Ti aika a maiu man te Iti

4 Reirei mairoun Iotebwa Timiti ni Kaotinakoan Ana Boki Moomon

Iroun Mckenna Clarke

Ana Maekatin te Ekaretia

Ngke ai tibwa 24 ana ririki, Iotebwa Timiti e kaitarai kaangaanga ngke e mwakuri ni kakoroi nanon ana tua te Atua. Ma e tokanikai n ana ibuobuoki te Atua, ao ngaira naba ti kona.

Ngkai kairake n ikawai ngaira, ti kona n tuangaki bwa ti na karaoi bwaai aika a kaangaanga karaoakiia n akea ana ibubouoki te Atua. N aron naba, Iotebwa Timiti, ngke ai tibwa 24 ana ririki, e kaitarai kaangaanga ao e namakina te aki tau ngkai e kataia ni kakoroa nanon te tua ae moan te kakaawaki—boretian ana Boki Moomon are e rairaki. Ma ana ibuobuoki te Atua, e katiai bwaai ni kabane ake e mwiokoaki iai, ao ana katoto e kaoti kawai tabeua ake ti na kona iai ni karaoi bwaai aika aki kona ni karaoaki ngkana e mena te Atua n ara itera.

1. Ti aki riai bwa ti na korakora n are e na kona te Atua ni karaoi kakai rinanora. Ngke e kakatauraoi Iotebwa ni boreetiia ana Boki Moomon, bon te kairake ngaia ae e a ikawai ao akea ana mwane ae mwaiti ke ana reirei ae kinaaki—bon akea ana atatai n aron rairan ao boreetian te rekooti ae kakaawaki aei. Ma, e waaki nako ma te onimaki ao te bwaintangira ao mwaakan te Atua ni katia te mwakuri are e tuangaki bwa e na karaoi. Ngkana ti onimakina Tamara are i Karawa, E na anganira te konabwai ni karaoan Ana mwakuri.

2. Ngkana e anganiira te mwakuri te Atua, E na katauraoa te kawai n tokanikai. Iroun Iotebwa, boreetian 5,000 katotoon te boki ae 590 baana e taraa n aki kona ni karaoaki. Ma, ngke e a roko tain boreetian te koroboki, te Uea e kaunga nanon Martin Harris bwa e na kabonakoa ana tabo ni man ae nakoraoi, ni katauraoa te mwaiti ae $3,000 (are titebo mwaitina ma $76,000 n te bong aei) ni buoka Iotebwa ni kakoroan nanon ana mition. N aron are e taku Nibwaai, “E na bon aki anga te kaetieti [te Uea] nakoia natiia aomata, ma ti ngkana e a tia ni katauraoa te kawai ibukiia are a na kona iai ni kakoroa bukin te bwai ae tua nakoia bwa a na karaoia” (1 Nibwaai 3:7). Tamara are i Karawa e katauraoi bwaai n ibuobuoki aika tau ake e kona n reke iroun Iotebwa ni katiate mwakuri. Ao E na karaoa naba aio ibukira.

3. Te Atua e angaanga te kauoua n tai. Iotebwa Timiti e karaoi kairua are e bua iai 116 iteranibaan ana Boki Moomon ake a tia n rairaki. Ibukin buan iteraniba ake 116, Iotebwa e bua naba ana konabwai n rairairi n te tai anne. Ma ibukina bwa e rineia bwa e na rairananona, n tokina e kabwaraaki ana bure ao e anganaki ana kauoua n tai ni kakoroa nanon ana mition. E taku te Uea, “Ma uringnga, e nanoanga te Atua; ngaia are raira nanom man te bwai ake ko a tia ni karaoia are kaitara te tua are I a tia n anganiko, ao ko bon teimatoa naba n rineaki, ao ni manga weteaki riki nakon te mwakuri” (R&B 3:10). Maiura e kaonaki ni kairua n te maiu aei, ma ngkai ti rairi nanora ao ni katikui nanora n te tabo ae eti, te Uea e na anganiira n tainako ara kauoua n tai.

4. Ingaingara nakon te kukurei are e a tia n taekinaki nakoira n te berita e kona ni buokiira rinanon nako kaangaanga. N aki tarai kaangaanga ni kabane are e a tia ni kaitarai Iotebwa, e karekei kakabwaia aika a mwaiti ao e rinanon te kukurei ni koaua rinanon nako ana mwakuri ni kaotinakoan Ana Boki Moomon. Imwiin boreetian Ana Boki Moomon, e a kateaki te Ekaretia ao a bwabetitoaki ana karo Iotebwa. N te bong anne, Iotebwa e nakon te buakonikai n ti ngaia ao e waaki n tang ma te kimwareirei. Ngkana ti reitinako rinanon ara kaangaanga ma te korakora, ni katikui ara onnimaki ae bwanin iroun te Atua, ti na kona naba ni karekea te kimwareirei ao te rau.

Ukoukori aika Mwaiti Riki

N reiakinan riki taekan boreetian Ana Boki Moomon ao katean te Ekaretia, wareka “Rikiraken Ana Ekaretia Kristo” inanon Okitobwa 2018 Riaona.

Kunei aika a mwaiti riki ibukin te tai aei n rongorongon te Ekaretia i “Establishing the Foundations of the Church” in Our Heritage: A Brief History of The Church of Jesus Christ of Latter-day Saints.