Bwaai Ake A Tangiriia Bitiobi ni Kabane Bwa A Na Ataia Kain Ana Uoote

Iroun Michael Meyers

E maeka te tia korokaraki i Utah, USA.

Aikai waniua koaua aika I reiakin n au tai ni beku bwa te bitiobi.

E reke au tai ae moan te tamaroa ni beku bwa te bitiobi. Inanon ririki akanne, I reiakin reirei aika a mwaiti riki nakon ae kona ni warekaki. Ma I a tia n reiakin waniua koaua ake I kakoaua bwa e tabangaki n te aonaaba. E ngae ngke te rinan aei e aki mwanewei bwaai ni kabane, ma au kantaninga n aei bon tibwauakin bwaai ake a kantaningaia bitiobi ni kabane bwa a ataia kain ana uoote.

1. Te bitiobi e tangiriia ni kabane kain ana uoote ma nanona ae koaua.

Ana tangira te bitiobi ibukin ana uoote e reitaki ma ana tangira Tamara are i Karawa ao Iesu Kristo ibukira ni kabane. Ngkana e tarataraia kain te aro inanon te bootaki n toa te bitiobi, e rootia te tangira ao te nanoanga n te aro ae akea kabotauana ni bwaai ake e a tia n rinanona. Ngkana e teirake te bitiobi n tibwaia bwa mwaitira ana tangira ibukiia kain ana uoote, e namakinaki nanona ao e koaua. Ataia bwa e tangiriko am bitiobi, e tabeaianga ibukim, ao e tabe ibukim n te aro ae e riao riki nakon ae ko ataia.

2. Te bitiobi e kamatoaaki n te aro n rabwata, n ana namakin, ao n tamneina, man aia onimaki ao aia tataro kain te aro.

E kabanei angiin aoa aika mwaiti te bitiobi ni beku. E reitinako ni kabane angiin aoa aika mwaiti n te taromauri n te Taabati ao n tairikin te wiikente imwiin te mwakuri ni kawariia, ni maroro, ao n tararuaia kain ana uoote.

Te bitiobi e kona ni karaoa aei ni katoa wiiki ibukin aia onimaki ao aia tataro kain ana uoote. Ni weteakiu n riki bwa te bitiobi ae boou, a bwaro rannimatau n aki tauaki ni katoa te tai are e tataro iai te membwa bwa e na “kakabwaiaaki te bitiobi.” Ami tataro n onimaki a kaekaaki ma te koaua, ao te bitiobi e karekea ao e namakina te kamatoa ae reke man tataro akanne. Te Uea e kaekai tataro aika kaonaki n te onimaki aika toka iaon atuuia bitiobi n te Ekaretia.

3. N tabetai e namakinna te bitiobi bwa e aki tau ibukin te wewete (e ngae ngke imwiin teniua ke aua te ririki maniia ni beku).

E karako mwaiitia bitiobi aika i kinaia ake a namakinna bwa a bon “tauraoi” ni koaua ibukin te wewete. Ma I ataia, bwa “ane e weteia te Uea, e konabwai imatan te Uea.”¹ E ngae ngke e ataia te bitiobi bwa e a moanna n tau, e bon inimaki naba ma namakinan ae e aki kona n nakoraoi ni karaoan nakoana. E na anga ana kabanea n tamaroa n anga ana reirei ae wanawana ngkana e kainnanoaki, n aki kauni nanoia aomata, ao n tauraoi n ira te Tamnei, ma n tabetai e na bon teimatoa n nano korakora tai ngkana e kakoroa raoi nanon weteana.

4. Tamnein te Atua e kona ni mwakuri rinanon te bitiobi ngkana e maroro ma kain ana uoote.

Ngkana I titirakinaki bwa tera ae I rang n uringnga ngke I riki bwa te bitiobi, I tuangiia aomata bwa I uringa korakoran te namakin mairoun te Tamnei n raonaki ma te kariaiakaki are mairoun te bitiobi. Ngkana tao e karauaki nanoia naake a tia ni bua raoia aika a tangiraki, te maroro nakoia naake a korakai irouia buuia aika a bon aki kon n onimakinaki, ke weteaia aomata nakon te rairannano, te Tamnei are e tauraoi nakon te bitiobi ae kakaonimaki bon Tamnein te Atua ao tamnein te kaotioti.

Iai kain te uoote ngkoa ae ae butiai ibukin buokana iaon tabeua ana kaangaanga ake e rinanona. E a tia neiei ni mwaing nakon te uoote ae boou ao e aki koaua ngkana e tangiria ni kawara ana bitiobi ae boou ibukin kairana. I tibwai nakon neiei bwaai ake I a tia n tibwai n taai aika mwaiti mangke I kamotirawaki, are ngkai I bon kukurei n ibuobuoki, ai akea irou te kiing are e taua te bitiobi ao kiing akanne a kona n rang ni kakaawaki ni karekean te boutoka are e kainnanoia. I tuangnga bwa e na taetae ma ana bitiobi. I roko irouna uoua te wiiki imwiina, ao e taeku bwa e a tia ni kaitibo ma ana bitiobi ao kanga ai aron ae e a kaman ataa te kanganga are e mena inanona ma aron buokana ae te kabanea n tamaroa. E ngae ngke e kona ni karaoi kairua te bitiobi, te Uea e kaunga nanona, kairia, ao e kakabwaiai maiu rinanon ana taeka.

