea i tala. Tatou te fiafia e faalogo atu i aafiaga o isi ma pe faape’i o latou olaga. O lea ia taumafai ai e mafaufau i se aafiaga mālie, tulagaese, pe lu’itauina na e oo i ai lea e fesootai ma le mataupu faavae o le talalelei ua atofa atu ia te oe e lauga i ai. O le a se mea na e aoaoina mai lena aafiaga? Na faapefea ona fesoasoani ia te oe? O se auala sili lea e tatala ai lau lauga pe afai e te le o iloa pe faapefea ona amata.
Faataitai, faataitai, faataitai! A uma ona e tusia lau lauga, atonu e te manao e faataitai ona lauga leotele na o oe, ona lauga lea i luma o tagata o lou aiga po o ni uo. E mafai ona e iloaina pe o i ai lau lauga i totonu o le taimi faatapulaaina ma pe o i ai ni vaega e manaomia ona e faamaninoina. Afai e malie i ai le epikopo, e mafai foi ona e alu muamua i le tou falesa e faataitai ai lau lauga i luga o le pulelaa!

Tuuina atu o le Lauga

Aloese mai le amataina i le “Ou te le o fia tu atu i luga nei.” O lea amataga e mafai ona tele ni ona foliga eseese, ae o le toatele o le au faafofoga e vave lava ona latou iloaina. E masani lava o se mea faapenei, “Ina ua valaau mai le epikopo ia te a’u e talosagaina pe mafai ona ou lauga, sa ou taumafai lava e mafaufau i se ‘alofaga e le faia ai.” E mafai e le toatele o tagata o le Ekalesia ona malamalama i le le toafimalie e ono oo i ai le lauga atu, ae a tau na ona e faapea atu, “Ou te le o fia i ai iinei,” e mafai ona lagona e tagata lena mea o le “Faamolemole aua ne’i faalogo mai ia te a’u.” O le mea sili lava o le aloese mai lenei amataga atoa lava—ia naunautai i lau autu!
Tautala ma le manino. O se mea masani lava mo se tasi le tautala vave pe lemu foi ona o musele. Ou te matua iloa lelei! Ae e taua le tautala ma le manino a o e tuu atua lau lauga ina ia mafai ona malamalama le potopotoga ia te oe. Ia faia se taumafaiga mataala e faalemu, faaleo au upu, ma ia talafeagai le leotele (ioe, e oo lava i se faaleotele leo, e mafai lava ona tau le lagona). E fia faafofoga lava tagata i mea e te saunoa ai!
Ia tilotilo pea i luga. O le tepataulai atu i tagata o se vaega taua tele o fesootaiga lelei. O loo faaalia ai o loo e taulai atu ma le faamaoni ma saofagā i se talanoaga. Ia, e te le tau tepataulai atu i tagata uma i le potopotoga a o e lauga atu, ae e tusa foi pe e te tilotilo i luga i le pito i tua po o luma o le potu, o le a sili atu ona e mata’ina o se failauga. Aloese mai lou punou ai pea ma tilotilo i lau lauga! E fia vaai atu le au faafofoga i lau ataata, ae le o lou tumua’i.

E oo foi lava i nei motugā’afa e fitu, e te ono fesasia’i foi ni upu pe matauina foi se tasi o moe i le atulaina nofoa lona tolu. Ae pe avea ai la oe ma se failauga le lelei? E leai lava!

A tatou faia se mea e le masani ai mai lo tatou tulaga toafimalie, e masani lava ona lagonaina le atuatuvale pe faia foi ni nai mea sese laiti. Ae a tau lava ina e taumafai i le mea silisili ma valaaulia le Agaga, e le afaina la pe e te tau feto’u pe galo foi se mea ona ta’u atu. O loo e faia le galuega a le Atua ma fesoasoani i Lana fanau ia aoao atili e uiga i le talalelei!

Afai e te aoao atu ma molimau atu i mea ua e talitonu i ai, o le a lelei mea uma.