5. Te bitiobi bon te aomata, n tabetai e karaoi kairua ao n tabetai e kairua karaoan bwaai irouna.

Bitiobi, e ngae ngke a mena n te nakoa, bon aomata aika rabwata. A aki kororaoi, a kabwaka, a tabeitera, ao bon iai aia kaangaanga i bon irouia. Te Tamnei e katauraoa te aomata are e taua te nakoa ni bitiobi, ma te bitiobi bon te aomata naba ae rotaki ni kaangaanga ma kabwakana ake ti kaitarai ni kabane.

Ataakin aei e riai n aki kakerikaaka te karinerine are ti kaotia nakon nakoana ke te kakauongo nakon ana reirei. Te bitiobi e rang atai mamaarana ao e kataia n tokanikai iaoia ke e totokoi bwa e na aki rootaki ana mwakuri ngkai te bitiobi. Ni matoan are e kataia, e na bon aki koraraoi n tainako.

6. Te bitiobi e namakinna bwa e aki kona n nooriia raoi kain ana uoote n aron ae tau ke ni karaoi mwakuri aika a tau.

Ni katoa bong e titiraki te bitiobi bwa antai riki ae e kona ke ae e riai n tia ni buokia n te bong anne. I rang tangiria ni karoko irouia kain te aro ni kabane n tai ae mwaiti, ma iai au mwakuri ae bwanin au tai iai, au utu, aia burokuraem te roronrikirake, ao tabeman kain te uoote aika a korakora kainnanoia. E bon aki tau te tai ibukin noorakiia kain te aro ni kabane n te tai ae baireaki.

E ngae n anne, ngkai te bitiobi, n tabetai e wirikirikinai te tamnei bwa N na kawariia kain te aro ake a kainnanoa buokaia. N angin te tai, a taekinna ngkana ti kawaria, “I a kaman ataia ae kam na roko.” Te Tamnei are ti namakinna n angin te tai ti aki kona ni katinanikua ngkai ti uaia n ataia bwa rokora bon kakoauana bwa te Atua e kaekai tataro nako.

I kukurei naba n tainako n ongo te kaeka aei mairouia kain te aro ake a kakaonimaki, “ake akea aia kaangaanga” aika kain te aro. Aomata aika raoiroi aikai a taromauri ni katoa wiiki, a kakaonimaki n nakoaia, akea aia kaangaanga aika aki kona ni kaitarai, ao ae tabangaki aki bati ni kakawaraki irouia taan kairiiri man te nakoanibonga. A kakaitau n reken tabeua aia tai ae kaka temanna ma aia bitiobi. Nakoimi ni kabane butimwaea ae I kangai, “Kam rabwa! Waaki nako! Ataia bwa e tangiri ngkami ami bitiobi ao e na kakawari riki nakoimi ngkana e kona.”

7. N ae koaua ao e bon rang kainnanoi ngkami te bitiobi bwa kam na ibuobuoki imarenami.

N rikiu bwa te bitiobi, n te tai naba are I tuangaki bwa iai kain te uoote ae e kainnanoa buokana, I aki toki n titiraki, “Antai taan kakawari ao tia reirei n te mweenga?” Aio bon teuana te kawai ni buokakin kainnanoia n te tai ae uarereke ke ae maan. Te bitiobi, e mwakuri n akea te ibuobuoki mai irouia kain te uoote ao te titeiki, e aki tau kaubwaina. E bon kona—ao e na bon—nako ni kawariia aomata ake a rootaki. Ma n raonaki irouia te nakoanibonga ao te Bootaki n Aine ake a kona n reke irouna, e kona ni karababaaki ana konabwai n ibuobuoki.

Aio raoi nanon te mwakuri ni ibuobuoki. Iai taai are tabeman mai iroura a mwaninga bwa bukin tera ti ibuobuoki imarenara. Te Uea e a tuangiira bwa ti na “itangitangiri imarenara” (Ioane 13:34). Ataia bwa am bitiobi e kabongana te mwakuri ni ibuobuoki bwa te kawai ae kairaki bwa e na “kona riki n roko” ni maiuia kain ana uoote.

8. Te bitiobi e tangiria bwa e na kona ni karaoi bwaai ni kabane ibukiia kain ana uoote.

N taai nako, te ngaina ke te bong, ngkana tao te kakabwaia n te nakoanibonga, reireinan te ataei ae aki ongotaeka, ke n ienikuri nakon te kabuanibwai, e na karaoi bwaai nako ake a kainnanoi kain te aro. E aki kona ni karaoi n tii ngaia, ao e kona n tiaki ngaia ae tau ni bwaai nako aika a riki, ma tai maaku ni butiia ana ibuobuoki ngkana ko kainnanoia. Ataia bwa te bitiobi e tauraoi n ibuobuoki n taai akanne ao ko na kakabwaiaaki n ae mwaiti ibukin te kaai n ibuobuoki.

I nanorinano man te tibwanga ae tabu are I karekea ni beku n te wewete ae mimitong aei. N au ibuobuoki, I mwaing man te kakoaua nakon te atatai. I aki manga kakoaua bwa te euangkerio e koaua, I ataia bwa e bon koaua. I aki manga kakoaua bwa te Atua e kinaai, I ataia bwa te Atua akea tiana n ataira ngaira n tatabemaniira, ni maiura ni katoabong ao ara kaangaanga are ti kaitarai. Riki, I ataia bwa E mwakuri rinanoia Ana toro, riki naake iai irouia kiingin te nakoanibonga. I ataia bwa I aki kona ni karaoa nanon au beku bwa te bitiobi ngkana akea ana mwamwannano te Atua n te mwakuri aei. Bon koauan te euangkerio ao ana tangira te Atua ibukiia Natina are a konabwai iai bitiobi ni beku.